(ប៉េកាំង)៖ នៅថ្ងៃពុធ ទី២ ខែមេសា យោធាចិនបានហាត់សមបាញ់គ្រាប់ពិតរយៈចម្ងាយឆ្ងាយ នៅសមុទ្រចិនខាងកើត អំឡុងសមយុទ្ធយោធាដែលកំពុងបន្ត នៅក្បែរកោះតៃវ៉ាន់។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

យោធាចិនប្រចាំភូមិភាគខាងកើត បាននិយាយថា នៅថ្ងៃពុធនេះ ជាផ្នែកនៃសមយុទ្ធយោធា Strait Thunder-2025A កងកម្លាំងជើងគោករបស់ខ្លួន បានធ្វើការហាត់សមបាញ់គ្រាប់ពិតរយៈចម្ងាយឆ្ងាយ ឆ្ពោះទៅកាន់ផ្ទៃទឹកនៅសមុទ្រចិនខាងកើត ហើយការហាត់សមនេះ បានផ្តោតចំពោះការពង្រឹងសមត្ថភាពវាយប្រហារ ទៅលើកំពង់ផែសំខាន់ៗ និងហេដ្ឋារចនាសម្ព័ន្ធថាមពល។ នាព្រឹកថ្ងៃពុធនេះ ក្រសួងការពារជាតិតៃវ៉ាន់ បានឱ្យដឹងថា ក្នុងរយៈពេល២៤ម៉ោងចុងក្រោយ ចិនបានចល័តយន្តហោះយោធា ៧៦គ្រឿង និងនាវាយោធា១៥គ្រឿង ក្នុងការធ្វើសមយុទ្ធ។ ចិនចាត់ទុកតៃវ៉ាន់ ជាផ្នែកនៃទឹកដីរបស់ខ្លួន និងមិនដែលបោះបង់ចោលជម្រើសប្រើកម្លាំងយោធា ដើម្បីបង្រួបបង្រួម ជាមួយដែនកោះនេះឡើយ។

គួរបញ្ជាក់ថា ចិនបានចាប់ផ្តើមការធ្វើសមយុទ្ធក្នុងទ្រង់ទ្រាយធំ ដើម្បីដំឡើងសាច់ដុំដាក់តៃវ៉ាន់ កាលពីថ្ងៃអង្គារ ស្របពេលដែល​ទីក្រុងប៉េកាំ ងបានបង្កើនវោហារសាស្រ្តប្រឆាំងមេដឹកនាំតៃវ៉ាន់ លោក Lai Ching-te ដែលត្រូវបានចិនហៅថា ជា​ «ប៉ារ៉ាសិត»។ សមយុទ្ធយោធាថ្មីទាំងនេះរបស់ចិន ក៏កើតមានឡើងចំពេលផងដែរ ដែលរដ្ឋមន្រ្តីការពារជាតិអាមេរិក លោក Pete Hegseth ទើបតែបញ្ចប់ការបំពេញទស្សនកិច្ច នៅតំបន់អាស៉ី ខណៈអំឡុងដំណើរទស្សនកិច្ចនោះ រូបលោកបានរិះគន់ចិនម្តងហើយម្តងទៀត។ កាលពីខែឧសភា និងខែតុលា ឆ្នាំមុន ចិនធ្លាប់បានដឹកនាំការធ្វើសមយុទ្ធយោធាធំៗ២លើក នៅក្បែរតៃវ៉ាន់ ហៅថា Joint Sword-2024A និង Joint Sword-2024B៕