(បរទេស)៖ លោក Chun Wang ដែលជាមហាសេដ្ឋីរូបិយវត្ថុរូបិយបណ្ណអេឡិចត្រូនិច ថ្មីៗនេះបានចាប់ផ្តើមបេសកកម្មអវកាសជាប្រវត្តិសាស្ត្រដែលគេស្គាល់ថា «Fram2»។ បេសកកម្មនេះ បានចាប់ផ្តើមនៅថ្ងៃទី៣១ ខែមីនា ឆ្នាំ២០២៥ ជាលើកទីមួយ ដែលមនុស្សបានគោចរដោយផ្ទាល់ពីជារង្វង់មូលលើប៉ូលខាងជើង និងខាងត្បូងរបស់ផែនដី។ លោក Wang គឺជាសហគ្រិន និងជាវិនិយោគិនរូបិយវត្ថុរូបិយបណ្ណអេឡិចត្រូនិច Bitcoin បានដឹកនាំនាវិកចំនួន ៤នាក់ តាមរយៈយាន SpaceX Dragon ដែលបានចាប់ផ្តើមពីមជ្ឈមណ្ឌលអវកាស Kennedy របស់ NASA ក្នុងរដ្ឋផ្លរីដា។
នៅក្នុងបេសកកម្មនេះមាននាវិកទាំង ៤នាក់គឺលោក Chun Wang ត្រូវបានគេហៅ ឬកំណត់ជាមេបញ្ជាការបេសកកម្ម, នាង Jannicke Mikkelsen ជនជាតិន័រវេស ជាមេបញ្ជាការយាន, នាង Rabea Rogge ជនជាតិអាល្លឺម៉ង់ ហើយក៏ជាស្ត្រីជនជាតិអាឡឺម៉ង់ដំបូងគេដែលបានធ្វើដំណើរនៅក្នុងលំហ និងជាចុងក្រោយគឺលោក Eric Phillips ជនជាតិអូស្ត្រាលី គឺជាគ្រូពេទ្យ។
គោលបំណងបេសកកម្ម Fram2 គឺធ្វើការពិសោធន៍ទៅលើកម្មវត្ថុចំនួន ២២ រួមទាំងការថតកាំរស្មីអ៊ិចរបស់មនុស្សជាលើកដំបូងនៅក្នុងលំហ និងការពិនិត្យមើលនៃការរីកលូតលាស់របស់ផ្សិតនៅក្នុងមីក្រូទំនាញ។ ជាមួយគ្នានោះគឺធ្វើការស៊ើបអង្កេតបាតុភូតមួយហៅថា VE (ការបង្កើនល្បឿនកំដៅ) នៅរយៈកម្ពស់ចន្លោះពី ៤០០-៥០០ គីឡូម៉ែត្រ។
បេសកកម្មនេះត្រូវបានគេរំពឹងថានឹងមានរយៈពេលពី ៣ ទៅ ៥ថ្ងៃ ដោយយានអវកាសនេះធ្វើដំណើរក្នុងគន្លងប្រហែល ២៧២ ម៉ាយពីលើផែនដីក្នុងល្បឿនប្រហែល ១៧០០០ម៉ាយក្នុងមួយម៉ោង ប្រហែល ២៧៣៥៩គីឡូម៉ែត្រក្នុងមួយម៉ោង។
លោក Chun Wang ត្រូវបានគេរាយការណ៍ថា បានចំណាយ ៥៥លានដុល្លារក្នុងមួយកៅអីសម្រាប់យានអវកាស SpaceX Crew Dragon ក្នុងបេសកកម្ម Fram2 របស់គាត់ ដូច្នេះសរុបជារួមគឺគាត់បានចំណាយប្រាក់ប្រមាណជា ២២០លានដុល្លារអាមេរិកសម្រាប់បេសកកម្មមួយនេះ។
តើលោក Chun Wang គឺជានរណា?
លោក Wang មានដើមកំណើតមកពីទីក្រុង Tianjin ប្រទេសចិន ប៉ុន្តែមានសញ្ជាតិនៅក្នុងប្រទេសជាច្រើន រួមទាំងប្រទេសម៉ាល់តា ជាកន្លែងដែលគាត់រស់នៅបច្ចុប្បន្ន។ គាត់អះអាងថាមានលិខិតឆ្លងដែនចំនួនប្រាំមួយ។ យោងតាមប្រភពជាច្រើនបានអះអាងថា លោក Wang គឺជាបុគ្គលមួយរូបដែលជោគជ័យបំផុតនៅក្នុងវិស័យរូបិយវត្ថុរូបិយបណ្ណអេឡិចត្រូនិចរហូតក្លាយជាមហាសេដ្ឋី។
មិនមានរបាយការណ៍ច្បាស់លាស់ណាមួយអំពីទ្រព្យសម្បត្តិសរុបរបស់លោកឡើយ គ្រាន់តែដឹងថា លោកបានកាន់កាប់ Bitcoin ចំនួនប្រមាណ ៧៧០០ កាលពីពីរឆ្នាំមុន ហើយបើគិតត្រឹមបច្ចុប្បន្នគឺវាមានតម្លៃ ៤៥០លានដុល្លារ ចំណែកក្រុមហ៊ុនរុករករូបិយវត្ថុរូបិយបណ្ណអេឡិចត្រូនិច Bitcoin ធំលំដាប់ពិភពលោកគឺ F2Pool ដែលលោកជាសហស្ថាបនិកនោះ នាពេលនេះមានតម្លៃនៅលើទីផ្សារប្រហែលជា ៧៦ពាន់លានដុល្លារអាមេរិក។
មហាសេដ្ឋីរូបិយវត្ថុរូបិយបណ្ណអេឡិចត្រូនិចបានបង្ហាញមហិច្ឆតាផ្ទាល់ខ្លួនថា លោកចាប់អារម្មណ៍ធ្វើដំណើរពេញមួយជីវិតរបស់លោកនៅលើលំហ និងមានគោលបំណងទៅទសនាគ្រប់ប្រទេសទាំងអស់នៅលើផែនដីជាមួយនឹងបេសកកម្មហោះហើររបស់គាត់៕
