(ព្យុងយ៉ាង)៖ ទីភ្នាក់ងារព័ត៌មានរដ្ឋកូរ៉េខាងជើង KCNA នៅថ្ងៃពុធ ទី២ ខែមេសា បាននិយាយថា កូរ៉េខាងជើងថ្កោលទោសចំពោះ ការព្រមព្រៀងគ្នានាពេលថ្មីៗនេះ រវាងជប៉ុននិងសហរដ្ឋអាមេរិក ស្តីពីការផលិតរួមគ្នានូវមីស៉ីលប្រភេទ air-to-air ដោយចោទថា វាជាការបង្កើនហានិភ័យសន្តិសុខនៅក្នុងតំបន់ និងជាឧទាហរណ៍មួយទៀត នៃការឈ្មុសឈ្មុលរបស់ទីក្រុងវ៉ាស៉ីនតោន ក្នុងការធ្វើយោធូបនីយកម្មប្រទេសជប៉ុន។ នេះប​បើតាមការចេញផ្សាយដោយ ទីភ្នាក់ងារព័ត៌មាន Reuters។

KCNA បានលើកឡើងថា ក្នុងគ្រាដែលសហរដ្ឋអាមេរិក កំពុងដំឡើងសមត្ថភាពទីបញ្ជាការយោធារបស់ខ្លួននៅជប៉ុន កិច្ចសហប្រតិបត្តិការរបស់ប្រទេសទាំងពីរ ក្នុងការផលិតមីស៉ីលរួមគ្នា គឺច្បាស់ណាស់មានបង្កប់ចេតនាយោធាអាក្រក់ សំដៅមកលើបណ្តាប្រទេសផ្សេងទៀត នៅក្នុងតំបន់។ ការលើកឡើងរបស់ KCNA គឺយោងតាមសម្តីរបស់មន្រ្តីមួយរូប នៅក្រសួងការពារជាតិកូរ៉េខាងជើង។

មន្រ្តីរូបនោះបានសំដៅទៅលើ មីស៉ីល AIM-120 ប្រភេទ air-to-air (សម្រាប់បាញ់ពីយន្តហោះទៅគោលដៅលើផ្ទៃអាកាស) ដែលសហរដ្ឋអាមេរិក និងជប៉ុន បានព្រមព្រៀងពន្លឿនការរួមគ្នាផលិត អំឡុងទស្សនកិច្ចរបស់រដ្ឋមន្រ្តីការពារជាតិអាមេរិក លោក Pete Hegseth នៅទីក្រុងតូក្យូ កាលពីចុងសប្តាហ៍មុន។

មន្រ្តីកូរ៉េខាងជើង បាននិយាយថា ការពន្លឿនការដាក់ពង្រាយអាវុធបែបនេះ ប្រើប្រាស់ដោយយន្តហោះ ដែលចូលរួម ក្នុងការធ្វើសមយុទ្ធយោធាជាញឹកញាប់ នៅក្នុងតំបន់ ដែលបានបង្កការគំរាមកំហែងសន្តិសុខធ្ងន់ធ្ងរ ​រួចស្រេចទៅហើយនោះ នឹងបន្ថែមធាតុថ្មីទៀតនៃអស្ថិរភាពផ្នែកយុទ្ធសាស្រ្ត មកក្នុងតំបន់អាស៉ី-ប៉ាស៉ីហ្វិក។ មន្រ្តីដដែលបានបន្តថា ការព្រមព្រៀងគ្នានោះ គឺស្របពេលដែលអាមេរិក បានចូលរួមផ្សំគំនិតនិងជំរុញ កិច្ចប្រឹងប្រែងកសាងយោធាឱ្យធំឡើងវិញ របស់ជប៉ុន។

គួរបញ្ជាក់ថា នៅទីក្រុងតូក្យូ លោក Hegseth និងសមភាគីជប៉ុន បានឯកភាពគ្នាពន្លឿនផែនការ ស្តីពីការរួមគ្នាផលិតមីស៉ីល air-to-air ហើយនឹងពិចារណារួមគ្នា ផលិតមីស៉ីលប្រភេទផ្សេងៗទៀត។ ប្រមុខការពារជាតិអាមេរិករូបនោះ បានសង្កត់ធ្ងន់អំពីសារសំខាន់នៃតួនាទីរបស់ជប៉ុន ក្នុងកិច្ចប្រឹងប្រែងទប់ស្កាត់ចិន ហើយចាត់ទុកជប៉ុន ជាសសរគ្រឹះមួយនៃសន្តិសុខ នៅអាស៉ី-ប៉ាស៉ីហ្វិក៕