(ហ៊្សេរុយសាឡិម)៖ នៅថ្ងៃពុធ ទី២ ខែមេសា រដ្ឋមន្រ្តីការពារជាតិអ៉ីស្រាអែល បានប្រកាសអំពីការពង្រីកកាន់តែធំបន្ថែមទៀត នូវប្រតិបត្តិការយោធាក្នុងតំបន់ហ្កាហ្សា បន្ទាប់ពីសង្រ្គាមប្រឆាំងក្រុមហាម៉ាស បានបន្តឡើងវិញ នៅដែនដីប៉ាឡេស្ទីនមួយនេះ។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។
រដ្ឋមន្រ្តីការពារជាតិអ៉ីស្រាអែល លោក Israel Katz បាននិយាយថា តំបន់មួយផ្នែកធំនៃហ្កាហ្សា នឹងត្រូវរឹបអូស រួចដាក់បញ្ជូលជាតំបន់សន្តិសុខរបស់អ៉ីស្រាអែល។ បើតាម លោក Katz នឹងមានការជម្លៀសប្រជាជនទ្រង់ទ្រាយធំ ចេញពីតំបន់នានាដែលមានការប្រយុទ្ធគ្នា ហើយលោកបានទទូចឱ្យប្រជាជននៅហ្កាហ្សា ចូលរួមកម្ចាត់ក្រុមហាម៉ាស និងប្រគល់ចំណាប់ខ្មាំងអ៉ីស្រាអែលមកវិញ ដ្បិតវាគឺជាមធ្យោបាយតែមួយគត់ ដើម្បីបញ្ចប់សង្រ្គាម។
យ៉ាងណាមិញ លោក Katz មិនបានបញ្ជាក់ច្បាស់ថា ទឹកដីទំហំប៉ុន្មានរបស់ហ្កាហ្សា ដែលអ៉ីស្រាអែលគ្រោងរឹបអូសនោះឡើយ។ កន្លងមកនេះ អ៉ីស្រាអែលបានរៀបចំតំបន់ទ្រនាប់ធំគួរសម រួចស្រេចក្នុងហ្កាហ្សា ដោយពង្រីកតំបន់មួយ ដែលមានស្រាប់នៅតាមតំបន់គែមៗនៃដែនដីនេះ តាំងពីមុនសង្រ្គាម ហើយបង្កើតតំបន់សន្តិសុខធំមួយ នៅច្រករបៀង Netzarim ដែលរត់កាត់ចំកណ្តាលតំបន់ហ្កាហ្សា។
គួរបញ្ជាក់ថា អ៉ីស្រាអែលបានបន្តការទម្លាក់គ្រាប់បែកលើហ្កាហ្សា និងបញ្ជូនកងទ័ពវាយលុកតាមជើងគោកឡើងវិញ កាលពីខែមីនា ពោលគឺរយៈពេលប្រមាណ២ខែ ក្រោយអនុវត្តបទឈប់បាញ់មួយ ដែលបានអនុញ្ញាតឱ្យអ៉ីស្រាអែល និងហាម៉ាស ដោះដូរអ្នកទោស និងចំណាប់ខ្មាំងគ្នា។ ដោយឡែក កិច្ចប្រឹងប្រែងចរចាដំណាក់កាលបន្ទាប់ ដែលសំដៅស្វែងរកទីបញ្ចប់ជាអចិន្រ្តៃយ៍ សម្រាប់សង្រ្គាម កំពុងបន្តជាប់គាំង។ នាយករដ្ឋមន្រ្តីអ៉ីស្រាអែល លោក Benjamin Netanyahu បាននិយាយថា ការដាក់សម្ពាធយោធា គឺជាមធ្យោបាយប្រសើរជាងគេបំផុត ដើម្បីអាចនាំយកចំណាប់ខ្មាំង៥៩នាក់ ដែលបន្តជាប់ឃុំឃាំងនៅហ្កាហ្សា ត្រឡប់មកវិញ៕
