(វ៉ាស៉ីនតោន)៖ មន្ទីរបញ្ចកោណ បានឱ្យដឹងថា រដ្ឋមន្រ្តីការពារជាតិអាមេរិក​ លោក Pete Hegseth បាននិយាយថា សមត្ថភាពយោធាអាមេរិកនៅតំបន់មជ្ឈិមបូព៌ា នឹងត្រូវបានពង្រឹងតាមរយៈការបញ្ជូនយន្តហោះចម្បាំង ទៅកាន់ទីនោះបន្ថែមទៀត។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃពុធ ទី២ ខែមេសា ឆ្នាំ ២០២៥។

ការឱ្យដឹងរបស់ប្រមុខការពារជាតិអាមេរិក បានធ្វើឡើងពីរសប្តាហ៍បន្ទាប់ពី ប្រធានាធិបតីលោក ដូណាល់ ត្រាំ គំរាមទម្លាក់គ្រាប់បែក ករណីដែលអ៉ីរ៉ង់មិនព្រមធ្វើកិច្ចព្រមព្រៀងនុយក្លេអ៊ែរ ក៏ដូចជាការវាយប្រហារលើក្រុមហ៊ូទីនៅយេម៉ែន។ មិនមានការបញ្ជាក់ទេថា យន្តហោះចម្បាំងប៉ុន្មានគ្រឿងនឹងត្រូវដាក់ពង្រាយបន្ថែម ឬថាតើពេលណាបញ្ជូនទៅនោះទេ។

យ៉ាងនេះក្តី បើតាមក្រុមមន្រ្តីអាមេរិក ដែលនិយាយក្នុងលក្ខខណ្ឌមិនបញ្ចេញឈ្មោះ យន្តហោះទម្លាក់គ្រាប់បែក B-2 មួយចំនួន ឬអាចដល់ទៅ ៦គ្រឿង បានប្តូរទីតាំងឈរជើង ឬទៅកាន់មូលដ្ឋានយោធាអាមេរិក-អង់គ្លេស នៅលើកោះ Diego Garcia នៃមហាសមុទ្រឥណ្ឌា កាលពីសប្តាហ៍មុន។

ក្រុមអ្នកជំនាញនិយាយថា វត្តមាន B-2 ដែលប្រើបច្ចេកវិទ្យាបំបាំងកាយ និងបំពាក់គ្រាប់បែក ក៏ដូចជាអាវុធនុយក្លេអ៊ែរ ទម្ងន់ធ្ងន់បំផុត របស់សហរដ្ឋអាមេរិក នៅទីនោះ គឺជាទីតាំងដ៏ប្រសើរមួយ សម្រាប់ការធ្វើប្រតិបត្តិការនៅមជ្ឈិមបូព៌ា៕