(សិង្ហបុរី)៖ ភាពតានតឹងនៅក្នុងតំបន់សមុទ្រចិនខាងត្បូង បណ្ដាញឆបោកជាសកល និងអាណត្តិទី២របស់ប្រធានាធិបតីអាមេរិក ដូណាល់ ត្រាំ (Trump 2.0) គឺជាក្ដីកង្វល់ភូមិសាស្ត្រនយោបាយ ធំៗបំផុតទាំង៣ របស់បណ្ដាមេដឹកនាំនៃប្រទេសក្នុងតំបន់អាស៊ីអាគ្នេយ៍ក្នុងឆ្នាំ២០២៥នេះ។ នេះបើតាមរបាយការណ៍របស់វិទ្យាស្ថានស្រាវជា្រវមួយរបស់សិង្ហបុរី ដកស្រង់ចេញផ្សាយដោយសារព័ត៌មាន CNA។

នៅក្នុងរបាយការណ៍របស់ខ្លួនមានចំណងជើងថា «2025 edition of The State of Southeast Asia survey» ចេញផ្សាយនៅថ្ងៃព្រហស្បតិ៍ ទី៣ ខែមេសា វិទ្យាស្ថានISEAS-Yusof Ishak បានឱ្យដឹងថា ចាប់តាំងពីលោក ដូណាល់ ត្រាំ ស្បថចូលកាន់តំណែងជាប្រធានាធិបតីសម្រាប់អាណត្តិទី២ កាលពីថ្ងៃ២០ ខែមករាមក មេដឹកនាំថ្មីរបស់សហរដ្ឋអាមេរិករូបនេះបានក្លាយជាក្ដីកង្វល់ភូមិសាស្ត្រនយោបាយ បន្ទាប់ពីបញ្ហាសមុទ្រចិនខាងត្បូង និងបណ្ដាញឆបោកជាសកល។

របាយការណ៍ដដែល បានឱ្យដឹងទៀតថា អ្នកដែលត្រូវបានសម្ភាសន៍ ៥១.៦ភាគរយ បានឆ្លើយថាភាពតានតឹងនៅសមុទ្រចិនខាងត្បូងគឺជាក្ដីកង្វល់ភូមិសាស្ត្រនយោបាយខ្លាំងជាងគេឈរនៅលេខរៀងទី១ ចំណែកឯទី២ គឺបណ្ដាញឆបោកជាសកល មាន៤៨.១ភាគរយ ខណៈ Trump 2.0 ស្ថិតនៅលេខរៀងទី៣ មាន៤៦.៩ភាគរយ តាមពីដោយសង្រ្គាមរបស់អ៉ីស្រាអែលប្រឆាំង ក្រុមហាម៉ាសដែលមាន ៣៦.៧ភាគរយ និងសង្រ្គាមរវាងរុស្ស៉ី និងអ៊ុយក្រែន មាន៣២.៤ភាគរយ៕