(ប៊ុយដាប៉ែស)៖ ហុងគ្រី នៅថ្ងៃព្រសហ្បតិ៍នេះ បានប្រកាសពីគម្រោងដកខ្លួនចេញពីតុលាការឧក្រិដ្ឋកម្មអន្តរជាតិ (ICC) ខណៈដែលនាយករដ្ឋមន្ត្រីអ៊ីស្រាអែល Benjamin Netanyahu កំពុងបំពេញទស្សនកិច្ចផ្លូវរដ្ឋនៅប្រទេសនេះ។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន Reuters។

ការសម្រេចចិត្តនេះ ត្រូវបានគេមើលឃើញថា ជាការឆ្លើយតបទៅនឹងការចេញដីកាចាប់ខ្លួនរបស់ ICC លើលោក Netanyahu ពាក់ព័ន្ធនឹងការចោទប្រកាន់ពីបទឧក្រិដ្ឋកម្មសង្រ្គាមនៅហ្គាហ្សា។

នាយករដ្ឋមន្ត្រីហុងគ្រីស្តាំនិយម លោក Viktor Orban បានរិះគន់ដីកាចាប់ខ្លួននេះយ៉ាងខ្លាំង ដោយហៅវាថា «គួរឱ្យមើលងាយ និងមិនអាចទទួលយកបាន»។ តាមពិតទៅ ហុងគ្រីដែលជាសមាជិកស្ថាបនិកនៃ ICC តាមទ្រឹស្តីមានកាតព្វកិច្ចចាប់ខ្លួន និងប្រគល់អ្នកដែលស្ថិតក្រោមដីកា ប៉ុន្តែលោក Orban បានបញ្ជាក់យ៉ាងច្បាស់ថា ហុងគ្រីនឹងមិនធ្វើតាមការសម្រេចចិត្តនេះទេ។

ប្រទេសហុងគ្រីបានចុះហត្ថលេខាលើធម្មនុញ្ញ ICC តាំងពីឆ្នាំ ១៩៩៩ និងផ្តល់សច្ចាប័នក្នុងឆ្នាំ ២០០១ ប៉ុន្តែច្បាប់នេះមិនត្រូវបានបញ្ចូលទៅក្នុងច្បាប់ជាតិទេ។ លោក Gergely Gulyas ប្រធានបុគ្គលិករបស់លោក Orban បាននិយាយថា ដំណើរការដកខ្លួនចេញពីតុលាការនេះ នឹងចាប់ផ្តើមជាផ្លូវការនាពេលឆាប់ៗនេះ។

គួរបញ្ជាក់ថា ការពិចារណាលើការចាកចេញពី ICC របស់ហុងគ្រីបានលេចចេញមក បន្ទាប់ពីសហរដ្ឋអាមេរិកក្រោមការដឹកនាំរបស់ប្រធានាធិបតី លោក ដូណាល់ ត្រាំ បានដាក់ទណ្ឌកម្មលើរដ្ឋអាជ្ញា ICC លោក Karim Khan កាលពីខែកុម្ភៈ។ លោក Orban បានលើកឡើងថា វាជាពេលដែលហុងគ្រីត្រូវពិនិត្យមើលឡើងវិញ នូវតួនាទីរបស់ខ្លួននៅក្នុងអង្គការអន្តរជាតិ ដែលស្ថិតក្រោមទណ្ឌកម្មរបស់សហរដ្ឋអាមេរិក។ សេចក្តីព្រាងច្បាប់ស្តីពីការដកខ្លួន ទំនងជាត្រូវបានអនុម័តដោយសភារបស់ហុងគ្រី ដែលគ្រប់គ្រងដោយគណបក្ស Fidesz របស់លោក Orban៕