(មូស្គូ)៖ រុស្ស៊ីបាននិយាយនៅថ្ងៃព្រហស្បតិ៍ថា ការគំរាមកំហែងនៃការវាយប្រហារយោធាប្រឆាំងនឹងសម្ព័ន្ធមិត្តរបស់ខ្លួនអ៊ីរ៉ង់ គឺមិនអាចទទួលយកបានទេ ហើយបានព្រមានថា ការវាយប្រហារលើសាធារណរដ្ឋអ៊ីស្លាមនេះ អាចនាំឱ្យមានលទ្ធផលមហន្តរាយ ប្រសិនបើការដំឡើងនុយក្លេអ៊ែរត្រូវបានទម្លាក់គ្រាប់បែក។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃព្រហស្បតិ៍ ទី៣ ខែមេសា ឆ្នាំ ២០២៥។

ការព្រមាននេះធ្វើឡើងបន្ទាប់ពីប្រធានាធិបតីអាមេរិក លោក ដូណាល់ ត្រាំ បានគំរាមអ៊ីរ៉ង់កាលពីថ្ងៃអាទិត្យ ដោយលើកឡើងពីលទ្ធភាពនៃការទម្លាក់គ្រាប់បែក និងការដាក់ពន្ធបន្ថែម ប្រសិនបើទីក្រុងតេអេរ៉ង់មិនព្រមចុះកិច្ចព្រមព្រៀងជាមួយទីក្រុងវ៉ាស៊ីនតោនជុំវិញកម្មវិធីនុយក្លេអ៊ែររបស់ខ្លួន។ ស្របពេលនោះ សហរដ្ឋអាមេរិកក៏បានបញ្ជូនយន្តហោះចម្បាំងបន្ថែមទៀតទៅកាន់តំបន់មជ្ឈិមបូព៌ាផងដែរ។

ឆ្លើយតបទៅនឹងសំណួរអំពីកម្មវិធីនុយក្លេអ៊ែររបស់អ៊ីរ៉ង់ និងគ្រោះថ្នាក់នៃស្ថានភាពបច្ចុប្បន្ន ក្រសួងការបរទេសរុស្ស៊ីបានបញ្ជាក់ថា ទីក្រុងម៉ូស្គូនៅតែប្តេជ្ញាចិត្តក្នុងការស្វែងរកដំណោះស្រាយដោយសន្តិវិធីចំពោះកម្មវិធីនុយក្លេអ៊ែររបស់អ៊ីរ៉ង់ ដោយគោរពសិទ្ធិរបស់ទីក្រុងតេអេរ៉ង់ក្នុងការប្រើប្រាស់ថាមពលនុយក្លេអ៊ែរសម្រាប់គោលបំណងសន្តិវិធី។

អ្នកនាំពាក្យក្រសួងការបរទេសរុស្ស៊ី លោកស្រី Maria Zakharova បានប្រាប់អ្នកសារព័ត៌មានថា «ការប្រើប្រាស់កម្លាំងយោធាដោយគូប្រជែងរបស់អ៊ីរ៉ង់ នៅក្នុងបរិបទនៃការស្វែងរកដំណោះស្រាយ គឺខុសច្បាប់ និងមិនអាចទទួលយកបានជាដាច់ខាត»។ លោកស្រីបានបន្ថែមទៀតថា «ការគំរាមកំហែងពីខាងក្រៅក្នុងការទម្លាក់គ្រាប់បែកលើហេដ្ឋារចនាសម្ព័ន្ធនុយក្លេអ៊ែររបស់អ៊ីរ៉ង់ នឹងនាំទៅរកមហន្តរាយជាសកលដែលមិនអាចត្រឡប់វិញបាន។ ការគំរាមកំហែងបែបនេះ គឺពិតជាមិនអាចទទួលយកបានឡើយ»។

គួរបញ្ជាក់ថា មហាអំណាចលោកខាងលិចបានចោទប្រកាន់អ៊ីរ៉ង់ថា កំពុងលាក់បាំងផែនការសម្ងាត់ក្នុងការបង្កើតសមត្ថភាពអាវុធនុយក្លេអ៊ែរ តាមរយៈការបង្កើនកម្រិតសារធាតុយូរ៉ាញ៉ូម លើសពីកម្រិតដែលពួកគេចាត់ទុកថា សមស្របសម្រាប់កម្មវិធីថាមពលបរមាណូស៊ីវិល។ ទោះជាយ៉ាងណាក៏ដោយ ទីក្រុងតេអេរ៉ង់បានអះអាងថា កម្មវិធីនុយក្លេអ៊ែររបស់ខ្លួនគឺសម្រាប់តែគោលបំណងថាមពលស៊ីវិលប៉ុណ្ណោះ៕