(សេអ៊ូល)៖ ប្រធានាធិបតីកូរ៉េខាងត្បូង ត្រូវបានព្យួរតំណែង លោក Yoon Suk Yeol ត្រូវបានតុលាការធម្មនុញ្ញសម្រេចដកតំណែងជាផ្លូវការហើយ នៅថ្ងៃសុក្រ ទី៤ ខែមេសា ដែលនេះនឹង ត្រួសត្រាយផ្លូវឱ្យមានការរៀបចំការបោះឆ្នោតជ្រើសរើសប្រធានាធិបតីថ្មី។ នេះបើតាមការចេញផ្សាយដោយទីភ្នាក់ងារសារព័ត៌មាន AFP។

តាមរយៈសាលក្រមសម្រេចរបស់តុលាការធម្មនុញ្ញកូរ៉េខាងត្បូង ដោយទទួលយកសេចក្ដីសម្រេចរបស់សភាដែលបានបោះឆ្នោតគាំទ្រការដកតំណែងរបស់លោក Yoon បានធ្វើឱ្យរូបលោក ក្លាយជាប្រធានាធិបតីទី២ របស់កូរ៉េខាងត្បូង ដែលត្រូវបានទម្លាក់ចេញពីតំណែង បន្ទាប់ពីលោកស្រី Park ដែលត្រូវបានតុលាការធម្មនុញ្ញទម្លាក់ចេញពីតំណែងនៅខែមីនា ឆ្នាំ២០១៧។ ចៅក្រមទាំង៨រូបនៃតុលាការធម្មនុញ្ញបានសម្រេចជាឯកច្ឆន្ទជាមួយការតម្កល់ទុកជាបានការនូវសេចក្ដីសម្រេចដកតំណែងលោក Yoon ដោយសភាជាតិ។ ចំណែក នាយករដ្ឋមន្ត្រី Han Duck-soo នឹងត្រូវបន្តកាន់តំណែងជា ប្រធានាធិបតីស្ដីទី រហូតដល់ប្រធានាធិបតីថ្មីត្រូវបានជ្រើសរើស នៅក្នុងការបោះឆ្នោត ក្នុងរយៈពេល៦០ថ្ងៃ​ ឬអាចធ្វើឡើងនៅសប្ដាហ៍ដំបូង នៃខែមិថុនាខាងមុខនេះ។

ក្នុងពេលបច្ចុប្បន្ន មេដឹកនាំគណបក្សប្រជាធិបតេយ្យដែលជា បក្សប្រឆាំងដ៏សំខាន់មួយនៅកូរ៉េខាងត្បូង គឺលោក Lee Jae-myung កំពុងមានប្រជាប្រិយភាពនាំមុខគេក្នុងការស្ទង់មតិ។ តែក្រុមអ្នកវិភាគយល់ថាវាដូចជាលឿនពេកដែលត្រូវនិយាយថា លោក Lee អាចនឹងទទួលបានជ័យជម្នះក្នុងការបោះឆ្នោតណាមួយ ខណៈមានគម្លាតនៃការគាំទ្រត្រឹម ៦ពិន្ទុប៉ុណ្ណោះរវាងគណបក្សរបស់លោក និងគណបក្សអំណាចប្រជាជន People Power Party (PPP) របស់លោក Yoon។

គួរបញ្ជាក់ថា លោក Yoon Suk Yeol ដែលត្រូវបានសភាគ្រប់គ្រងដោយក្រុមគណបក្សប្រឆាំង ព្យួរតំណែងកាលពីថ្ងៃទី១៤ ខែធ្នូ ជុំវិញការប្រកាសប្រើច្បាប់អាជ្ញាសឹកកាលពីថ្ងៃទី៣ ខែធ្នូ ឆ្នាំ២០២៤ ក៏កំពុងប្រឈមមុខនឹងការស៊ើបអង្កេតព្រហ្មទណ្ឌ ក្រោមបទចោទប្រកាន់បះបោរផងដែរ។ ប្រសិនបើតុលាការរកឃើញថាលោកពិតជាមានពិរុទ្ធលើបទចោទបះបោរពិតមែន នោះលោកអាចប្រឈមមុខ នឹងទោសជាប់ពន្ធនាគារអស់មួយជីវិត ឬប្រហារជីវិត៕