(រ៉ូម)៖ នាយករដ្ឋមន្ត្រីអ៉ីតាលី លោកស្រី Giorgia Meloni បាននិយាយកាលពីថ្ងៃព្រហស្បតិ៍សប្តាហ៍នេះថា ពន្ធពាណិជ្ជកម្មដែលប្រកាសដោយសហរដ្ឋអាមេរិក គឺជាកំហុសមួយ ប៉ុន្តែផលប៉ះពាល់ចំពោះអ៉ីតាលី មិនគួរត្រូវបានទាយទុកមុនឱ្យហួសហេតុពេកនោះទេ ហើយប្រតិកម្មឆ្លើយចាំបាច់ត្រូវតែពិចារណាដោយប្រុងប្រយ័ត្ន។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃសុក្រ ទី៤ ខែមេសា ឆ្នាំ ២០២៥។
លោកស្រី Meloni បានប្រាប់ប្រព័ន្ធផ្សព្វផ្សាយក្នុងស្រុកដូច្នេះថា «យើងមិនត្រូវដុតបញ្ឆេះឱ្យមានភាពវឹកវរនោះទេ។ វាមិនមែនជាគ្រោះមហន្តរាយឡើយ។ ខ្ញុំមិនជឿថា វិធីដ៏ល្អបំផុតក្នុងការឆ្លើយតបចំពោះពន្ធគយ គឺជាការដាក់ពន្ធតបទៅវិញនោះទេ»។
គួរបញ្ជាក់ថា ប្រធានាធិបតីលោក ដូណាល់ ត្រាំ បានដាក់ចេញនូវវិធានការពន្ធថ្មី ចំពោះប្រទេសនានាដែលយកពន្ធពីអាមេរិក កាលពីថ្ងៃពុធកន្លងទៅ។ អ៉ីតាលីក៏បានទទួលរងនូវពន្ធគយ ២០ភាគរយ ដូចប្រទេសសហភាពអឺរ៉ុបផ្សេងទៀតដែរ៕
