(ព្រុចសែល)៖ នាយករដ្ឋមន្ត្រីបែលហ្ស៉ិក បាននិយាយថាប្រទេសរបស់លោកទំនងជានឹងមិនចាប់ខ្លួនលោក Benjamin Netanyahu តបតាមដីកាចាប់ខ្លួនរបស់តុលាការព្រហ្មទណ្ឌអន្តរជាតិ ICC ប្រឆាំងនឹងនាយករដ្ឋមន្ត្រីអ៉ីស្រាអែលរូបនេះពីបទចោទប្រកាន់ប្រព្រឹត្តឧក្រិដ្ឋកម្មសង្រ្គាម និងប្រឆាំងមនុស្សជាតិនៅក្នុងតំបន់ហ្កាហ្សានោះទេ។ នេះបើតាមការចេញផ្សាយដោយ ទីភ្នាក់ងារសារព័ត៌មាន AFP។

ការកត់សម្គាល់បែបនេះរបស់នាយករដ្ឋមន្ត្រីបែលហ្ស៉ិក លោក Bart De Wever ធ្វើឡើង បន្ទាប់ពីការដំណើរទស្សនកិច្ចរបស់លោក Netanyahu ទៅកាន់ប្រទេសហុងគ្រីដែលជាសមាជិក ICC ដោយមិនខ្វល់ពីដីកាចាប់ខ្លួនរបស់តុលាការអន្តរជាតិមួយនេះទេ ហើយក៏បានលុបចោលក្ដីសង្ឃឹមថាប្រទេសអឺរ៉ុបផ្សេងទៀតនឹងធ្វើផ្សេងពីហុងគ្រីផងដែរ។ នៅក្នុងបទសម្ភាសន៍ជាមួយ ប្រព័ន្ធផ្សព្វផ្សាយ VRT ដោយចង់សំដៅលើទស្សនកិច្ចរបស់លោក Netanyahu កាលពីថ្ងៃព្រហស្បតិ៍សប្ដាហ៍នេះទៅកាន់ហុងគ្រីដែលបានក្រាលព្រំក្រហមទទួលស្វាគមន៍មេដឹកនាំអ៉ីស្រាអែល រូបនេះដោយមិនខ្វល់ពីដីកាចាប់ខ្លួនរបស់ ICC លោក De Wever បានគូសបញ្ជាក់ដូច្នេះថា «ខ្ញុំមិនគិតទេថានឹងមានប្រទេសអឺរ៉ុបណាមួយនឹងចាប់ខ្លួនលោក Netanyahu ប្រសិនបើរូបលោក ស្ថិតនៅលើទឹកដីរបស់ពួកគេ។ ឧទាហរណ៍ បារាំងនឹងមិនចាប់ខ្លួនរូបលោកនោះទេ ហើយខ្ញុំមិនគិតនោះទេថាយើងត្រូវចាប់ខ្លួនរូបលោក»។

គួរបញ្ជាក់ថា ហុងគ្រី នៅក្រោមការដឹកនាំរបស់លោកនាយករដ្ឋមន្ត្រី Viktor Orban កាលពីថ្ងៃព្រហស្បតិ៍សប្ដាហ៍នេះ ក៏បានប្រកាសផងដែរពីការផ្ដើមនីតិវិធីដកហុងគ្រីចេញពី ICC។ ប៉ុន្តែ លោក De Wever អះអាងថាបែលហ្ស៉ិកនឹងមិនដើរទៅឆ្ងាយ រហូតដល់ដកខ្លួនចេញពី ICC នោះឡើយ៕