(កំប៉ាឡា, អូហ្កង់ដា)៖ ការកាត់ផ្តាច់ជំនួយបរទេស ដែលដាក់ចេញដោយរដ្ឋបាលប្រធានាធិបតីអាមេរិក ដូណាល់ ត្រាំ បានរារាំងដល់កម្មវិធីតាមដាន និងបង្ការមេរោគគ្រោះថ្នាក់ពីការផ្ទុះឡើងនៅជុំវិញពិភពលោក ហើយកើតមានឡើងចំពេលដែលជំងឺដូចជា mpox និង Ebola កំពុងរីករាលដាល។ នេះបើយោងតាមការចេញផ្សាយដោយទីភ្នាក់ងារសារព័ត៌មាន CNA នៅថ្ងៃអង្គារ ទី៨ ខែមេសា ឆ្នាំ ២០២៥។

កាលពីខែមករា រដ្ឋាភិបាលលោក ត្រាំ បានផ្អាកស្ទើរតែទាំងស្រុងនូវកម្មវិធីផ្តល់ជំនួយបរទេស នៃទីភ្នាក់ងារសហរដ្ឋអាមេរិកសម្រាប់ការអភិវឌ្ឍអន្តរជាតិ (USAID) ដើម្បីកាត់បន្ថយការចំណាយ។ ភ្លាមៗវាបានជះផលប៉ះពាល់ដល់តំបន់អាហ្រ្វិក រួមទាំងការងារប្រយុទ្ធប្រឆាំងនឹងជំងឺគ្រុនឈាម។

ក្រុមអ្នកជំនាញសុខភាពសកលបានប្រាប់ CNA ថា ជំងឺឆ្លងច្រើនតែចេញផុតពីព្រំដែន។ របៀបសម្រេចចិត្តទាក់ទងនឹងបញ្ហាសុខភាពពិភពលោក អាចជះផលប៉ះពាល់ដល់កន្លែងផ្សេងទៀត ដោយមិនគិតពីប្រភពដើម។

ជាឧទាហរណ៍ ប្រទេសអ៊ូហ្គង់ដា កំពុងស្ថិតក្នុងការផ្ទុះឡើងលើកទី ៦នៃជំងឺដែលមានប្រភពមកពីប្រទេសស៊ូដង់ នោះគឺគ្រុនឈាមធ្ងន់ធ្ងរដែលអាចបណ្តាលឱ្យស្លាប់ ដោយសារតែវាមានអំបូរជាមួយនិងមេរោគ Ebola។ ចាប់តាំងពីដើមឆ្នាំមក មានករណីចំនួន ១២ត្រូវបានបញ្ជាក់ ក្នុងនោះ ២នាក់ស្លាប់។ ប៉ុន្តែការ​ផ្ទុះនៅលើកនេះ ​អ៊ូហ្គង់ដា​មាន​ធនធាន​ស្តួចស្តើងជាងមុន សមត្ថភាពនៃមន្ទីរពិសោធន៍កាន់តែខើចទៅ ហើយក្រុមការងារផ្នែកសុខភាពកំពុងតស៊ូ ដើម្បីដោះស្រាយបញ្ហា។

នៅឯប្រទេសតង់ហ្សានី មេរោគ Marburg ដែលជាជំងឺគ្រុនឈាមធ្ងន់ធ្ងរ និងកើតមានឡើងញឹកញាប់ បានសម្លាប់មនុស្ស ១០នាក់។ អ្នកជំនាញបារម្ភថា ការផ្ទុះឡើងនៃមេរោគបែបនេះអាចលេចឡើង ហើយកាន់តែរាលដាលនៅពេលដែលជំនួយ ក៏ដូចជាការចែករំលែកព័ត៌មានរបស់សហរដ្ឋអាមេរិក មិនដំណើរការទៀត។ ក្រៅពីនេះហានិភ័យនៃការផ្ទុះជំងឺ Mpox ក៏កំពុងកើតមាននៅតាមបណ្តាប្រទេសអាហ្វ្រិកផងដែរ៕