(ប៉េកាំង)៖ ការធ្វើអនុត្តរភាពរបស់សហរដ្ឋអាមេរិក តាមរយៈការដំឡើងពន្ធគយ បានបង្កឱ្យមានការថ្កោលទោសយ៉ាងខ្លាំងក្លា និងមានវិធានការតបតយ៉ាងម៉ឺងម៉ាត់ពីប្រទេសជាច្រើន។ ឯកសារស្តីពីគោលជំហររបស់ចិន ដែលប្រឆាំងនឹង វិធានការដំឡើងពន្ធគយខុសទំនង របស់អាមេរិកទទួលបាន ការឆ្លើយតបជាវិជ្ជមានពីសំណាក់សហគមន៍អន្តរជាតិ។

ការស្ទង់មតិដែលបណ្តាញ CGTN នៃអគ្គស្ថានីយវិទ្យុនិងទូរទស្សន៍មជ្ឈិមចិន បានចេញផ្សាយទៅកាន់អ្នកប្រើអ៊ីនធឺណិត ជុំវិញពិភពលោក បានបង្ហាញថា អ្នកផ្តល់បទសម្ភាសន៍ បានអំពាវនាវឱ្យប្រទេសនានា ចាត់វិធានការដើម្បីប្រឆាំងនឹង "អនុត្តរភាពបែបអាមេរិក" ជាមួយគ្នា និងការពារសិទ្ធិ និងផលប្រយោជន៍ស្របច្បាប់ផ្ទាល់ខ្លួន ក៏ដូចជាសណ្តាប់ធ្នាប់សេដ្ឋកិច្ច និងពាណិជ្ជកម្មអន្តរជាតិដែលបាននិងកំពុងអនុវត្តនាពេលបច្ចុប្បន្ន។

អ្នកផ្តល់បទសម្ភាសន៍ចំនួន ៨៦,៩%បានយល់ឃើញថា វិធានការតបតរបស់ប្រទេសនានាដើម្បីប្រឆាំងនឹង ការធ្វើអនុត្តរភាពតាមរយៈ ការដំឡើងពន្ធគយរបស់សហរដ្ឋអាមេរិក គឺជាសកម្មភាពស្របច្បាប់ ដើម្បីការពារផលប្រយោជន៍ដ៏ត្រឹមត្រូវរបស់ខ្លួន។ អ្នកផ្តល់បទសម្ភាសន៍ចំនួន៨៩,២% បានអំពាវនាវឱ្យប្រទេសកាន់តែច្រើនទៀត ប្រកាន់ជំហរ និងមានចំណាត់ការយ៉ាងសកម្ម ចំពោះបញ្ហាពាណិជ្ជកម្មជាមួយសហរដ្ឋអាមេរិក។

នៅក្នុងការស្ទង់មតិនេះ អ្នកផ្តល់បទសម្ភាសន៍ចំនួន ៨២,២ % រំពឹងថាអង្គការពាណិជ្ជកម្មពិភពលោក នឹងដើរតួនាទីយ៉ាងសកម្មបន្ថែមទៀត ក្នុងការដោះស្រាយជម្លោះពាណិជ្ជកម្ម រវាងសហរដ្ឋអាមេរិក និងប្រទេសដ៏ច្រើន។ អ្នកផ្តល់បទសម្ភាសន៍ចំនួន ៧៩,៦% គាំទ្រឱ្យប្រទេសនានាដាក់ពាក្យបណ្តឹង ទៅកាន់ស្ថាប័នមជ្ឈត្តការរបស់ អង្គការពាណិជ្ជកម្មពិភពលោក ដើម្បីប្រឆាំងនឹង វិធានការដំឡើងពន្ធគយ របស់សហរដ្ឋអាមេរិក ដើម្បីការពារសិទ្ធិ និងផលប្រយោជន៍ស្របច្បាប់របស់ខ្លួន។

សូមបញ្ជាក់ថា ការស្ទង់មតិនេះត្រូវបានចេញផ្សាយនៅលើវេទិកាភាសាអង់គ្លេស អេស្ប៉ាញ បារាំង អារ៉ាប់ និងរុស្ស៊ីរបស់បណ្តាញ CGTN ។ ក្នុងរយៈពេល ២៤ ម៉ោង មានអ្នកប្រើអ៊ីនធឺណិតនៅក្រៅប្រទេសសរុប ៥១៧៧ នាក់បានចូលរួមក្នុងការស្ទង់មតិនេះ ដើម្បីបង្ហាញពីមតិយោបល់របស់ខ្លួន៕

វិទ្យុមិត្តភាពកម្ពុជាចិន