(វ៉ាស៊ីនតោន)៖ បេសកជនពិសេសរបស់ប្រធានាធិបតីអាមេរិក ដូណាល់ ត្រាំ លោក Steve Witkoff បានធ្វើដំណើរទៅប្រទេសរុស្ស៊ីនៅថ្ងៃសុក្រនេះ ដែលត្រូវបានគេរំពឹងថាលោកនឹងជួបពិភាក្សាជាមួយប្រធានាធិបតី Vladimir Putin នៅទីក្រុង St Petersburg។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters។
ដំណើរទស្សនកិច្ចនេះកើតឡើងចំពេលដែលសហរដ្ឋអាមេរិក កំពុងមានភាពតានតឹងជាមួយសម្ព័ន្ធមិត្តជិតស្និទ្ធរបស់រុស្ស៊ីគឺអ៊ីរ៉ង់ និងចិន។ ជំនួបរវាងលោក Witkoff និងលោក Putin ទំនងជាផ្តោតលើការវិនិយោគរួមគ្នានៅតំបន់អាក់ទិក និងរ៉ែកម្រ ក៏ដូចជាការពិភាក្សាអំពីកិច្ចព្រមព្រៀងសន្តិភាពដែលអាចកើតមាននៅអ៊ុយក្រែន។
ទន្ទឹមនឹងនេះ លោក Witkoff ក៏គ្រោងនឹងទៅប្រទេសអូម៉ង់នៅថ្ងៃសៅរ៍ ដើម្បីពិភាក្សាជាមួយអ៊ីរ៉ង់អំពីកម្មវិធីនុយក្លេអ៊ែរ បន្ទាប់ពីលោក ត្រាំ បានគំរាមកំហែងទីក្រុងតេអេរ៉ង់ដោយសកម្មភាពយោធា ខណៈរុស្ស៊ីធ្លាប់បានផ្តល់ជំនួយក្នុងការស្វែងរកដំណោះស្រាយការទូតលើបញ្ហានេះ។
គួរបញ្ជាក់ថា កាលពីថ្ងៃព្រហស្បតិ៍ មន្ត្រីអាមេរិកនិងរុស្ស៊ីបានជួបពិភាក្សាគ្នានៅទីក្រុងអ៊ីស្តង់ប៊ុល ដើម្បីពិភាក្សាអំពីការស្តារទំនាក់ទំនងការទូតឡើងវិញ។ ទោះជាយ៉ាងណា កិច្ចចរចាលើបទឈប់បាញ់នៅអ៊ុយក្រែនហាក់ដូចជាមានភាពជាប់គាំង ដោយសារភាពខុសគ្នានៃទស្សនៈលើលក្ខខណ្ឌ។ ទន្ទឹមនឹងនេះ លោក ត្រាំ ក៏បានព្រមានអំពីការដាក់ទណ្ឌកម្មលើប្រទេសដែលទិញប្រេងពីរុស្ស៊ី ប្រសិនបើលោកឃើងថា ទីក្រុងម៉ូស្គូកំពុងពន្យារពេលលើកិច្ចព្រមព្រៀងអ៊ុយក្រែន៕
