(Sumy)៖ មន្ត្រីអ៊ុយក្រែនបាននិយាយឲ្យដឹងនៅថ្ងៃអាទិត្យនេះថា មនុស្សចំនួន ៣២ នាក់បានស្លាប់ និងជាង ៨០ នាក់ផ្សេងទៀតបានរងរបួសដោយសារកាំជ្រួចផ្លោងរបស់រុស្ស៊ីចំនួនពីរដែលបានវាយប្រហារចំកណ្តាលទីក្រុង Sumy ភាគខាងជើងនៃប្រទេសអ៊ុយក្រែនកាលពីព្រឹកថ្ងៃអាទិត្យ។ នេះបើយោងតាមការចេញផ្សាយរបស់ទីភ្នាក់ងារសារព័ត៌មាន Reuters នៅថ្ងៃអាទិត្យ ទី១៣ ខែមេសា ឆ្នាំ២០២៥។
ប្រធានាធិបតី Volodymyr Zelenskiy បានថ្កោលទោសការវាយប្រហារ ដែលជាការវាយប្រហារដ៏សាហាវបំផុតមួយលើអ៊ុយក្រែនក្នុងឆ្នាំនេះ ហើយបានអំពាវនាវឱ្យមានប្រតិកម្មជាអន្តរជាតិដ៏តឹងរ៉ឹងប្រឆាំងនឹងទីក្រុងម៉ូស្គូ។ លោក Zelenskyy បានសរសេរនៅលើប្រព័ន្ធផ្សព្វផ្សាយសង្គម អមជាមួយនឹងវីដេអូដ៏រន្ធត់មួយថា «មានតែមនុស្សអមនុស្សធម៌ទេដែលអាចប្រព្រឹត្តទង្វើបែបនេះ»។
រដ្ឋមន្ត្រីមហាផ្ទៃអ៊ុយក្រែនបានរាយការណ៍ថា ជនរងគ្រោះស្ថិតនៅតាមដងផ្លូវ ក្នុងរថយន្ត ការដឹកជញ្ជូនសាធារណៈ និងនៅក្នុងអគារដែលរងការវាយប្រហារ។ លោកបានសង្កត់ធ្ងន់ថា នេះគឺជាការបំផ្លិចបំផ្លាញដោយចេតនាទៅលើជនស៊ីវិលនៅថ្ងៃបុណ្យដ៏សំខាន់មួយរបស់ព្រះវិហារ។
ប្រធានការិយាល័យប្រធានាធិបតី បានបញ្ជាក់ថា មីស៊ីលទាំងនោះផ្ទុកគ្រាប់បែកចង្កោម។ លោកបានចោទថា រុស្ស៊ីបានប្រព្រឹត្តទង្វើនេះក្នុងគោលបំណងសម្លាប់ជនស៊ីវិលឱ្យបានច្រើនតាមដែលអាចធ្វើទៅបាន។
មន្ត្រីសន្តិសុខអ៊ុយក្រែន លោក Andriy Kovalenko បានកត់សម្គាល់ថា ការវាយប្រហារនេះបានកើតឡើងបន្ទាប់ពីបេសកជនអាមេរិក Steve Witkoff ធ្វើទស្សនកិច្ចទៅកាន់ទីក្រុងម៉ូស្គូ។ លោកបានចោទថា រុស្ស៊ីកំពុងប្រើប្រាស់អ្វីដែលគេហៅថាការទូតដើម្បីបិទបាំងការវាយប្រហារលើជនស៊ីវិល។
លោក Zelenskiy បានអំពាវនាវឱ្យសហរដ្ឋអាមេរិក និងអឺរ៉ុបចាត់វិធានការតឹងតែងបន្ថែមទៀតលើរុស្ស៊ី ដើម្បីឆ្លើយតបនឹងអ្វីដែលលោកហៅថាជាទង្វើភេរវកម្ម។ លោកបានសង្កត់ធ្ងន់ថា បើគ្មានការដាក់សម្ពាធលើអ្នកឈ្លានពានទេ សន្តិភាពនឹងមិនអាចកើតមានឡើយ៕
