(វ៉ាស៉ីនតោន)៖ កាលពីថ្ងៃព្រហស្បតិ៍ ទី១៧ ខែមេសា ប្រធានាធិបតីអាមេរិក លោក ដូណាល់ ត្រាំ បាននិយាយថា រូបលោកនឹង​ជួបព្រះមហាក្សត្រអង់គ្លេស ព្រះអង្គ Charles នៅចក្រភពអង់គ្លេស អំឡុងខែកញ្ញាខាងមុខ ក្នុងដំណើរបំពេញទស្សនកិច្ចផ្លូវរដ្ឋ ជាលើកទី២មិនធ្លាប់មាន ដែលទីក្រុងឡុងដ៍សង្ឃឹមថា នឹងជួយពង្រឹងទំនាក់ទំនង។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

នាយករដ្ឋមន្រ្តីអង់គ្លេស លោក Kier Starmer បានប្រគល់ឱ្យលោក ត្រាំ នូវលិខិតអញ្ជើញទស្សនកិច្ចពីព្រះអង្គ Charles អំឡុងជំនួបនៅឯសេតវិមាន កាលពីខែកុម្ភៈកន្លងទៅ។ ពាក់ព័ន្ធនឹងកាលបរិច្ឆេទសម្រាប់គម្រោងដំណើរទស្សនកិច្ចនេះ លោក ត្រាំ បានបង្ហើបប្រាប់ក្រុមអ្នកសារព័ត៌មានដូច្នេះថា «ខ្ញុំគិតថា ពួកគេកំពុងកំណត់យកខែកញ្ញា»។

គួរបញ្ជាក់ថា លោក ដូណាល់ ត្រាំ នឹងក្លាយជាមេដឹកនាំនយោបាយដំបូងគេបង្អស់ ដែលមានឱកាសបំពេញទស្សនកិច្ចផ្លូវរដ្ឋជាលើកទី២ នៅចក្រភពអង់គ្លេស។ លោក ត្រាំ បានធ្វើទស្សនកិច្ចជាលើកដំបូងនៅទីនោះ កាលពីឆ្នាំ២០១៩ អំឡុងពេលលោកជាប្រធានាធិបតីអាមេរិក អាណត្តិទី១៕