(ប៊ុយដាប៉ែស)៖ នាយករដ្ឋមន្រ្តី លោក Viktor Orban បាននិយាយថា ហុងគ្រី រំពឹងថានឹងចុះហត្ថលេខា លើកិច្ចព្រមព្រៀងពាណិជ្ជកម្ម ជាមួយសហរដ្ឋអាមេរិក ក្នុងរយៈពេល ៦ខែខាងមុខ ដែលអាចជួយទូទាត់ផលប៉ះពាល់ ដែលអាចកើតចេញពីពន្ធគយរបស់លោកប្រធានាធិបតី ដូណាល់ ត្រាំ។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន Reuters នៅថ្ងៃសុក្រ ទី១៨ ខែមេសា ឆ្នាំ ២០២៥។

ឧស្សាហកម្មរថយន្តហុងគ្រី ដែលជាសមាជិកសហភាពអឺរ៉ុប (EU) គឺជាកត្តាជំរុញដ៏សំខាន់នៃសេដ្ឋកិច្ចរបស់ខ្លួន ប៉ុន្តែកំពុងប្រឈមនឹងផលប៉ះពាល់ដ៏មានសក្តានុពល ពីពន្ធគយរបស់សហរដ្ឋអាមេរិក ស្របពេលសេដ្ឋកិច្ចប្រទេសនេះ មានសន្ទុះយឺតជាងការរំពឹងទុក ហើយកំពុងព្យាយាមទប់ស្កាត់អតិផរណា នៅមុនការបោះឆ្នោតឆ្នាំ ២០២៦។

ដោយមិនលម្អិត លោក Orban និយាយថា «យើងកំពុងពិភាក្សាជាមួយអាមេរិក អំពីកត្តាសេដ្ឋកិច្ចដែលមានប្រយោជន៍ សម្រាប់ពួកយើង។ ពន្ធគយនឹងជះផលអវិជ្ជមានសម្រាប់យើង ប៉ុន្តែយើងចរចាពីកិច្ចព្រមព្រៀងសេដ្ឋកិច្ចផ្សេងទៀត ដើម្បីប៉ះប៉ូវជាមួយនិងពន្ធគយទាំងនោះ»។

គួរបញ្ជាក់ថា EU ត្រូវប្រឈមមុខនឹងពន្ធនាំចូល ២៥ភាគរយលើដែកថែប អាលុយមីញ៉ូម រថយន្ត និងពន្ធបន្ថែមលើ ទំនិញស្ទើរតែទាំងអស់ នៅក្រោមគោលនយោបាយរបស់ លោក ត្រាំ សម្រាប់ប្រទេសដែលដាក់របាំងខ្ពស់ ចំពោះការនាំចូលរបស់សហរដ្ឋអាមេរិក៕