(មូស្គូ)៖ វិមានក្រឹមឡាំង នៅថ្ងៃព្រហស្បតិ៍នេះ បាននិយាយថា ប្រទេសរុស្ស៊ីមិនមែនកំពុងធ្វើការពិភាក្សាជាមួយអឺរ៉ុប ឬសហរដ្ឋអាមេរិក អំពីការផ្គត់ផ្គង់ឧស្ម័នរបស់ខ្លួនតាមរយៈប្រទេសអ៊ុយក្រែននោះទេ ដោយបានសង្កត់ធ្ងន់ថា បញ្ហានេះជាកិច្ចការពាណិជ្ជកម្ម។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន Reuters នៅថ្ងៃព្រហស្បតិ៍ ទី២៤ ខែមេសា ឆ្នាំ២០២៥។
អ្នកនាំពាក្យវិមានក្រឹមឡាំង លោក Dmitry Peskov បានបញ្ជាក់ថា មិនមានការពិភាក្សាជាមួយសហរដ្ឋអាមេរិក និងអឺរ៉ុបអំពីការផ្គត់ផ្គង់ឧស្ម័នរុស្ស៊ីបន្ថែមទៀត តាមរយៈប្រទេសអ៊ុយក្រែន នាពេលបច្ចុប្បន្នទេ។ លោកបានថ្លែងថា «ចំណុចសំខាន់គឺថានេះជារឿងពាណិជ្ជកម្ម។ មានអ្នកលក់ឧស្ម័ន មានអ្នកទិញឧស្ម័ន... ប្រសិនបើអ្នកទិញបង្ហាញចំណាប់អារម្មណ៍ ហើយប្រសិនបើផ្លូវឆ្លងកាត់ដំណើរការ នោះអ្នកលក់នឹងត្រៀមខ្លួនដើម្បីពិភាក្សារឿងទាំងអស់នេះ។ គ្មាននរណាម្នាក់បដិសេធ ឬបដិសេធអ្វីនោះទេ»។
ការលើកឡើងរបស់លោក Peskov ធ្វើឡើងបន្ទាប់ពីមានរបាយការណ៍កាលពីដើមខែនេះ ដែលថា សហរដ្ឋអាមេរិកបានទាមទារឲ្យសាជីវកម្មហិរញ្ញវត្ថុអភិវឌ្ឍន៍អន្តរជាតិរបស់ខ្លួន គ្រប់គ្រងបំពង់បង្ហូរឧស្ម័នរបស់ក្រុមហ៊ុន Gazprom ឆ្លងកាត់អ៊ុយក្រែន ដែលជាផ្នែកមួយនៃកិច្ចពិភាក្សាសន្តិភាព។ បច្ចុប្បន្ន ផ្លូវបង្ហូរឧស្ម័នរុស្ស៊ីទៅអឺរ៉ុបដែលនៅសល់តែមួយគត់គឺ TurkStream ឆ្លងកាត់សមុទ្រខ្មៅ។
កាលពីថ្ងៃពុធ នៅក្នុងបទសម្ភាសន៍ជាមួយទស្សនាវដ្តីបារាំង Le Point លោក Peskov ក៏បានបញ្ជាក់ដែរថា ក្រុមហ៊ុន Gazprom បានត្រៀមខ្លួនរួចជាស្រេចក្នុងការបន្តការផ្គត់ផ្គង់ឡើងវិញ ហើយថាមានប្រទេសមួយចំនួននៅអឺរ៉ុបដែលចង់បន្តទិញឧស្ម័នរុស្ស៊ី ដោយបញ្ហាទាំងនេះនឹងត្រូវបានដោះស្រាយតាមលក្ខណៈពាណិជ្ជកម្ម។
គួរបញ្ជាក់ថា ការផ្គត់ផ្គង់ឧស្ម័នពីរុស្ស៊ីទៅកាន់អឺរ៉ុប បានធ្លាក់ចុះយ៉ាងគំហុកចាប់តាំងពីជម្លោះយោធានៅអ៊ុយក្រែនផ្ទុះឡើងក្នុងខែកុម្ភៈ ឆ្នាំ២០២២ និងក្រោយការផ្ទុះបំផ្លាញបំពង់បង្ហូរ Nord Stream។ ការនាំចេញតាមរយៈអ៊ុយក្រែនក៏បានធ្លាក់ចុះខ្លាំងផងដែរ ចាប់តាំងពីដើមឆ្នាំនេះ នៅពេលកិច្ចព្រមព្រៀងឆ្លងកាត់បានផុតកំណត់ ហើយអ៊ុយក្រែនបានបដិសេធមិនបន្តកិច្ចព្រមព្រៀង ដោយសារតែសង្គ្រាម៕
