(អ៉ីស្លាម៉ាបាដ)៖ កាលពីថ្ងៃចន្ទ ទី២៨ ខែមេសា រដ្ឋមន្រ្តីការពារជាតិប៉ាគីស្ថាន បាននិយាយថា នឹងមានការធ្វើសកម្មភាពយោធា​ឆ្មក់ចូលលុកលុយពីឥណ្ឌា ក្នុងពេលឆាប់ៗ ចំពោះមុខការបន្តកើនឡើងភាពតានតឹង រវាងប្រទេសមានអាវុធនុយក្លេអ៊ែរទាំងពីរ ក្រោយការវាយប្រហារដ៏ប្រល័យរបស់ក្រុមសកម្មប្រយុទ្ធ លើអ្នកទេសចរនៅតំបន់ Kashmir កាលពីសប្តាហ៍មុន។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

ការវាយប្រហាររបស់ក្រុមសកម្មប្រយុទ្ធ កាលពីថ្ងៃទី២២ ខែមេសា បានផ្តាច់ជីវិតមនុស្ស២៦នាក់ ហើយបានបង្កឱ្យមានការខឹងសម្បារជាខ្លាំងនៅឥណ្ឌា រួមជាមួយការអំពាវនាវឱ្យធ្វើសកម្មភាពប្រឆាំងប៉ាគីស្ថាន។ ឥណ្ឌាបានចោទប្រកាន់ប៉ាគីស្ថាន អំពីការគាំទ្រសកម្មភាពរបស់ក្រុមសកម្មប្រយុទ្ធ នៅ Kashmir ជាតំបន់ដែលប្រទេសទាំងពីរ បានទាមទារគ្រប់គ្រងទាំងស្រុង និងធ្លាប់ធ្វើសង្រ្គាមដណ្តើមគ្នា ដល់ទៅ២លើក។

ក្នុងកិច្ចសម្ភាសមួយជាមួយទីភ្នាក់ងារព័ត៌មាន Reuters នៅឯការិយាល័យរបស់លោក ក្នុងរដ្ឋធានីអ៉ីស្លាម៉ាបាដ រដ្ឋមន្រ្តីការពារជាតិប៉ាគីស្ថាន លោក Khawaja Muhammad Asif បាននិយាយថា កងកម្លាំងយោធាប៉ាគីស្ថាន ត្រូវបានពង្រឹងការត្រៀមលក្ខណៈ ដោយសារស្ថានការណ៍នាពេលនេះ បង្ហាញថា នឹងមានការធ្វើសកម្មភាពឆ្មក់លុកលុយ​ពីយោធាឥណ្ឌា ក្នុងពេលឆាប់ៗ។ លោក Asif បានបន្តថា ដូច្នេះក្នុងស្ថានការណ៍បែបនេះ ការសម្រេចចិត្តជាយុទ្ធសាស្រ្តមួយចំនួន ចាំបាច់ត្រូវធ្វើឡើង ហេតុនេះការសម្រេចចិត្តទាំងនោះ ក៏ត្រូវបានធ្វើឡើង។

លោករដ្ឋមន្រ្តីការពារជាតិប៉ាគីស្ថាន បានបន្ថែមទៀតថា ឥណ្ឌាបានបង្កើនវោហារសាស្រ្តជាខ្លាំង ហើយយោធាប៉ាគីស្ថាន បានរាយការណ៍ដល់រដ្ឋាភិបាលអំពី​លទ្ធភាពនៃការឆ្មក់វាយប្រហារពីឥណ្ឌា។ យ៉ាងណាមិញ លោក Asif មិនបាននិយាយលម្អិតបន្ថែមទៀតឡើយ អំពីមូលហេតុ​ដែលធ្វើឱ្យរូបលោកយល់ថា នឹងមានសកម្មភាពឆ្មក់លុកលុយពីឥណ្ឌា ក្នុងពេលឆាប់ៗ។

គួរបញ្ជាក់ថា ក្រោយការវាយប្រហារនៅ Kashmir ឥណ្ឌាបានកំណត់អត្តសញ្ញាណ ជនសកម្មប្រយុទ្ធ២នាក់ ជាជនជាតិប៉ាគីស្ថាន។ ទោះជាបែបនេះក្តី ទីក្រុងអ៉ីស្លាម៉ាបាដ បានបដិសេធការជាប់ពាក់ព័ន្ធ ហើយបានអំពាវនាវឱ្យមានការស៉ើបអង្កេតអព្យាក្រឹតមួយ ជុំវិញករណីនេះ។ ប៉ុន្មានថ្ងៃមកនេះ កងទ័ពប៉ាគីស្ថាននិងឥណ្ឌា បានបាញ់កាំភ្លើងតបតទៅមក នៅតាមបណ្តោយព្រំដែន។ ជាចុងក្រោយ លោក Asif បាននិយាយថា ប៉ាគីស្ថានកំពុងស្ថិតក្នុងការប្រុងជើងការខ្ពស់ ប៉ុន្តែនឹងប្រើប្រាស់អាវុធនុយក្លេអ៊ែរ លុះត្រាតែក្នុងករណីមានការគំរាមកំហែងដោយផ្ទាល់ ចំពោះអាយុជីវិតនៃប្រទេសជាតិរបស់ខ្លួនប៉ុណ្ណោះ៕