(កៀវ)៖ នៅថ្ងៃពុធ ទី២៨ ខែឧសភា ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី បានស្នើឱ្យមានកិច្ចប្រជុំកំពូលត្រីភាគី ជាមួយប្រធានាធិបតីរុស្ស៉ី លោក វ៉្លាឌីមៀ​ ពូទីន និងប្រធានាធិបតីអាមេរិក លោក ដូណាល់ ត្រាំ ខណៈដែលរូបលោកព្យាយាម​ស្វែងរកមធ្យោបាយ ដើម្បីបង្ខំឱ្យរុស្ស៉ីបញ្ចប់សង្រ្គាមឈ្លានពានរបស់ខ្លួន។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

កន្លងទៅក្នុងខែឧសភានេះ លោកប្រធានាធិបតីរុស្ស៉ី ធ្លាប់បានបដិសេធម្តងរួចទៅហើយ ចំពោះសំណើរបស់លោក ហ្សេលេនស្គី ដែលចង់ជួបមុខគ្នាផ្ទាល់ នៅឯប្រទេសតួកគីយ៉េ។ វិមានក្រឹមឡាំងធ្លាប់បាននិយាយថា ជំនួបរវាងមេដឹកនាំទាំងពីរ នឹងអាចកើតឡើងទៅបាន លុះត្រាតែមានកិច្ចព្រមព្រៀងណាមួយសិន។ ចំណែកលោក ត្រាំ វិញ បានបង្ហាញការធុញទ្រាន់​ទាំងចំពោះលោក ពូទីន និងលោក ហ្សេលេនស្គី ផងដែរ ដោយសារនៅតែមិនទាន់ឯកភាពគ្នា សម្រេចបានកិច្ចព្រមព្រៀង ដើម្បីបញ្ចប់សង្រ្គាម។

គួរបញ្ជាក់ថា ក្នុងការអត្ថាធិប្បាយទៅកាន់ក្រុមអ្នកកាសែត កាលពីថ្ងៃអង្គារ ដែលចេញផ្សាយនៅថ្ងៃពុធនេះ លោកប្រធានាធិបតីអ៊ុយក្រែន បានលើកឡើងយ៉ាងដូច្នេះថា «ប្រសិនបើលោក ពូទីន មិនចង់ជួបទ្វេភាគី ឬមួយប្រសិនបើគ្រប់គ្នា ចង់ឱ្យវាក្លាយជាជំនួបត្រីភាគី គឺខ្ញុំគ្មានបញ្ហាឡើយ។ ខ្ញុំត្រៀមខ្លួនជាស្រេច សម្រាប់ជំនួបក្នុងទម្រង់ណាក៏ដោយ»។ លោក ហ្សេលេនស្គី បាននិយាយថា លោកត្រៀមជានិច្ច សម្រាប់កិច្ចប្រជុំ ត្រាំ-ពូទីន-ហ្សេលេនស្គី៕