(អ៊ីស្តង់ប៊ុល)៖ ប្រធាន​គណៈប្រតិភូចរចារបស់រុស្ស៊ី លោក វ្ល៉ាឌីមៀ មេឌីនស្គី (Vladimir Medinsky) បានថ្លែងឲ្យដឹងថា ទីក្រុងមូស្គូ នឹងប្រគល់សាកសពទាហានអ៊ុយក្រែនចំនួន ៦,០០០នាក់ត្រឡប់ទៅឲ្យអ៊ុយក្រែនវិញ ហើយក៏បានស្នើឲ្យមានការប្រកាសបទឈប់បាញ់រយៈពេលពីរទៅបីថ្ងៃជាមួយអ៊ុយក្រែន នៅតំបន់មួយចំនួននៃជួរមុខ។ នេះបើយោងតាមការចេញផ្សាយទីភ្នាក់ងារសារព័ត៌មានស៊ីនហួរ។

សេចក្តីថ្លែងការណ៍នេះ ត្រូវបានធ្វើឡើងក្នុងអំឡុងពេលកិច្ចចរចាជុំទីពីររវាងគណៈប្រតិភូរុស្ស៊ី និងអ៊ុយក្រែន នៅទីក្រុងអ៊ីស្តង់ប៊ុលនៃប្រទេសតួកគីយ៉េ នៅថ្ងៃចន្ទ ទី០២ ខែមិថុនា ឆ្នាំ២០២៥។ លោក មេឌីនស្គី បានបញ្ជាក់ថា សំណើបទឈប់បាញ់រយៈពេលខ្លីនេះ គឺសម្រាប់អនុវត្តនៅ «តំបន់មួយចំនួននៃជួរមុខ» ប៉ុន្តែលោកមិនបានបញ្ជាក់លម្អិតពីទីតាំង ឬលក្ខខណ្ឌជាក់លាក់នោះទេ។

ទាក់ទងនឹងការប្រគល់សាកសពទាហាន លោក មេឌីនស្គី បានបញ្ជាក់ពីការសម្រេចចិត្តរបស់ទីក្រុងមូស្គូក្នុងការប្រគល់សាកសពទាហានអ៊ុយក្រែនចំនួន ៦,០០០នាក់ ដែលជាកាយវិការមួយអាចត្រូវបានគេមើលឃើញថា ជាវិធានការកសាងទំនុកចិត្ត។

កិច្ចចរចានៅទីក្រុងអ៊ីស្តង់ប៊ុលនេះ គឺជាជំនួបដោយផ្ទាល់លើកទីពីរក្នុងរយៈពេលប៉ុន្មានសប្តាហ៍ចុងក្រោយនេះ ដែលភាគីទាំងពីរកំពុងព្យាយាមពិភាក្សាលើសេចក្តីព្រាងកិច្ចព្រមព្រៀងសន្តិភាព និងលទ្ធភាពនៃបទឈប់បាញ់ ទោះបីជាកិច្ចចរចាលើកមុនមិនបានសម្រេចការព្រមព្រៀងលើបទឈប់បាញ់ទូទៅក៏ដោយ។

គួរបញ្ជាក់ថា មិនទាន់មានការឆ្លើយតបភ្លាមៗពីភាគីអ៊ុយក្រែនចំពោះសំណើបទឈប់បាញ់រយៈពេលខ្លី និងការប្រគល់សាកសពនេះនៅឡើយទេ។ លទ្ធផលនៃកិច្ចចរចាទាំងមូលនៅអ៊ីស្តង់ប៊ុល ក៏កំពុងត្រូវបានរង់ចាំផងដែរ៕