(ពិភពលោក)៖ មិននឹកស្មានសោះថា «សារាយ» ថ្វីដ្បិតតែជារុក្ខជាតិដ៏តូចក៏ពិតមែន ប៉ុន្តែវាបានផ្ដល់ប្រយោជន៍ច្រើនជាងរុក្ខជាតិធំៗដទៃទៀត ដោយបានផលិតអុកស៉ីហ្សែនយ៉ាងច្រើនជាងគេបំផុតបញ្ចេញមកឱ្យផែនដី ដើម្បីទ្រទ្រង់ជីវិតផ្សេងៗដែលរស់នៅលើផែនដី។
មិនត្រឹមតែប៉ុណ្ណោះ តាមការស្រាវជ្រាវរបស់អ្នកវិទ្យាសាស្ត្រនាយុគសម័យបច្ចុប្បន្ននេះក៏បានរកឃើញដែរថា សារាយក៏ជាអាហារដ៏ល្អបំផុតចំពោះសុខភាពមនុស្ស ដែលគេអាចយកមកផលិតជាឱសថកែរោគ ឬបំប៉នសុខភាពជាដើម។
តាមឯកសារដែល Fresh News Plus ស្រាវជ្រាវបានឱ្យដឹងថា សារាយ បានបញ្ចេញឧស្ម័នអុកស៉ីហ្សែន ដែលផលិតមកពីដំណើរការរស្មីសំយោគ។ អុកស៊ីហ្សែនទាំងអស់ដែលពួកវាបញ្ចេញមក មានបរិមាណច្រើនជាងអុកស៉ីហ្សែនរបស់ដើមឈើ និងរុក្ខជាតិនៅលើដីទាំងអស់បញ្ចេញរួមគ្នាទៅទៀត។
ឯកសារបានបន្តថា សារាយនៅក្នុងយុគដំបូង គឺជាធាតុផ្សំសំខាន់របស់ប្រេង និងឧស្ម័នដែលនៅក្រោមផ្ទៃផែនដី។ សារាយពណ៌បៃតងលាយពណ៌ប្រាក់ ឬហៅម្យ៉ាងទៀតថា ស្យាណូបាក់តេរី (Cyano) គឺជាធាតុផ្សំរបស់ភាវៈមានជីវិតដំបូងបំផុតនៅលើពិភពលោក ដែលត្រូវបានរកឃើញនៅក្នុងគ្រោងហ្វូស៊ីលមានអាយុប្រមាណ ៣,៦០០ លានឆ្នាំមុនមកម៉្លេះ។
ទោះជាសារាយប្រភេទខ្លះចាត់ចូលក្នុងប្រភេទដូមេនយូឃែរីអូតក៏ដោយ តែបច្ចុប្បន្នស្យាណូបាក់តេរីត្រូវបានគេអះអាងថា ស្ថិតក្នុងពិភពបាក់តេរីសុទ្ធសាធ គឺអម្បូរហ្វៃឡូម (Phylum) ជារបស់ខ្លួន។
រូបសណ្ឋានមួយរបស់ស្យាណូបាក់តេរី គឺសារាយស្ពីរ៉ូលីណា (Spirulina)។ បើប្រៀបធៀបគ្នាទៅតាមរង្វាស់ឯកតាអេគ័រ សារាយប្រភេទនេះផ្តល់ប្រូតេអ៉ីនច្រើនជាងសណ្ដែកសៀងដល់ទៅ ២០ ដង និងមានប្រូតេអ៉ីន ៧០% ខ្លាញ់ ៥% គ្មានជាតិកូលេស្តេរ៉ូល ពិសេសវាសម្បូរទៅដោយវីតាមីន និងសារធាតុរ៉ែជាច្រើនទៀត។ ហេតុនេះហើយទើបមនុស្សនិយមចូលចិត្តយកសារាយស្ដីរ៉ូលីណា មកកិនយកទឹកបរិភោគកាន់តែច្រើនជាបន្តបន្ទាប់។
លើសពីនេះ វានៅជួយបន្ថែមប្រព័ន្ធអង់ទីគ័រសម្រាប់ការពាររោគផងដែរ ជាពិសេសគឺវាផលិតប្រូតេអ៉ីនប្រឆាំងនឹងមេរោគ ដោយមានតួនាទីជាកំពែងដំបូងគេដែលការពាររាង្គកាយពីមេរោគ និងកោសិកាសាច់ដុះទាំងឡាយ។
ប្រភពដដែលបានបញ្ជាក់ទៀតថា រយៈពេលជាច្រើនរយឆ្នាំកន្លងមក កុលសម្ពន្ធអេស្ទិកនៅប្រទេសម៉ិចស៊ិកូ ក៏ដូចជាជនជាតិភាគតិចនៅតំបន់សមុទ្រខ្សាច់សាហារ៉ា ហើយសូម្បីតែសត្វក្រៀលសុទ្ធតែដឹងថា សារាយស្ពីរ៉ូលីណាមានគុណប្រយោជន៍ចំពោះសុខភាព។
សារប្រយោជន៍របស់សារាយស្ពីរ៉ូលីណា គឺវាដុះនៅលើដីមិនស្អាត ឬក្នុងទឹកកខ្វក់ (ទឹកដែលអាចយកប្រើប្រាស់សាជាថ្មីបាន)។ សារាយប្រភេទនេះជាដំណាំកសិកម្មដែលមិនកាត់ច្រោះដី មិនបាច់ប្រើជី ឬថ្នាំបាញ់សម្លាប់សត្វល្អិតនោះទេ ហើយទាំងជួយធ្វើឱ្យស្រទាប់បរិយាកាស មានសំណើមជាងភាវៈមានជីវិតផ្សេងទៀត៕
