(ពិភពលោក)៖ អូឡាំពិក គឺជាព្រឹត្តិការណ៍ប្រកួតកីឡាលក្ខណៈអន្តរជាតិ ដែលមានការចូលរួមពីសំណាក់អត្តពលិកមកពីគ្រប់ទិសទីជុំវិញពិភពលោក ហើយជាធម្មតាត្រូវប្រារព្ធឡើងរៀងរាល់៤ឆ្នាំម្តង។ អ្នកប្រហែលបានកត់សម្គាល់ឃើញហើយថា និមិត្តសញ្ញារបស់អូឡាំពិក គឺជាកងចំនួន៥ដែលនៅព័ន្ធជាប់គ្នា។

* តើនិមិត្តសញ្ញានេះមានន័យយ៉ាងណាដែរ?

និមិត្តសញ្ញាខាងលើត្រូវបានរចនាឡើងដោយអ្នកអប់រំ និងប្រវត្តិវិទូជនជាតិបារាំង គឺលោក ព្យែរ ដឺ គូប៊ែរតាំង (Pierre de Coubertin) ដែលជាសហស្ថានិកនៃគណៈកម្មាធិការអូឡាំពិកអន្តរជាតិ និងជាប្រធានទី២របស់ស្ថាប័ននេះ។ លោក គូប៊ែរតាំង ត្រូវគេស្គាល់ថាជាបិតានៃប្រភេទកីឡាអូឡាំពិកសម័យទំនើប។

កងទាំង៥របស់អូឡាំពិក តំណាងឲ្យទ្វីបទាំង៥ ដែលចូលរួមព្រឹត្តិការណ៍អូឡាំពិកនាពេលនោះ រួមមាន ទ្វីបអាហ្រ្វិក ទ្វីបអាស៉ី ទ្វីបអាមេរិក ទ្វីបអឺរ៉ុប និងទ្វីបអូសេអានី (អូស្រ្តាលី)។ ចំណែកពណ៌នីមួយៗនៃកងទាំង៥នោះ រួមមាន ពណ៌ខៀវ ពណ៌លឿង ពណ៌ខ្មៅ ពណ៌បៃតង និងពណ៌ក្រហម រួមជាមួយផ្ទៃពណ៌សនៃទង់អូឡាំពិក គឺតំណាងឲ្យពណ៌ដែលមាននៅតាមទង់ជាតិប្រទេសទាំងឡាយ គិតត្រឹមពេលដែលវាត្រូវបានបង្កើតឡើងជានិមិត្តសញ្ញាផ្លូវការរបស់អូឡាំពិកកាលពីឆ្នាំគ្រិស្ដសករាជ ១៩១៥៕