(ស្ទឹងត្រែង)៖ ក្រឡាន ជាអាហារម្យ៉ាងដែលប្រជាពលរដ្ឋខ្មែរចូលចិត្ត ដោយបានបន្សល់ទុកតាំងពីសម័យដូនតាមកម្ល៉េះ។ ការដុតក្រឡាន ក្លាយជាមុខរបរមួយដ៏ពេញនិយម សម្រាប់ប្រជាពលរដ្ឋនៅក្នុងខេត្តស្ទឹងត្រែង ហើយជួយឱ្យអ្នកប្រកបរបរនេះ រកប្រាក់ចំណូលបានគួរសមផងដែរ។
បច្ចុប្បន្នប្រជាពលរដ្ឋរស់នៅភូមិហាងខូបាន សង្កាត់សាមគ្គី ក្រុងស្ទឹងត្រែង ខេត្តស្ទឹងត្រែង នៅតែបន្តប្រពៃណីដុតក្រឡាន ដើម្បីប្រកបរបរចិញ្ចឹមជីវិត។
អ្នកស្រី ប៉ ហ្នេង អាយុ៣៥ឆ្នាំ បានឲ្យដឹងថា ក្រឡាន ត្រូវបានធ្វើឡើងដោយមានគ្រឿងផ្សំដូចជា ដើមឫស្សីខ្ចីសម្រាប់ធ្វើសំបក អង្ករដំណើប សណ្តែកអង្គុយ ខ្ទិះដូង និងអំបិល។ មុននឹងធ្វើក្រឡាន គេយកអង្ករដំណើបទៅលាង ហើយទុកឱ្យដាច់ទឹក រួចហើយយកមកលាយជាមួយសណ្ដែកអង្គុយ។
អ្នកស្រីរៀបរាប់បន្តថា ក្រោយមកទៀត គេយកអង្ករច្រកចូលក្នុងបំពង់ឫស្សី ដែលត្រូវបានកាត់ជាកំណាត់ ហើយច្រកទឹកខ្ទិះដូងក្នុងបំពង់ឫស្សី។ ចំណែកឯកាកដូង ដែលសល់ពីច្របាច់ខ្ទិះ ត្រូវយកមកបិទមាត់បំពង់ឫស្សី។ អ្នកស្រីអះអាងថា ការដុតក្រឡាននៅខេត្តស្ទឹងត្រែង ខុសពីខេត្តក្រចេះ កំពង់ចាម និងខេត្តដទៃទៀត។
កាលដើមឡើយអ្នកភូមិហាងខូបាននេះ មានប្រមាណ ២៨គ្រួសារ ដែលបានបង្កើតមុខរបរដុតក្រឡានលក់ដូចអ្នកស្រី ប៉ ហ្នេង។ មកដល់ពេលនេះ ពួកគេនៅតែបន្តប្រកបរបរនេះ ព្រោះវាជួយបង្កើនប្រាក់ចំណូល និងជួយលើកស្ទួយជីវភាពគ្រួសារពួកគេ ឱ្យកាន់តែធូរធាមួយកម្រិតទៀត។
អ្នកស្រី ប៉ ហ្នេង បានបន្តថា ជាមធ្យមក្នុងមួយថ្ងៃអ្នកស្រីលក់ក្រឡានបានពី ៨ ទៅ១០ ម៉ឺនរៀល។ ជាងនេះទៅទៀត មានពេលខ្លះ ក៏មានអាណិកជនខ្មែរមកពីក្រៅប្រទេស បានឱ្យគាត់ដុតក្រឡាន តាមដែលគេត្រូវការ ដើម្បីយកក្រឡានទៅចែកបងប្អូនពិសារ ដល់បណ្ដាប្រទេសផ្សេងៗ ព្រោះល្បីថាក្រឡាននៅភូមិនេះ មានរសជាតិឆ្ងាញ់។
សូមបញ្ជាក់ដែរថា ក្រឡាន ជាអាហារម៉្យាងមានរស់ជាតិឈ្ងុយឆ្ងាញ់ ដែលអាហានេះ គេបានយកអង្ករដំណើប លាយជាមួយសណ្ដែកអង្គុយ និងខ្ទិះដូង ថែមអំបិលបន្តិច រួចច្រកក្នុងបំពង់ឫស្សី មានប្រវែងប្រហែលជា ៣ ទៅ៤តឹក។ ពេលដុតគេដាក់បញ្ឈរ រួចដុតឱ្យឆ្អិនទើបទទួលទានបាន។
មន្ទីរទេសចរណ៍ខេត្តស្ទឹងត្រែង បានអំពាវនាវឱ្យប្រជាពលរដ្ឋក្នុងខេត្តនេះ បន្តប្រកបមុខរបរនេះទៀត ដើម្បីពង្រឹងវិស័យទេសចរណ៍ក្នុងតំបន់ ក៏ដូចជាការទាក់ទាញភ្ញៀវជាតិ និងបរទេស ឱ្យចូលមកទស្សនាភូមិឋានផង។ ជាពិសេស បានស្គាល់រសជាតិក្រឡាន ដែលជាអាហាររបស់ដូនតាខ្មែរផង៕
