(កណ្ដាល)៖ លោក ហេង រតនា ប្រតិភូរាជរដ្ឋាភិបាល ទទួលបន្ទុកជាអគ្គនាយកស៊ីម៉ាក់ និងជាប្រធានក្រុមការងារ រាជរដ្ឋាភិបាលជួយស្រុកលើកដែក ខេត្តកណ្តាល ព្រមជាមួយឧត្តមសេនីយ៍ទោ ចៅ សម្បតិ្ត ប្រធានក្រុមការងារឃុំ និងក្រុមការងារមន្ទីរពេទ្យ ១៧៩ នៅថ្ងៃទី២៨ ខែឧសភា ឆ្នាំ២០២០នេះ បានចុះជួប និងចែកអំណោយ ជូនដល់ប្រជាពលរដ្ឋក្រីក្រ ដែលរស់នៅឃុំកំពង់ភ្នំ ស្រុកលើកដែក ខេត្តកណ្តាល។
ក្នុងឱកាសនោះ លោក ហេង រតនា ក៏បានចុះពិនិត្យសកម្មភាព ការស្តារប្រព័ន្ធប្រឡាយ ដែលជាព្រែកដៃទន្លេ មានប្រវែងចំនួន២,៤០០ម៉ែត្រ សំរាប់បំរើប្រជាពលរដ្ឋ ចំនួន ១,០៤៧គ្រួសារ ដែលរស់នៅភូមិអំពិលទឹក ឃុំកំពង់ភ្នំ ជាអ្នកបានទទួលផលប្រយោជន៍ ដោយផ្ទាល់ពីការប្រើប្រាស់ទឹកនេះ ក្នុងការដាំដុះបន្លែ ផ្កា ដើម្បីកសាងសេដ្ឋកិច្ចគ្រួសាររបស់ពួកគាត់ផងដែរ។
ការចុះចែកអំណោយ និងចុះពិនិត្យសកម្មភាព ការស្តារប្រព័ន្ធប្រឡាយ របស់លោក ហេង រតនា ក្នុងនាមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី និងជារដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ព្រមទាំងជាប្រធានក្រុមការងាររាជរដ្ឋាភិបាល ចុះជួយខេត្តកណ្តាល និងលោកស្រីកិត្តិសង្ហបណ្ឌិត ឃួន សុដារី អនុប្រធានទី២រដ្ឋសភាជាតិ អនុប្រធានទី១ គណៈអចិន្រ្តៃយ៍ក្រុមការងារគណបក្ស ចុះមូលដ្ឋានខេត្តកណ្តាល។
ជាមួយគ្នានោះ លោក ហេង រតនា ប្រធានក្រុមការងារ រាជរដ្ឋាភិបាលជួយស្រុកលើកដែក ខេត្តកណ្តាល ក៏បានណែនាំដល់បងប្អូនប្រជាពលរដ្ឋ ត្រូវបន្ដរក្សាថែរក្សាអនាម័យ ដោយលាងដៃ ជាមួយនិងអាកុល និងសាប៊ូ ជាប់ប្រចាំ ដើម្បីទប់ស្កាត់ការរីករាលដាលជំងឺកូវីដ-១៩។
ប្រជាពលរដ្ឋ នៅក្នុងភូមិអំពិលទឹក ឃុំកំពង់ភ្នំ ស្រុកលើកដែក ខេត្តកណ្តាល ក៏បានសម្ដែងការអបអរសាទរ និងសូមអរគុណដល់ក្រុមការងារ ជាពិសេសសម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា ដែលតែងតែចុះជួយប្រជាពលរដ្ឋ។ ជាក់ស្ដែង ដូចជា ការស្តារប្រព័ន្ធប្រឡាយ ដើម្បីបម្រើប្រជាពលរដ្ឋជាដើម៕
