(ពោធិ៍សាត់)៖ ផ្សិតប៉ក់ ឬផ្សិតផូងផាំង គឺជាប្រភេទផ្សិតភ្នំម្យ៉ាង ដែលសំបូរនៅស្រុកពីរប៉ុណ្ណោះ គឺស្រុកភ្នំក្រវាញ និងស្រុកវាលវែង ហើយជាប្រភេទផ្សិតដែលលក់បានថ្លៃ និងមានរសជាតិឆ្ងាញ់ប្លែកខុសពីផ្សិតធម្មតា។ ជាធម្មតា បងប្អូនប្រជាពលរដ្ឋខ្មែរ និយមយកផ្សិតប៉ក់ ឬផ្សតិផូងផាំងនេះ មកស្ងោ ឬឆាក៏បានដោយវាមានរសជាតិឆ្ងាញ់ខុសប្លែកពីផ្សិតទូទៅ។
បើតាមការបញ្ជាក់របស់អាជ្ញាធរមូលដ្ឋាន បានឱ្យដឹងថា ផ្សិតប្រភេទនេះ កើតចេញពីផេះផង់ នៃភ្លើងឆេះព្រៃកន្លងមក លុះដើមរដូវវស្សានេះ ក៏កើតចេញជាផ្សិតនេះឡើងតែម្តង។ ផ្សិតប្រភេទនេះ គឺខុសពីផ្សិតធម្មតាត្រង់វាដុះនៅក្នុងដី ដែលមានរាងមូលដូចពងក្រួច ហើយគេអាចសម្គាល់បាន ដោយឃើញមានដីពើងប្រះឡើងលើ នៅតំបន់ដែលធ្លាប់មានភ្លើងឆេះព្រៃកន្លងមក។
ប្រជាពលរដ្ឋដែលមករកផ្សិតប៉ក់ ឬផ្សិតផូងផាំងនេះ បានធ្វើដំណើរមកពីគ្រប់ទិសទី ក្នុងស្រុកភ្នំក្រវាញ និងស្រុកវាលវែង។ ពួកគាត់បានវេចបាយម្ហូប ចេញទៅរកផ្សិតនេះតាំងពីព្រលឹម រហូតដល់ម៉ោង៣ ទៅម៉ោង៤ រសៀល ទើបពួកគាត់ត្រលប់ទៅផ្ទះវិញ។
អ្នករុករកផ្សិតម្នាក់បានឱ្យដឹងថា គាត់អាចរកចំណូលពីផ្សិតប៉ក់នេះ ក្នុងមួយថ្ងៃ ចាប់ពី១៥ ទៅ ៣៥ម៉ឺនរៀល ហើយថ្ងៃខ្លះលើសនេះក៏មាន ចំណែកតម្លៃលក់ឱ្យឈ្មួញកណ្តាល គឺចាប់ពី ៣៥,០០០រៀលឡើងទៅ ក្នុង១គីឡូក្រាម។ តែតម្លៃនេះទាបជាងឆ្នាំមុន ដោយឆ្នាំមុនៗ លក់បានរហូតដល់ ៥ម៉ឺនរៀលឡើង ក្នុង១គីឡូក្រាម។
ដោយឡែកក្រុមឈ្មួញកណ្តាល បានអះអាងថា ពួកគាត់ម្នាក់ៗ បានចំណាយលុយទិញផ្សិតប្រភេទនេះ ចាប់ពី ២០លានរៀល ទៅ៣០លានរៀល ក្នុងមួយថ្ងៃ អ្នកខ្លះទិញយកទៅលក់បន្តឱ្យម៉ូយ មកពីស្រុកភ្នំក្រវាញ អ្នកខ្លះទៀតទិញយកទៅលក់ផ្ទាល់នៅច្រកព្រំប្រទល់ ខ្មែរ-ថៃ ក្នុងខេត្តប៉ៃលិន បន្ទាយមានជ័យ ព្រះវិហារ ជាដើម។ ថៃគេត្រូវប៉ាន់ផ្សិតនេះខ្លាំងណាស់ មានប៉ុន្មានគេទទួលទិញយកទាំងអស់ ប៉ុន្តែពួកគាត់មិនបានដឹងថា គេយកទៅធ្វើជាអ្វីបន្តទៀតនោះទេ៕
