(ភ្នំពេញ)៖ ដោយសង្គេតឃើញថាកំណើនរបស់ប្រជាពលរដ្ឋ ដែលទៅទទួលសេវាផ្ទេរកម្មសិទ្ធិយានយន្តដែលរកម្ចាស់ដើមមិនឃើញ មានការកើនឡើងជាបន្តបន្ទាប់ពីមួយ ថ្ងៃទៅមួយថ្ងៃ និងដោយឃើញមានការភ្ញាក់រលឹក ក្នុងការអនុវត្តការតព្វកិច្ចរបស់ប្រជាពលរដ្ឋ ក្រសួងសាធារណការ និងដឹកជញ្ជូន បានសម្រេចបន្តអនុវត្តការផ្ទេរកម្មសិទ្ធ យានយន្តដែលរកម្ចាស់ដើមមិនឃើញរហូតដល់ថ្ងៃទី៣០ ខែកញ្ញា ឆ្នាំ២០២០។

សេចក្តីជូនដំណឹងរបស់ក្រសួងសាធារណការ និងដឹកជញ្ជូន ដែលសារព័ត៌មាន Fresh News ទទួលបាននៅព្រឹកថ្ងៃទី០២ ខែកក្កដា ឆ្នាំ២០២០នេះ បានឱ្យដឹងទៀតថា ក្រសួងសង្ឃឹមយ៉ាងមុតមាំថា សាធារណជន និងបងបង្អូនប្រជាពលរដ្ឋ ជាពិសេសម្ចាស់យានយន្តដែលកំពុងកាន់កាប់យានយន្តជាក់ស្តែង ហើយមានបំណង ផ្ទេរសិទ្ធដែលរកម្ចាស់ដើមមិនឃើញ មេត្តារួសរាន់មកបំពេញបែបបទស្នើសុំផ្ទេរកម្មសិទ្ធិយានយន្តឱ្យបានទាន់ពេលវេលា។

សូមបញ្ជាក់ថា ចំពោះអ្នកដែលកំពុងកាន់កាប់យានយន្តដែលទិញលក់តៗគ្នា រកម្ចាស់ដែលមិនឃើញ ដែលមានបំណងផ្ទេរកម្មសិទ្ធិយានយន្ត ត្រូវដាក់ពាក្យសុំផ្ទេរកម្មសិទ្ធិយានយន្ត ដោយភ្ជាប់នូវសំណុំឯកសារដូចខាងក្រោម៖

* ទី១៖ ពាក្យសុំផ្ទេរកម្មសិទ្ធិយានជំនិះ មានផ្តិតមេដៃអ្នកស្នើសុំ និងមានបិទសំណៅលេខកាល់( តួ ឫសាក់ស៊ី) ដែលចម្លងដាក់ជាក់ស្ដែងពីយានយន្ត

* ទី២៖ ប័ណ្ណសម្គាល់ (ច្បាប់ដើម) និងស្លាកលេខសម្គាល់យានជំនិះ (ករណីផ្ទេរកម្មសិទ្ធិឆ្លងរាជធានី ខេត្ត)

* ទី៣៖ វិញ្ញាបនបត្រត្រួតពិនិត្យលក្ខណៈបច្ចេកទេសយានជំនិះ

* ទី៤៖ អត្តសញ្ញាណអ្នកលក់ និងអ្នកទិញ ពលរដ្ឋខ្មែរត្រូវមាន អត្តសញ្ញាណបណ្ណសញ្ជាត្តិខ្មែរ ច្បាប់ចម្លងដែលមានបញ្ជាក់ពីអាជ្ញាធរមានសមត្ថកិច្ច, ជនបរទេសត្រូវ លិខិតឆ្លងដែន និងទិដ្ឋការមានសុពលភាព និងលិខិតបញ្ជាក់ទីលំនៅចេញដោយអាជ្ញាធរមានសមត្ថកិច្ច

* ទី៥៖ បង្កាន់ដៃពន្ធប្រថាប់ត្រា លើការផ្ទេរកម្មសិទ្ធិយានយន្ត

* ទី៦៖ លិខិតលក់ទិញ

* ទី៧៖ កិច្ចសន្យាធានា ដែលបញ្ជាក់ពីប៉ុស្តិ៍នគរបាលរដ្ឋបាល៕

ខាងក្រោមនេះជាសេចក្តីណែនាំរបស់ក្រសួងសាធារណការ និងដឹកជញ្ជូន៖