(ភ្នំពេញ)៖ វិស្វករជាស្ពានសម្រាប់តភ្ជាប់បច្ចេកវិទ្យា វិទ្យាសាស្ត្រ នវានុវត្តន៍ ដោយផ្សារភ្ជាប់ទៅនឹងការអភិវឌ្ឍជីវភាពសង្គម និងតម្លៃវប្បធម៌ នេះជាប្រសាសន៍លើកឡើងរបស់លោក អ៉ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ ថ្លែងក្នុងពិធីបើកកិច្ចប្រជុំពាក់កណ្តាលអាណត្តិក្រុមប្រឹក្សាភិបាលនៃអង្គការសហព័ន្ធវិស្វកម្មអាស៊ាន (AFEO) លើកទី១៩ និងការប្រកាសចាប់ផ្តើមប្រមូលមូលនិធិសម្រាប់ពានរង្វាន់យុវវិស្វករឆ្នើមរបស់ (AFEO) តាមរយៈ Video Conference ពីទីស្តីការក្រសួងការងារ នាព្រឹកថ្ងៃទី២៧ ខែសីហា ឆ្នាំ២០២០នេះ។
ក្នុងន័យនេះ វិស្វករត្រូវតែចូលរួមយ៉ាងសកម្មក្នុងការផ្លាស់ប្ដូរយោបល់ និងបទពិសោធន៍ជាមួយវិស្វករដទៃទៀត ជាពិសេសវិស្វករអាស៊ាន និងវិស្វករពិភពលោក ដើម្បីបង្កើនសមត្ថភាពយល់ដឹងរបស់ខ្លួនទាំងទ្រឹស្ដី និងការអនុវត្ត។
លោក អ៉ិត សំហេង បានស្នើដល់អង្គការសហព័ន្ធវិស្វកម្មអាស៊ានបន្តវប្បធម៌ចែករំលែកបទពិសោធន៍ដ៏ប្រពៃនេះ ដើម្បីជំរុញឱ្យវិស្វករនៅក្នុងតំបន់មានសមត្ថភាពទៅតាមស្ដង់ដារអន្តរជាតិ និងអាចដើរទាន់ការអភិវឌ្ឍផ្នែកវិទ្យាសាស្ត្រនៃបណ្ដាប្រទេសជឿនលឿនក្នុងសកលលោក ជំរុញការអភិវឌ្ឍសេដ្ឋកិច្ចជាតិ និងគោលនយោបាយបច្ចេកវិទ្យា ដើម្បីការអភិវឌ្ឍឱ្យបានប្រសើរឡើងប្រកបទៅដោយចីរភាព ព្រមទាំងអនុវត្តចំណេះដឹងវិស្វកម្ម ដោយយោងតាមគុណតម្លៃសកល និងក្រមសីលធម៌វិជ្ជាជីវៈវិស្វកម្ម ជំរុញញឱ្យមានស្តង់ដារនៃការអប់រំវិស្វកម្ម ការលើកកម្ពស់តួនាទីវិស្វករស្រ្ដីនៅក្នុងការអភិវឌ្ឍជាតិ និងតម្រូវការជាបន្តបន្ទាប់នូវការកសាងសមត្ថភាពសម្រាប់វិស្វករវ័យក្មេងជាការចាំបាច់ ដែលត្រូវតែពង្រឹង និងធ្វើឱ្យបានប្រសើរឡើង។
ក្នុងនាមជាប្រធានក្រុមប្រឹក្សានៃគណៈវិស្វករកម្ពុជា លោករដ្ឋមន្ត្រីក៏បានលើកទឹកចិត្តដល់យុវវិស្វករអាស៊ានអំពីការគិតគូរដល់ការបង្កើតសហគ្រិនភាព ការផ្តល់បរិយាកាសឱ្យបានសមស្របដើម្បីអត្ថប្រយោជន៍ វិបុលភាពសេដ្ឋកិច្ច និងសង្គម និងគាំទ្រចំពោះការខិតខំប្រឹងប្រែងរបស់យុវវិស្វករដែលមានស្នាដៃឆ្នើម ដើម្បីទទួលបានវិញ្ញាបនបត្រ និងមេដាយកិត្តិយសសម្រាប់ការប្រកួតប្រជែងប្រចាំឆ្នាំរបស់យុវវិស្វករអាស៊ាន។
លោក អ៉ិត សំហេង បានគាំទ្រនូវសំណើផ្តល់រង្វាន់លើកទឹកចិត្តនូវពានរង្វាន់ និងវិញ្ញាបនបត្រដល់យុវវិស្វករដែលមានស្នាដៃឆ្នើម ១រូប ក្នុងមួយឆ្នាំ សម្រាប់បណ្តាប្រទេសជាសមាជិកអាស៊ាននីមួយៗ និងក្នុងនាមជាប្រធានក្រុមប្រឹក្សាគណៈវិស្វករកម្ពុជា លោកបានឧបត្ថម្ភថវិកាចូលមូលនិធិសម្រាប់ពានរង្វាន់យុវវិស្វករឆ្នើមរបស់ AFEO ចំនួន ៥,០០០ដុល្លារ ក្រោមការចាត់ចែង និងគ្រប់គ្រងរបស់គណៈកម្មាធិការនៃអគ្គលេខាធិការដ្ឋាន AFEO និងលោកបានអំពាវនាវឱ្យប្រទេសជាសមាជិកនៃអង្គការ AFEO ទាំងអស់ជួយឧបត្ថម្ភថវិកាបន្ថែមទៀតដល់មូលនិធិសម្រាប់ពានរង្វាន់យុវវិស្វករឆ្នើមរបស់ AFEO ដើម្បីជួយគាំទ្រដល់សកម្មភាពយុវវិស្វករអាស៊ានដែលមានស្នាដៃឆ្នើម ក៏ដូចជាការលើកទឹកចិត្តដល់កិច្ចខិតខំប្រឹងប្រែងរបស់យុវវិស្វករអាស៊ាន ដែលជាសសរទ្រូងដ៏រឹងមាំរបស់ប្រទេសជាតិនាពេលអនាគត។
លោកបានសំណូមពរឱ្យបណ្តាប្រទេសជាសមាជិកអាស៊ានទាំងអស់ ជួយជំរុញលើការរៀបចំកម្មវិធីសិក្សាវិស្វកម្ម និងការទទួលស្គាល់គុណភាពអប់រំវិស្វកម្ម ឱ្យមានស្តង់ដារប្រហាក់ប្រហែលគ្នាមួយ ដើម្បីឱ្យវិស្វករដែលបញ្ចប់ការសិក្សាពីមហាវិទ្យាល័យ នៃប្រទេសក្នុងតំបន់ មានការទទួលស្គាល់គ្នាទៅវិញទៅមក ស្របទៅនឹងកិច្ចព្រមព្រៀងទទួលស្គាល់គ្នាទៅវិញទៅមកស្តីពីសេវាវិស្វកម្ម ដែលបានចុះហត្ថលេខាជាមួយគ្នាកាលពីថ្ងៃទី០៩ ខែធ្នូ ឆ្នាំ២០០៥ នៅ ទីក្រុងកូឡាឡាំពួរ ប្រទេសម៉ាឡេស៊ី។
សូមបញ្ជាក់ថា គណៈវិស្វករកម្ពុជា ជាអាជ្ញាធរវិស្វកម្មជាតិដែលមានកិច្ចសហប្រតិបត្តិការជាមួយនឹងអង្គការ AFEO និងគណៈកម្មាធិការសម្របសម្រួលវិស្វករអាជីពឆ្នើមអាស៊ាន (ACPECC)។ កន្លងមក កម្ពុជាធ្លាប់បានធ្វើជាម្ចាស់ផ្ទះរៀបចំសន្និសីទនៃអង្គការសហព័ន្ធវិស្វកម្មអាស៊ានចំនួន ២លើក រួចមកហើយ៖ លើកទី១ CAFEO-20 ដែលប្រារព្ធធ្វើឡើងនៅថ្ងៃទី០២-០៤ ខែកញ្ញា ឆ្នាំ២០០២ ក្រោមប្រធានបទ «វិស្វកម្មសម្រាប់ការកាត់បន្ថយភាពក្រីក្រនៅក្នុងប្រទេសជាសមាជិកអាស៊ាន»។ លើកទី២ CAFEO-30 ដែលប្រារព្ធធ្វើឡើងនៅថ្ងៃទី១៦-១៩ ខែធ្នូ ឆ្នាំ២០១២ ក្រោមប្រធានបទស្តីពីអត្ថប្រយោជន៍នៃសមាហរណកម្មសេវាវិស្វកម្ម សម្រាប់បណ្តាប្រទេសជាសមាជិកអាស៊ាន ដែលមានការអភិវឌ្ឍតិចតួច។
សន្និសីទទាំងពីរលើកកន្លងមក និងកិច្ចប្រជុំក្នុងថ្ងៃនេះ គឺជាព្រឹត្តិការណ៍ដ៏មានសារៈសំខាន់ដែលចូលរួមពន្លឿនការអភិវឌ្ឍប្រកបដោយចីរភាព មានចក្ខុវិស័យឆ្ពោះទៅតាមផែនការសហគមន៍សេដ្ឋកិច្ចអាស៊ានឆ្នាំ២០២៥ (ASEAN ECONOMIC COMMUNITY BLUEPRINT 2025) និងជាចក្ខុវិស័យដើម្បីបង្កើតឱ្យមានការយល់ដឹងលក្ខណៈស៊ីជម្រៅ អំពីអត្ថប្រយោជន៍នៃការធ្វើសមាហរណកម្មសម្រាប់បណ្តាប្រទេសជាសមាជិកអាស៊ាន៕
