(ពោធិ៍សាត់)៖ លោក យ៉ុម សុផៃ ជាអតីតយុទ្ធជនមួយរូប ក្នុងចំណោមអតីតយុទ្ធប្រមាណ ៦២៨រូបផ្សេងទៀត ដែលទទួលបានដី និងផ្ទះ នៅក្នុងភូមិរ៉ានីសែនជ័យដំណាក់ត្រយឹង ឃុំព្រងិល ស្រុកភ្នំក្រវាញ ខេត្តពោធិ៍សាត់ ពីសម្តេចតេជោ ហ៊ុន សែន នាយករដ្ឋមន្ត្រីកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហម។
អតីតយុទ្ធជនដែលបានតស៊ូបម្រើជាតិប្រឆាំងរបបខ្មែរក្រហមនាឆ្នាំ១៩៧៨រូបនេះ បានបង្ហាញក្តីរំភើបរហូតដល់ស្រក់ទឹកភ្នែក ពេលរូបលោកទទួលបានក្តីសណ្តោសពីសម្តេចតេជោ និងសម្តេចកិត្តិព្រឹទ្ធបណ្ឌិត។ លោកថា លោកមិនដែលនឹកស្មានថា ទទួលបានក្តីសណ្តោសបែបនេះនោះឡើយ។
លោក យ៉ុម សុផៃ អាយុ ៦៧ឆ្នាំ ជាអតីតយោធាមួយរូបក្នុងរបបសាធារណរដ្ឋរបស់សេនាប្រមុខ លន់ នល់។ លុះដល់របបប្រល័យពូជសាសន៍ ក្តីឈឺចាប់ដែលឃើញការកាប់សម្លាប់ប្រជាពលរដ្ឋខ្មែរ និងសាច់ញាតិរបស់លោកពីសំណាក់របបខ្មែរក្រហមនោះ លោក យ៉ុម សុផៃ ក៏សម្រេចចិត្តរត់ភៀសខ្លួនពីស្រុកកោះធំ ខេត្តកណ្តាល ទៅកាន់ខេត្តពោធិ៍សាត់ ហើយចូលរួមក្នុងចលនារំដោះជាតិពីរបបប្រល័យពូជសាសន៍ ប៉ុល ពត ក្នុងឆ្នាំ១៩៧៨។
ក្រោយប្រទេសជាតិទទួលបានសុខសន្តិភាពទាំងស្រុងនៅឆ្នាំ១៩៩៨ លោក ក៏បានរំសាយមករស់នៅក្នុងជីវភាពសាមញ្ញធម្មតា។ ក្នុងរយៈពេលជាង ២០ឆ្នាំក្រោយកម្ពុជាបិទបញ្ចប់ភ្លើងសង្គ្រាម និងមានការរីកចម្រើនលូតលាស់យ៉ាងណាក្តី តែស្ថានភាពជីវភាពរបស់លោក យ៉ុម សុផៃ មិនខុសពីអតីតយុទ្ធជនមួយចំនួនទៀតនោះដែរ គឺស្ថិតនៅក្នុងស្ថានភាពមិនសូវជាប្រសើរនោះឡើយ។
បើទោះបីជាយ៉ាងណា លោក យ៉ុម សុផៃ ក៏ដូចជាអតីតយុទ្ធជនដទៃទៀត មិនត្រូវបានទុកចោលនោះឡើយ ហើយទទួលបានការយកចិត្តទុកដាក់ខ្ពស់ពីសម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន។
លោក យ៉ុម សុផៃ ក៏ជាអតីតយុទ្ធជនមួយ ដែលត្រូវបានសមាគមអតីតយុទ្ធជនកម្ពុជា សម្រេចជ្រើសរើសឱ្យទទួលបានដី និងផ្ទះ ដែលជាអំណោយរបស់សម្តេចតេជោ និងសម្តេចកិត្តិព្រឹទ្ធបណ្ឌិត នៅក្នុងភូមិរ៉ានីសែនជ័យដំណាក់ត្រយឹង ឃុំព្រងិល ស្រុកភ្នំក្រវាញ ខេត្តពោធិ៍សាត់ ដើម្បីបង្កបង្កើនផល និងស្នាក់អាស្រ័យ។
លោក សុផៃ បានបញ្ជាក់ប្រាប់ Fresh News យ៉ាងដូច្នេះ «មកនៅកន្លែងនេះ រដ្ឋបាលប្រគល់ផ្ទះ ធ្វើអណ្តូងទឹក ហើយនឹងបន្ទប់អនាម័យ និងបានដំណាំអី ដីធ្លីអីហ្នឹង និងគ្រាប់បន្លែគ្រាប់អី ដើម្បីឱ្យខ្ញុំដាំ»។
អតីតយុទ្ធជនរូបនេះ បានលើកឡើងថា លោកមិនដែលនឹកគិត ឬរំពឹងថា នឹងទទួលបានការផ្តល់ជូនដី និងផ្ទះ ពីសម្តេចតេជោ និងសម្តេចកិត្តិព្រឹទ្ធបណ្ឌិតបែបនេះទេ។ លោក សុផៃ បានសម្រក់ទឹកភ្នែកពេលនិយាយដល់ការទទួលបាននូវអំណោយ ដែលជាគុណបំណាចរបស់សម្តេចតេជោ និងសម្តេចកិត្តិព្រឹទ្ធបណ្ឌិតបែបនេះ។
លោក សុផៃ បាននិយាយទាំងអួលដើម-ក និងស្រក់ទឹកភ្នែកបែបនេះថា «ខ្ញុំតស៊ូរំដោះជាតិតាំងពីឆ្នាំ៧៨ រហូតមកដល់ពេលនេះ។ ពេលនេះហើយ ដែលខ្ញុំទន្ទឹងរង់ចាំ រដ្ឋាភិបាល និងគណបក្សប្រជាជន ក៏ដូចជាសម្តេច ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន គាត់យកចិត្តទុកដាក់។ ខ្ញុំអរគុណណាស់ ខ្ញុំរង់ចាំថ្ងៃនេះយូរណាស់មកហើយ។ ខ្ញុំមិនដែលនឹកស្មានថា ជីវិតខ្ញុំបានទទួលផ្ទះនេះទេ ដីនេះទេ ខ្ញុំគិតមិនដល់ [យំ]។ ខ្ញុំអរគុណជាតិ ដែលជួយខ្ញុំ»។
ផ្ទះ និងដីដែលសម្តេចតេជោ និងសម្តេចកិត្តិព្រឹទ្ធបណ្ឌិត ផ្តល់ជូននេះ គឺជាសម្បត្តិដ៏មានតម្លៃសម្រាប់ជីវិតរបស់អតីតយុទ្ធជនរូបនេះ។ លោក សុផៃ បានលើកឡើងថា លោកហាមផ្តាច់មិនឱ្យកូនចៅលក់នោះឡើយ បើទោះបីអត់ពីលោកទៅ ព្រោះនេះជាសម្បត្តិដ៏មានតម្លៃបំផុតសម្រាប់ជីវិត ជាសម្បត្តិបានពីការតស៊ូរបស់លោកចំពោះបុព្វហេតុជាតិ។
លោក សុផៃ បានរៀបរាប់ទាំងអួលដើម-ក យ៉ាងដូច្នេះ «ខ្ញុំសប្បាយចិត្តណាស់ ហើយខ្ញុំហាមផ្តាច់កូនចៅខ្ញុំថា មិនឱ្យលក់ផ្ទះនេះជាដាច់ខាត។ ទោះបីខ្ញុំស្លាប់ ក៏ខ្ញុំមិនឱ្យ ក្រយ៉ាងណា គឺទុកផ្ទះនេះតកូនតចៅពួកឯង នេះមួយជីវិតប៉ាបានប៉ុណ្ណេះ។ ខ្ញុំសូមអរគុណចំពោះរដ្ឋាភិបាល ចំពោះគណបក្សប្រជាជន ចំពោះសម្តេច ហ៊ុន សែន ក៏ដូចជាសម្តេចកិត្តិព្រឹទ្ធបណ្ឌិត ឯកឧត្តម គន់ គីម ឯកឧត្តម ម៉ៅ ធនិន្ទ ដែលបានយកចិត្តទុកដាក់មកលើខ្ញុំ»។
សូមបញ្ជាក់ថា សម្តេចតេជោ ហ៊ុន សែន បានសម្រេចកាត់ដីទំហំជាង ៩០០ហិកតា នៅក្នុងភូមិរ៉ានីសែនជ័យដំណាក់ត្រយឹង ឃុំព្រងិល ស្រុកភ្នំក្រវាញ ខេត្តពោធិ៍សាត់ ចែកជូនដល់អតីតយុទ្ធជនប្រមាណ ៦២៨គ្រួសារ សម្រាប់រស់នៅ និងបង្កបង្កើនផល។ ជាមួយគ្នានេះ នៅជំហ៊ានដំបូងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន បានសម្រេចផ្តល់ថវិកាប្រមាណ ៥០ម៉ឺនដុល្លារ ស្មើនឹង ១៥០ខ្នងផ្ទះ សម្រាប់សាងសង់ផ្ទះជូនដល់អតីតយុទ្ធជនក្នុងខេត្តពោធិ៍សាត់។
ផ្ទះប្រមាណជា ៦០ខ្នង ត្រូវបានសាងសង់រួចរាល់ ហើយអាជ្ញាធរបាននិងកំពុងជួយរៀបចំផ្លូវ ជីកអណ្តូងទឹក និងដាំដុះឈើហូបផ្លែដូចជាស្វាយ ដូង កូចជាដើម។ បច្ចុប្បន្ននេះ អតីតយុទ្ធជនមួយចំនួនបានចូលមករស់នៅលើទីតាំងដី និងផ្ទះនេះហើយ ជាមួយក្តីរំពឹងនៃការកសាងជីវិតថ្មីឱ្យបានប្រសើរ៕
v
