(ក្រចេះ)៖ លោក វ៉ា ថន អភិបាលខេត្តក្រចេះ និងជាប្រធានគណៈកម្មាធិការគណបក្សប្រជាជនកម្ពុជាខេត្តក្រចេះ រួមក្រុមការងារគណបក្ស នៅថ្ងៃទី៣០ ខែឧសភា ឆ្នាំ២០២១នេះ បានប្រគល់ផ្ទះ១ខ្នង ជូនស្រី្តមេម៉ាយទុរគតម្នាក់ឈ្មោះ ទន់ សំអាត មានអាយុ៦៣ឆ្នាំ ជាប់បន្ទុកចិញ្ចឹមចៅចំនួន ០៧ នាក់ និងជួបសំណោះសំណាលចែកអំណោយរួមថវិការដល់ជនចាស់ជរា ចំនួន ១០ នាក់ទៀត ស្ថិតនៅឃុំថ្មក្រែ ស្រុកចិត្របុរី។
ក្នុងឱកាសនោះ លោក វ៉ា ថន បាននាំការផ្ដាំផ្ញើរសួរសុខទុក្ខ ដោយក្តីនឹករលឹក ពីសំណាក់សម្តេចតេជោ ហ៊ុន សែន ជូនចំពោះប្រជាពលរដ្ឋទទួលផ្ទះនាពេលនេះ និងប្រជាពលរដ្ឋទូទាំងក្នុងខេត្តក្រចេះ ដោយជានិច្ចកាលថ្នាក់ដឹកនាំគណបក្សប្រជាជនកម្ពុជា គ្រប់លំដាប់ថ្នាក់ តែងតែគិតគូយកចិត្តទុកដាក់ពីជីវភាពរស់នៅរបស់ប្រជាពលរដ្ឋ និងរួមសុខរួមទុក្ខជាមួយប្រជាពលរដ្ឋនៅគ្រប់កាលៈទេសៈ។
ជាក់ស្តែងក្នុងសម័យកូវីដ-១៩ រាលត្បាតជាសកលបានធ្វើឲ្យប៉ះពាល់ដល់សេដ្ឋកិច្ច និងជីវភាពប្រជាពលរដ្ឋ គណបក្សបានយកចិត្តតុកដាក់គិតគូរពីសុខទុក្ខបងប្អូនប្រជាពលរដ្ឋ ដោយបានផ្តល់អំណោយជាស្បៀងអាហារ សម្ភារៈ និងថវិការមួយចំនួនដើម្បីជួយសម្រួលដល់ជីវភាព និងទប់ស្កាត់ការពារពីការឆ្លងរាលដាលនៃជំងឺកូវីដ-១៩នេះ។ លោកនៅតែបន្តផ្តាំផ្ញើរឲ្យប្រជាពលរដ្ឋទាំងអស់ ត្រូវរស់នៅឲ្យមានការប្រុងប្រយត្ន័ប្រកបដោយការការពារអនាម័យជាប់ជាប្រចាំ។
សូមបញ្ជាក់ដែរថា ផ្ទះ១ខ្នងដែលផ្តល់ជូនស្រ្តីមេម៉ាយឈ្មោះ ទន់ សំអាត អាយុ៦៣ឆ្នាំនាពេលនេះ ចំណាយថវិការអស់ប្រមាណជាង ១៣លានរៀល ក្នុងនោះថវិការរបស់លោក វ៉ា ថន និងលោកស្រីរួមនិងក្រុមការងារគណបក្សប្រជាជនកម្ពុជាខេត្ត ចំនួន ១.៤៥០ ដុល្លារ ថវិការព្រះមន្រ្តីសង្ឃសាលាគណស្រុកចិត្របុរី និងវត្តថ្មគ្រែ ចំនួន ២.៦៥០.០០០ ម៉ឺលរៀល និងថវិការសប្បុរសជនមិត្តសិង្ហបុរី ចំនួន ៥០០ ដុល្លារ។
សម្រាប់ម្ចាស់ផ្ទះ ទទួលបានអំណោយមាន និង សម្ភារៈផ្ទះបាយ១សម្រាប់ រួមថវិកា ២០ម៉ឺនរៀល និងលោកយាយចាស់ជរា ១០ នាក់ទទួលបានអំណោយ និងថវិការចំនួន ៥ ម៉ឺនរៀលផងដែរ៕
