(ភ្នំពេញ)៖ អគ្គិភ័យបានឆាបឆេះរោងចក្រមួយកន្លែង បានបង្កឲ្យមានការភ្ញាក់ផ្អើលដល់ប្រជាពលរដ្ឋ និងសមត្ថកិច្ចហៅរថយន្តពន្លត់អគ្គិភ័យចេញជួយអន្តរាគមន៍បាញ់ទឹកពន្លត់។ ហេតុការណ៍នេះបានកើតឡើងនៅវេលាម៉ោង១២៖១០នាទីយប់រំលងអាធ្រាត ថ្ងៃទី២៥ ខែតុលា ឆ្នាំ២០២៤ ស្ថិតចំណុចរោងចក្រ ជិន យូហ្វេង ភែកឃីង ខាថិន ឯ.ក ផលិតក្រដាសកាតុង ផ្លូវបេតុង ភូមិស្រែកជំរៅ សង្កាត់ចោមចៅទី០២ ខណ្ឌពោធិ៍សែនជ័យ រាជធានីភ្នំពេញ។
លោកវរសេនីយ៍ឯក ព្រហ្ម យ៉ន នាយការិយាល័យនគរបាលបង្ការពន្លត់អគ្គិភ័យ និងសង្គ្រោះ នៃស្នងការដ្ឋាននគរបាលរាជធានីភ្នំពេញ បានប្រាប់ឲ្យបណ្តាញព័ត៌មាន Fresh News ដឹងថា ដោយមានការអនុវត្តតាមបទបញ្ជារបស់លោកឧត្តមសេនីយ៍ឯក ជួន ណារិន្ទ អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ បានណែនាំដល់កម្លាំងជំនាញការិយាល័យនគរបាលបង្ការពន្លត់អគ្គិភ័យ និងសង្គ្រោះ ត្រូវធ្វើការយកចិត្តទុកដាក់ខ្ពស់នៅក្នុងប្រតិបត្តិការជួយសង្គ្រោះប្រជាពលរដ្ឋឲ្យបានទាន់ពេលវេលា។
លោកវរសេនីយ៍ឯក ព្រហ្ម យ៉ន បានដឹកនាំបញ្ជាផ្ទាល់ដល់កងកម្លាំងពន្លត់អគ្គិភ័យដែលប្រចាំការនៅគ្រប់បណ្តាលគោលដៅទាំងអស់ ឲ្យចេញជួយអន្តរាគមន៍បាញ់ទឹកពន្លត់ឲ្យទាន់ពេលវេលា កុំឲ្យមានការឆាបឆេះបន្តដល់ផ្ទះប្រជាពលរដ្ឋដែលនៅក្បែរនោះ។
ដោយនៅក្នុងប្រតិបត្តិការខាងលើនេះ កម្លាំងសមត្ថកិច្ចជំនាញ បានប្រើប្រាស់រថយន្តពន្លត់អគ្គិភ័យចំនួន២៨គ្រឿង ក្នុងនោះរួមមាន រថយន្តពន្លត់អគ្គិភ័យរបស់ការិយាល័យរាជធានីភ្នំពេញ ចំនួន២១គ្រឿង ប្រើប្រាស់ទឹកអស់១៨០ឡាន ស្មើរនឹង៧២០ម៉ែត្រគូប, រថយន្តជំនួយមកពីកងពលតូច ង៧០ ចំនួន០៦គ្រឿង ប្រេីប្រាស់ទឹកអស់២៤ឡាន ស្មេីរនឹង៩៦ម៉ែត្រគូប និងរថយន្តរបស់ក្រុមហ៊ុនស្រាបៀរកម្ពុជា ចំនួន០១គ្រឿង ប្រេីប្រាស់ទឹកអស់០២ឡាន ស្មេីរនឹង១២ម៉ែត្រគូប។
ដោយឡែកចំពោះប្រភេទសំណង់ខាងលើនេះ គឺដែកប្រក់ស័ង្កសី ទំហំ (៤០ម៉ែត្រ x ៨៦ម៉ែត្រ) ឆេះរោងចក្រក្រដាសកាតុង ទំហំ (៤០ម៉ែត្រ × ៨៦ម៉ែត្រ) ចំនួន០១រោងចក្រ រួមទាំងសម្ភារៈអស់ទាំងស្រុង នឹងបានឆេះរាលដាលដល់រោងចក្រកាត់ដេរ ទំហំ (៤០ម៉ែត្រ x ៨៦ម៉ែត្រ) ចំនួន ០១រោងចក្រ ខូចខាតអស់ប្រហែល ៤០ភាគរយ និងសម្ភារៈខូចខាតអស់ ៧០ភាគរយ។ ចំពោះគ្រោះអគ្គិភ័យខាងលើនេះ ត្រូវបានកម្លាំងសមត្ថកិច្ចជំនាញ ធ្វើការបាញ់ឲ្យរលត់ទៅវិញ នៅវេលាម៉ោង១១៖០០នាទីព្រឹកនាថ្ងៃដដែល។
លោកវរសេនីយ៍ឯក ព្រហ្ម យ៉ន បានបញ្ជាក់ថា ចំពោះហេតុការណ៍គ្រោះអគ្គិភ័យនេះ កម្លាំងសមត្ថកិច្ចជំនាញបានធ្វើការស្រាវជ្រាវ រកឃេីញថា បណ្តាលមកពីការឆ្លងចរន្តអគ្គីសនីនៅបន្ទប់ជាន់ឡៅតឿ នៃរោងចក្រផលិតក្រដាសកាតុងបង្កជាអគ្គិភ័យ។ ដោយឡែក នៅក្នុងហេតុការណ៍គ្រោះអគ្គិភ័យនេះ មិនបានបណ្តាលឲ្យអ្នកណាម្នាក់រងរបួស ក្នុងគ្រោះអគ្គិភ័យខាងលើនេះឡើយ៕
