(កំពង់ចាម)៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានថ្លែងថា ការវិនិយោគលើវិស័យសុខាភិបាល និងការអប់រំ គឺជាកិច្ចការដែលត្រូវបន្តវិនិយោគជាបន្តបន្ទាប់ រួមទាំងចំណាយទៅលកម្មវិធីគាំពារសង្គមដើម្បីធ្វើឱ្យសុខភាពរបស្រជាពលរដ្ឋកាន់តែល្អ។
ការថ្លែងបែបនេះរបស់សម្តេចមហាបវរធិបតី ហ៊ុន ម៉ាណែត បានធ្វើឡើងនៅព្រឹកថ្ងៃសៅរ៍ ថ្ងៃទី២៦ ខែតុលា ឆ្នាំ២០២៤នេះ ក្នុងឱកាសដែលសម្តេចបានអញ្ជើញជាអធិបតីក្នុងពិធីអបអរសាទរសមិទ្ធផលនានា ក្រោមគម្រោងជំនួយរបស់ចិន សម្រាប់កែលម្អ បរិស្ថាន សាលារៀន និងផ្គត់ផ្គង់សម្ភារៈបរិក្ខារអប់រំនៅកម្ពុជា។ ពិធីនេះត្រូវបានរៀបចំឡើងនៅវិទ្យាល័យសម្តេច ហ៊ុន សែន ពាមជីកង ស្ថិតក្នុងកងមាស ខេត្តកំពង់ចាម។
សម្តេចមហាបវរធិបតី ហ៊ុន ម៉ាណែត បានថ្លែងយ៉ាងដូច្នេះថា៖ «ការបន្តលើការវិនិយោគលើគ្រូ ហេដ្ឋារចនាសម្ព័ន្ធ គឺជាទិសដៅដែលសំខាន់ ហើយនៅក្នុងថវិកាជាតិប្រចាំឆ្នាំ គឺរាជរដ្ឋាភិបាលតែងតែបង្កើន ទៅលើវិស័យអាទិភាពធំៗជាច្រើន ក្នុងនោះធំ២ គឺសុខាភិបាល និងអប់រំដែលយើងមិនអាចចោលបាន ហើយចំណសយទៅលើវិស័យសុខាភិបាលរបស់យើង ចំណាយទៅលកម្មវិធីគាំពារសង្គមដើម្បីធ្វើឱ្យសុខភាពរបស្រជាពលរដ្ឋយើងកាន់តែល្អ»។
ជាមួយគ្នានេះដែរ សម្តេចមហាបវរធិបតី ហ៊ុន ម៉ាណែត បានលើកឡើងថា សម្រាប់ការចំណាយលើកម្មវិធីឧបត្ថម្ភ រួមទាំងការឧបត្ថម្ភអាហារមួយចំនួននៅតាមសាលារៀនមួយចំនួននៅក្នុងប្រទេស ក៏រាជរដ្ឋាភិបាលអនុវត្ត ដោយមានការចូលរួមសហការជាមួយអង្គការដៃគូជាដើម។
សម្តេចមហាបវរធិបតី ហ៊ុន ម៉ាណែត បានបញ្ជាក់ថា ប៉ុន្តែ អ្វីដែលសំខាន់ គឺចំណីទាំងផ្លូវកាយ ចំណីផ្លូវអារម្មណ៍ និងមានអប់រំ បណ្តុះបណ្តាលយុវជនខ្មែរ នៅគ្រប់ទីកន្លែងទាំងអស់ ត្រូវមានចំណេះដឹងកាន់តែខ្ពស់បន្ថែមទៀត។ ខណៈជាក់ស្តែង យុវជនខ្មែររស់នៅខេត្តភូមិភាគសាន មានឱកាសអង្គុយរៀននៅក្នុងសាលារៀនល្អ មានឱកាសសិក្សានូវមេរៀនទំនើប។
ចំណុចនេះ ត្រូវបានសម្តេចបវរធិបតី នាយករដ្ឋមន្ត្រី បានអះអាងថា រាជរដ្ឋាភិបាលកម្ពុជា នឹងបន្តរុញការអប់រំបន្ថែមទៀត ទៅដល់មូលដ្ឋានទាំងអស់នៅទាំងប្រទេសកម្ពុជា ជាពិសេសតំបន់ដែលជាអតីតសមរភូមិប្រយុទ្ធគ្នា ព្រមទាំងព្យាយាមដោះស្រាយបញ្ហាបង្វះខាតគ្រូបង្រៀន ហេដ្ឋារចនាសម្ព័ន្ធរូបវ័ន្ធទាំងអស់ ដោយមិនអង្គុយបិទភ្នែកនោះទេ។
សម្តេចមហាបវរធិបតី ហ៊ុន ម៉ាណែត ក៏បានថ្លែងអំណរគុណលោកគ្រូ អ្នកគ្រូនៅទូទាំងប្រទេស និងរួមទាំងលោកគ្រូ អ្នកគ្រូ ដែលរស់នៅក្នុងតំបន់ដាច់ជាពិសេសលោកគ្រូ អ្នកគ្រូ ដែលមិនទាន់ទទួលបានក្របខណ្ឌដែលបានស្ម័គ្រចិត្តចូលរួមបណ្តុះបណ្តាលធនធានមនុស្សនៅកម្ពុជា ដើម្បីរួមចំណែកកសាងប្រទេសជាតិឱ្យកាន់តែរីកចម្រើនទៅថ្ងៃអនាគត និងអស់គុណលោកគ្រូ អ្នកគ្រូ ដែលបានចូលរួមក្នុងការអប់រំ ដែលដើរតួជាឪពុក ម្តាយទី២។
សម្តេចមហាបវរធិបតី ហ៊ុន ម៉ាណែត បានបន្ថែមថាកំណែទម្រង់ការអប់រំ ត្រូវធ្វើជាបន្តបន្ទាប់។ គ្មានការអប់រំណាមួយ ដែលនៅស្ងៀមនោះទេ គឺត្រូវធ្វើការកំណែទម្រង់ជាបន្តបន្ទាប់។ ការអប់រំ និងការសិក្សា ត្រូវតែធ្វើការកែសម្រួលជាប្រចាំ៕
