(សៀមរាប)៖ លោក អ៊ុច បូររិទ្ធ សមាជិកគណៈអចិន្ត្រៃយ៍គណបក្សប្រជាជនកម្ពុជា ប្រធានអនុគណៈកម្មការរៀបចំកិច្ចប្រជុំ គណៈកម្មាធិការប្រតិបត្តិ IDC-CDI និងជាអនុប្រធាន ទី២ ព្រឹទ្ធសភា បានគូសបញ្ជាក់ថា ការកសាងសន្តិភាព ការផ្សះផ្សា និងការអភិវឌ្ឍជាតិ គឺជាកេរដំណែលដ៏អស្ចារ្យបំផុតរបស់ សម្តេចអគ្គមហាសេនាបតីតេជោ ហ៊ុន សែន ដែលបានបន្សល់ទុកសម្រាប់កម្ពុជា។
លោកថ្លែងបែបនេះ ក្នុងពិធីបើកវេទិកាពិសេសស្តីពី សន្តិភាពសម្រាប់មនុស្សជាតិ និងភពផែនដី នៃកិច្ចប្រជុំគណៈកម្មាធិការប្រតិបត្តិអង្គការអ្នកប្រជាធិបតេយ្យនិយមកណ្តាលអន្តរជាតិ IDC-CDI នៅសណ្ឋាគារ Raffles Grand Hotel Angkor ខេត្តសៀមរាប នៅព្រឹកថ្ងៃទី១៨ ខែវិច្ឆិកា ឆ្នាំ២០២៤នេះ ។
លោក អ៊ុច បូររិទ្ធ បាន បានបញ្ជាក់បន្ថែមថា ដោយសារអាស៊ីមានវប្បធម៌ និងប្រពៃណីចម្រុះ ការលើកកម្ពស់ការយល់ដឹង និងការអត់ឱនជាអន្តរវប្បធម៌ ក៏ដូចជាការទទួលយកភាពចម្រុះដោយការគោរពគ្នាទៅវិញទៅមក គឺពិតជាចាំបាច់សម្រាប់ការរក្សាការបង្រួបបង្រួម ដើម្បីរក្សាសហត្ថិភាពដោយសន្តិភាព និងសម្រាប់ការរក្សាសន្តិភាព និងស្ថិរភាព។
កិច្ចប្រជុំនៅថ្ងៃនេះ មានប្រទេសចំនួន ២១ មកពីទ្វីបចំនួន៤ ដែលមកតំណាង ហើយពួកគេសុទ្ធតែជាកូនចៅ និងអ្នកមរតកសម័យទំនើបនៃអរិយធម៌ដ៏អស្ចារ្យនៅទូទាំងពិភពលោក។ បុព្វបុរសរបស់ខ្មែរបានប្រគល់ឱ្យយើងមិនត្រឹមតែប្រាសាទ និងវិមានដ៏អស្ចារ្យ និងទ្រព្យសម្បត្តិបុរាណវិទ្យា និងសិល្បៈដែលយើងឃើញបង្ហាញនៅក្នុងសារមន្ទីរប៉ុណ្ណោះទេ ប៉ុន្តែថែមទាំងសមិទ្ធផលវិទ្យាសាស្ត្រជាមូលដ្ឋានផ្សេងទៀត និងការច្នៃប្រឌិតដែលបានផ្លាស់ប្តូរពិភពលោកផងដែរ។
កិច្ចប្រជុំនៅថ្ងៃនេះក៏មាន សមាជិកប្រតិភូ ប្រមាណ ៨៧ រូប មកពី ២៦ គណបក្ស និង ២៤ ប្រទេស ជុំវិញពិភពលោក ក្នុងនោះមានឥស្សរជននយោបាយជាន់ខ្ពស់និងអញ្ជើញចូលរួមកិច្ចពិភាក្សាលើ វេទិកាពិសេសចំនួន២ ស្ដីពី «តួនាទីយុវជនក្នុងសន្តិភាព កិច្ចសន្ទនា សហត្ថិភាព និងការឆ្លើយតបបញ្ហាប្រឈម» និងកិច្ចពិភាក្សាស្តីពី «ធម្មនុញ្ញសន្តិភាព៖ ដើម្បីមនុស្សជាតិនិងភពផែនដី» ។
សូមជម្រាបថា នាពេលបច្ចុប្បន្ន អង្គការ CDI មានសមាជិកជាង ១០៩ គណបក្ស មកពី៨៣ ប្រទេស ដែលមានមនោគមវិជ្ជានយោបាយនិយមកណ្តាល មកពីទ្វីបអឺរ៉ុប អាម៉េរិកឡាទីន អាម៉េរិកខាងជើង អាហ្វ្រិក និងអាស៊ីប៉ាស៊ីហ្វិក។ គណបក្សប្រជាជនកម្ពុជាបានចូលជា សមាជិកពេញសិទ្ធិរបស់ CDI កាលពីខែមេសា ឆ្នាំ២០១៦ ហើយត្រូវបានបោះឆ្នោតជាអនុប្រធាន អង្គការ CDI ទទួលបន្ទុកតំបន់អាស៊ីប៉ាស៊ីហ្វិក ចាប់ពីខែកក្កដា ឆ្នាំ២០១៨ ចំនួន ៣ អាណត្តិមកហើយ៕
