(ភ្នំពេញ)៖ រហូតមកដល់ឆ្នាំ២០២៤នេះ កម្មវិធីជាតិជំនួយសង្គម បានពង្រីកវិសាលភាពដោយគ្របដណ្តប់ លើប្រជាពលរដ្ឋសរុបចំនួន១.២លានគ្រួសារ មានសមាជិកចំនួនជាង ៤.៨លាននាក់ (ស្មើនឹងប្រមាណ២៨ភាគរយ នៃប្រជាពលរដ្ឋសរុប) ដោយចំណាយថវិកាជាតិ បានកើនឡើងដល់ ១ ១៣៩.៧ប៊ីលានរៀល ឬស្មើនឹង ២៨៥លានដុល្លារអាមេរិក សម្រាប់ឆ្នាំ២០២៤។ នេះបើតាមការឱ្យដឹងរបស់ក្រុមប្រឹក្សាជាតិគាំពារសង្គម។
ថ្លែងនៅក្នុងសន្និសីទសារព័ត៌មាន នារសៀលថ្ងៃទី១៩ ខែវិច្ឆិកា ឆ្នាំ២០២៤ នៅសណ្ឋាគារសុខា ភ្នំពេញ, លោកបណ្ឌិត ចន ណារិទ្ធ អនុរដ្ឋលេខាធិការ ក្រសួងសេដ្ឋកិច្ច និងហិរញ្ញវត្ថុ និងជាអគ្គលេខាធិការក្រុមប្រឹក្សាជាតិគាំពារសង្គម បានឱ្យដឹងថា៖ «វិសាលភាពនៃការគ្របដណ្ដប់របស់ប្រព័ន្ធគាំពារសង្គម បានរីកធំជាងមុនជាង២ដង បើធៀបនឹងឆ្នាំ២០១៧ ដោយបច្ចុប្បន្ន បាននឹងកំពុងគ្របដណ្តប់ប្រជាពលរដ្ឋជាង៧លាននាក់ ជាមួយនឹងចំណាយថវិកាជាតិ ក៏បានកើន ឡើងធំជាងមុនជាង៣ដង។ ពោលគឺមានទំហំថវិកាចំណាយសរុបលើប្រព័ន្ធគាំពារសង្គមចំនួនជាង ១៧,៥ ទ្រីលានរៀល ឬសមមូលនឹង៤,៣ប៊ីលានដុល្លារអាមេរិក ចាប់តាំងពីរាជរដ្ឋាភិបាល ដាក់ចេញនូវក្របខណ្ឌ គោលនយោបាយជាតិគាំពារសង្គម កាលពីឆ្នាំ២០១៧មក»។
បើតាមរបាយការណ៍របស់អគ្គលេខាធិការក្រុមប្រឹក្សាជាតិគាំពារសង្គម បានឱ្យដឹងថា កម្មវិធីជាតិជំនួយសង្គម មានដូចជា៖
១៖ កម្មវិធីជាតិជំនួយសង្គមក្នុងកញ្ចប់គ្រួសារ ដែលត្រូវបានបង្កើត និងដាក់ឱ្យអនុវត្តចាប់ពីខែមេសា ឆ្នាំ២០២៤កន្លងមក។ កម្មវិធីនេះ មានការឧបត្ថម្ភគោលសម្រាប់គ្រួសារក្រីក្រទាំងអស់ ដែលបច្ចុប្បន្នមានជាង ៦១ម៉ឺនគ្រួសារ បានទទួលផល និងការឧបត្ថម្ភសមាជិក ដែលរស់នៅជាមួយ មេរោគ/ជំងឺអេដស៍ ចំនួន១.៩៤៧ នាក់ផងដែរ។
ទី២៖ កម្មវិធីផ្តល់អាហារតាមសាលារៀន ដោយប្រើប្រាស់កសិផលក្នុងសហគមន៍ ដែលត្រូវបានដាក់ ឱ្យអនុវត្តជាកម្មវិធីជាតិជំនួយសង្គមកាលពីដើមឆ្នាំ២០២០ ក្នុងគោលបំណងលើកកម្ពស់អាហារូបត្ថម្ភ និងការសិក្សា របស់កុមារ ក្នុងតំបន់មានភាពក្រីក្រ និងភាពងាយរងគ្រោះខ្ពស់ ដោយចូលរួមលើកកម្ពស់សេដ្ឋកិច្ច សហគមន៍ ផងដែរ។ កម្មវិធីនេះបានពង្រីកវិសាលភាពជាបន្តបន្ទាប់ ដែលបច្ចុប្បន្នមានសាលារៀនអនុវត្តកម្មវិធីនេះសរុបចំនួន ,១១៤សាលា និងសិស្សទទួលផលប្រមាណ៣០ម៉ឺននាក់ ដែលក្នុងនោះរាជរដ្ឋាភិបាល បានទទួលយកសាលាគោលដៅពីដៃគូអភិវឌ្ឍន៍ចំនួន ៥៥៣សាលា ក្នុងខេត្តចំនួន១០ និងមានសិស្សទទួលផលជាង១៥ម៉ឺននាក់។
ទី៣៖ កម្មវិធីបណ្តុះបណ្តាលវិជ្ជាជីវៈជូនយុវជនមកពីគ្រួសារក្រីក្រ និងគ្រួសារងាយរងហានិភ័យ ដែលត្រូវបានដាក់ឱ្យអនុវត្តដោយគិតត្រឹមខែតុលា ឆ្នាំ២០២៤ មានយុវជនបានចុះឈ្មោះចូលរៀនចំនួនប្រមាណជិត ៧ម៉ឺននាក់ ក្នុងនោះក្រុមគោលដៅជាយុវជនមកពីគ្រួសារក្រីក្រ និងគ្រួសារងាយរងហានិភ័យមានចំនួនជាង២ម៉ឺននាក់។
ទី៤៖ មូលនិធិសមធម៌សុខាភិបាល ត្រូវបានពង្រីកវិសាលភាពយ៉ាងទូលំទូលាយដល់ក្រុមពលរដ្ឋគោលដៅផ្សេងទៀត រួមមាន៖ ប្រជាពលរដ្ឋមកពីគ្រួសារងាយរងហានិភ័យ, កម្មករក្រៅប្រព័ន្ធ, អ្នកធាក់ស៊ីក្លូ, កីឡាករជម្រើសជាតិ, ក្រុមគ្រួសារជន ពលីមរណៈ, បុគ្គលបម្រើការក្នុងសេវាកម្សាន្តទេសចរណ៍នៃសេដ្ឋកិច្ចក្រៅប្រព័ន្ធ និងបុគ្គលក្នុងវិស័យសេដ្ឋកិច្ច ក្រៅប្រព័ន្ធផ្សេងទៀត បន្ថែមលើពលរដ្ឋក្រីក្រដែលមានបណ្ណសមធម៌ ដែលជារួមពលរដ្ឋប្រមាណ៤,៨លាននាក់ កំពុងទទួលបានការថែទាំសុខភាពនៅតាមមូលដ្ឋានសុខាភិបាលសាធារណៈ ឬមន្ទីរពេទ្យរដ្ឋដោយរដ្ឋជាអ្នកបង់ថ្លៃជំនួស។
និងទី៥៖ កម្មវិធីឧបត្ថម្ភសាច់ប្រាក់ជូនស្ត្រីមានផ្ទៃពោះ និងកុមារអាយុក្រោម២ឆ្នាំ សម្រាប់សមាជិក ប.ស.ស. ជាស្ត្រីត្រូវបានចាប់ផ្តើមអនុវត្តដំបូងក្នុងឆ្នាំ២០១៨ ដោយផ្តល់ការឧបត្ថម្ភសាច់ប្រាក់ ជូនកម្មករនិយោជិតជាស្ត្រី នៅពេលសម្រាល។ យ៉ាងណាមិញ ចាប់ពីខែសីហា ឆ្នាំ២០២៣ រាជរដ្ឋាភិបាលបានដំឡើងកម្រិតប្រាក់ឧបត្ថម្ភ ព្រមទាំងផ្តល់សេវាសុខាភិបាលបន្ថែម ក្នុងអំឡុងមានផ្ទៃពោះ និងក្រោយពេលសម្រាល រហូតដល់កុមារអាយុ២ឆ្នាំ ហើយបានពង្រីកវិសាលភាពដល់មន្ត្រីរាជការ, មន្ត្រីកម្មសិក្សា និងមន្ត្រីជាប់កិច្ចសន្យាជាស្ត្រីផងដែរ។ គិតត្រឹមខែកញ្ញា ឆ្នាំ២០២៤, ស្ត្រី និងកុមារសរុបប្រមាណ៧៧ម៉ឺននាក់ បានទទួលអត្ថប្រយោជន៍ពីកម្មវិធីនេះ។
គួរឱ្យដឹងថា អគ្គបណ្ឌិតសភាចារ្យ ឧបនាយករដ្ឋមន្រ្តី បានថ្លែងថា «សមិទ្ធផលទាំងនេះមិនអាចកើតឡើងបានទេប្រសិនបើកម្ពុជាមិនមានសុខសន្តិភាព និងស្ថិរភាពនយោបាយ ដែលបាននាំមកជូនប្រទេសជាតិដោយសម្ដេចតេជោ ហ៊ុន សែន អតីតនាយករដ្ឋមន្ត្រី។ ម្យ៉ាងវិញទៀត លទ្ធផលដ៏គាប់ប្រសើរទាំងនេះ ក៏បានកើតឡើងដោយសារការផ្ដួចផ្ដើម និងគាំទ្រយ៉ាងពេញទំហឹងរបស់ សម្ដេចតេជោ ហ៊ុន សែន នាពេលកន្លងមក និងត្រូវបានបន្តបេសសកម្មនេះប្រកបដោយឆន្ទៈយ៉ាងមោះមុតរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា ដែលជាមគ្គុទ្ទេសក៍ដ៏មានភាពឈ្លាសវៃ និងប៉ិនប្រសប់ ក្នុងការបន្តដឹកនាំ «នាវាគាំពារសង្គមកម្ពុជា» ឱ្យកាន់តែរឹងមាំ មានចីរភាព និងភាពធន់ ក្នុងការផ្ដល់អត្ថប្រយោជន៍គាំពារសង្គមដល់ពលរដ្ឋកម្ពុជា ដោយមិនមានការរើសអើង និងស្របតាមស្មារតី «មិនមានបោះបង់ពលរដ្ឋណាម្នាក់»៕
