(ស្វាយរៀង)៖ លោកបណ្ឌិត សម តារា សមាជិកគណៈកម្មាធិការកណ្តាល សមាជិកសភាមណ្ឌលស្វាយរៀង អនុប្រធានគណៈកម្មការទី១ នៃរដ្ឋសភា នៅព្រឹកថ្ងៃទី៣០ ខែវិច្ឆិកា ឆ្នាំ២០២៤ បានអញ្ជើញចុះជួបសំណេះសំណាល និងស្វែងយល់ជាមួយប្រជាកសិករដាំបន្លែធម្មជាតិ និងចិញ្ចឹមកង្កែប២គ្រួសារ និងចាស់ជរាចំនួន៤គ្រួសារ នៅភូមិព្រៃតាយន្ត័ និងភូមិត្រពាំងថ្កូវ ឃុំពងទឹក ស្រុករំដួល ខេត្តស្វាយរៀង និងបន្តជំរុញឲ្យប្រជាកសិករ ដាំបន្លែធម្មជាតិសរីរាង្គនិងចិញ្ចឹមកង្កែប ឲ្យបានច្រើនបន្ថែមទៀត។
ការចុះជួបជាមួយប្រជាកសិករដាំបន្លែ ចិញ្ចឹមកង្កែប ចាស់ជរានៅក្នុងស្រុករំដួលនេះ មានការចូលរួមក្រុមការងារគណបក្សថ្នាក់ខេត្ត ថ្នាក់ឃុំ និងថ្នាក់ភូមិជាច្រើនរូបផងដែរ។
នៅឱកាសនោះលោកបណ្ឌិត សម តារា បានផ្តាំផ្ញើនូវការសាកសួរសុខទុក្ខពីសំណាក់សម្ដេចកិត្តិសង្គហបណ្ឌិត ម៉ែន សំអន ប្រធានក្រុមការងារគណបក្សប្រជាជនកម្ពុជា ចុះជួយខេត្តស្វាយរៀង ដែលសម្ដេចតែងតែនឹក រលឹកដល់បងប្អូនទាំងអស់នៅទូទាំងខេត្តស្វាយរៀង និងផ្ដាំផ្ញើឲ្យកសិករបន្តដាំដុះបន្លែធម្មជាតិ ចិញ្ចឹមសត្វឲ្យបានច្រើន ដើម្បីលើកកម្ពស់ជីវភាពរស់នៅឲ្យកាន់តែប្រសើរផងដែរ។
លោកបណ្ឌិត សម តារា បានកោតសសើរកសិករដែលបានចូលរួមអនុវត្តវិធីសាស្រ្តដាំបន្លែសរីរាង្គ និងចិញ្ចឹមកង្កែប មិនធ្វើឱ្យប៉ះពាល់ដល់សុខភាពមនុស្សសត្វ បរិស្ថាន និងកាត់បន្ថយការចំណាយផងដែរ។
លោកបណ្ឌិត សម តារា បានសំណូមពរឲ្យប្រជាកសិករដទៃទៀត បង្កើននូវការដាំដុះនូវបន្លែសរីរាង្គ និងចិញ្ចឹមកង្កែបឱ្យបានច្រើនបន្ថែមទៀត និងសូមប្រជាពលរដ្ឋបន្តលើកទឹកចិត្តដល់ប្រជាកសិករ និងប្រើប្រាស់បន្លែសរីរាង្គ និងកង្កែបដែលចិញ្ចឹមក្នុងស្រុកវិញ ដើម្បីចូលរួមចំណែកថែរក្សាសុខភាពឲ្យបានល្អទាំងអស់គ្នា។
បន្ថែមលើសពីនេះ លោកបណ្ឌិត សម តារា បានអំពាវនាវប្រជាពលរដ្ឋជាពិសេសក្មេងៗ និងមនុស្សចាស់ដែលមានអាយុច្រើនត្រូវថែរក្សាសុខភាពឱ្យបានល្អ ព្រោះរដូវនេះជារដូវរងារ ដែលអាកាសធាតុចុះត្រជាក់ខ្លាំង ធ្វើឲ្យមានបញ្ហាសុខភាពដូចជាផ្តាសាយ និងជំងឺផ្លូវដង្ហើម ដូច្នេះត្រូវរស់នៅដោយអនាម័យជាប់ជានិច្ច បើមានបញ្ហាសុខភាពធ្ងន់ធ្ងរ ត្រូវបញ្ជូនទៅកាន់មន្ទីរពេទ្យឲ្យបានឆាប់រហ័ស ដើម្បីជៀសផុតគ្រោះថ្នាក់កើតឡើងជាយថាហេតុ។
សូមបញ្ជាក់ថា នៅក្នុងឱកាសចុះជួបកសិករដាំបន្លែនិងចិញ្ចឹមកង្កែបព្រមទាំងសំណេះសំណាលជាមួយចាស់ជរ លោកបណ្ឌិត សម តារា ក៏បានឧបត្ថម្ភថវិកាជូនក្រុមការងារ ជូនគ្រួសារកសិករ និងចាស់ជរា សរុបការចំណាយទាំងអស់មានចំនួន ៣.២០០០០០រៀលផងដែរ៕
