(ភ្នំពេញ)៖ តុលាការកំពូល បានចេញសេចក្តីថ្លែងការណ៍មួយ ពន្យល់ជុំវិញសំណុំរឿងចាប់ឃុំខ្លួន លោកយាយអាយុ៨២ឆ្នាំ រស់នៅភូមិត្នោត ឃុំត្នោត ស្រុកបាទី ខេត្តតាកែវ តាមដីកាបង្គាប់ឱ្យចាប់ និងឃុំខ្លួនរបស់អយ្យការអមសាលាដំបូងខេត្តតាកែវ។
សេចក្តីថ្លែងការណ៍របស់អ្នកនាំពាក្យតុលាការកំពូលបានបញ្ជាក់ ៣ចំណុចដូចខាងក្រោម៖
១. តុលាការកំពូល បានទទួលពាក្យបណ្ដឹងសើរើពីបុគ្គលប្តឹងសើរើចំនួនបីរូបទី១. ឈ្មោះ ជុំ រំ ភេទប្រុស អាយុ៣៨ឆ្នាំ, ទី២.ឈ្មោះ ជុំ យ៉េន ភេទស្រី ឆ្នាំកំណើត១៩៤២ និងទី៣.ឈ្មោះ ទេព កុសល ភេទប្រុស អាយុ៣៦ឆ្នាំ ដែលបុគ្គលទាំងបីរូប មានទោសដាក់ពន្ធនាគារកំណត់រយៈពេល ៨ (ប្រាំបី) ខែក្នុងម្នាក់ៗ ពីបទ «ធ្វើឱ្យខូចខាតដោយចេតនា និងធ្វើឱ្យបាត់ជំនឿលើសេចក្តីសម្រេចរបស់តុលាការ» ប្រព្រឹត្តនៅភូមិត្នោត ឃុំត្នោត ស្រុកបាទី ខេត្តតាកែវ កាលពីថ្ងៃទី២៩ ខែធ្នូ ឆ្នាំ២០២១ តាមបញ្ញត្តិមាត្រា ៤១០ និងមាត្រា៥២៣ នៃក្រមព្រហ្មទណ្ឌ តាមអំណាចសាលក្រមស្ថាពរលេខ ៣០ “ខ” ចុះថ្ងៃទី៥ ខែកក្កដា ឆ្នាំ២០២៣ របស់សាលាដំបូងខេត្តតាកែវ។
២៖ បន្ទាប់ពីទទួលសំណុំរឿងទាំងមូលតាមនីតិវិធី ពីសាលាដំបូងខេត្តតាកែវនាថ្ងៃទី២៩ ខែវិច្ឆិកា ឆ្នាំ២០២៤ តុលាការកំពូលបានពិនិត្យ ពិចារណា និងសម្រេចបើកការសើរើរឿងក្តីនេះ តាមនីតិវិធីដូចមានក្នុងដីកាសម្រេចលេខ ៣៩ XVI ចុះថ្ងៃទី៣ ខែធ្នូ ឆ្នាំ២០២៤ របស់សភាព្រហ្មទណ្ឌនៃតុលាការកំពូល។ បន្ថែមពីលើនេះ ផ្អែកតាមគោលការណ៍មនុស្សធម៌ តុលាការកំពូលក៏បានពិចារណាព្យួរការអនុវត្តទោស លើឈ្មោះ ជុំ យ៉េន ឆ្នាំកំណើត១៩៤២ បច្ចុប្បន្នមានអាយុ ៨២ឆ្នាំ។
៣៖ សំណុំរឿងក្ដីសើរើនេះ នឹងត្រូវជំនុំជម្រះជាសភាពេញអង្គ ដោយធ្វើការសម្រេចលើអង្គហេតុ និងអង្គច្បាប់ ដើម្បីរកយុត្តិធម៌ដល់គូភាគីផ្អែកលើភស្តុតាងទាំងដាក់បន្ទុក និងដោះបន្ទុក។
សូមជម្រាបថា លោកយាយ ជុំ យ៉េន អាយុ៨២ឆ្នាំ រស់នៅភូមិត្នោត ឃុំត្នោត ស្រុកបាទី ខេត្តតាកែវ ដែលត្រូវបានចាប់ និងឃុំខ្លួនដាក់ពន្ធនាគារ ដោយសារទំនាស់ព្រំដីនោះ, នៅថ្ងៃទី៣ ខែធ្នូ ឆ្នាំ២០២៤ ត្រូវបានតុលាការកំពូល ចេញសាលដីកាសម្រេចដោះលែងឲ្យនៅក្រៅឃុំហើយ។
ការសម្រេចរបស់តុលាការកំពូលនេះ បានកើតឡើងក្រោយមានការចែកចាយ នៅតាមបណ្តាញសង្គមព្រោងព្រាត ពាក់ព័ន្ធនឹងចំណាត់ការតាមផ្លូវច្បាប់ ដែលលោកយាយមានអាយុរហូតដល់ ៨២ឆ្នាំ រួមរិតដោយជំងឺលើស ឈាម និងទឹកនោមផ្អែមប្រចាំកាយនោះ ត្រូវបានកម្លាំងសមត្ថកិច្ចចាប់ខ្លួន តាមដីការបស់តុលាការខេត្តតាកែវ ហើយយកលោកយាយទៅឃុំខ្លួននៅពន្ធនាគារកាលពីថ្ងៃអាទិត្យ ក្រោមបទចោទប្រកាន់ពីបទ «ធ្វើឲ្យខូចខាតដោយ ចេតនា និងធ្វើឲ្យបាត់ជំនឿលើ សេចក្ដីសម្រេចរបស់តុលាការ» ប្រព្រឹត្តនៅភូមិត្នោត ឃុំត្នោត ស្រុកបាទី ខេត្តតាកែវ កាលពីថ្ងៃទី២៩ ខែធ្នូ ឆ្នាំ២០២១ បទល្មើសព្រហ្មទណ្ឌ ដែលមានចែងឲ្យផ្តន្ទទោសតាមបញ្ញត្តិមាត្រា៤១០ និងមាត្រា៥២៣ នៃក្រមព្រហ្មទណ្ឌ។
ដំណើររឿងដែលឈានដល់ការចោទប្រកាន់ ពីតំណាងអយ្យការអមសាលាដំបូងខេត្តតាកែវ ទៅលើលោកយាយរូបនេះ គឺផ្តើមចេញពីទំនាស់ព្រំដី និងការសុំបើកផ្លូវជាមួយអ្នកជិតខាង រហូតមានការប្តឹងផុ្តល់គ្នា ហើយមានការចាប់ខ្លួន និងឃុំខ្លួនលោកយាយតែម្តង។ ក្រៅពីការចាប់ខ្លួនលោកយាយដាក់ពន្ធនាគារ, កូនរបស់លោកយាយចំនួន២នាក់ទៀត ក៏ត្រូវបានចាប់ និងឃុំខ្លួនដាក់ពន្ធនាគារផងដែរ កាលពីប៉ុន្មានខែមុននៅក្នុងករណីតែមួយនេះ។
សម្រាប់ករណីនេះ ក្រោយមានការចែកចាយព័ត៌មានច្រើននៅតាមបណ្តាញសង្គម អមដោយសាររិះគន់ផងនោះ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានណែនាំឲ្យឧបនាយករដ្ឋមន្រ្តី កើត រិទ្ធ រដ្ឋមន្រ្តីក្រសួងយុត្តិធម៌ រួមទាំងអាជ្ញាធរពាក់ព័ន្ធ ពិនិត្យករណីនេះឡើងវិញ ដើម្បីផ្តល់ភាពយុត្តិធម៌ជូនភាគីពាក់ព័ន្ធ។
អយ្យការអមសាសាដំបូងខេត្តតាកែវ បានបញ្ជាក់ថា យោងតាមសាលក្រមព្រហ្មទណ្ឌស្ថាពរលេខ ៣០ (ខ) ចុះថ្ងៃទី០៥ ខែកក្កដា ឆ្នាំ២០២៣ របស់សាលាដំបូងខេត្តតាកែវ ដែលបានសម្រេចផ្តន្ទាទោសឈ្មោះ ជុំ យ៉េន ដាក់ពន្ធនាគារកំណត់រយៈពេល៨ (ប្រាំបី)ខែ ពីបទ «ធ្វើឲ្យខូចខាតដោយចេតនា និងធ្វើឲ្យបាត់ជំនឿលើ សេចក្ដីសម្រេចរបស់តុលាការ»។
យោងតាមដីកាសម្រេចសភាព្រហ្មទណ្ឌតុលាការកំពូល នៅថ្ងៃទី៣ ខែធ្នូ ឆ្នាំ២០២៤នេះ បានយល់ឃើញថា ឈ្មោះ ជុំ យ៉េន ភេទស្រី កើតឆ្នាំ១៩៤២ មានវ័យចាស់ជរា គិតមកទល់នឹងពេលនេះមានអាយុ៨២ឆ្នាំហើយ។ ហេតុនេះតាមគោលការណ៍មនុស្សធម៌ គប្បីសភាព្រហ្មទណ្ឌ នៃតុលាការកំពូល ព្យួរការអនុវត្តទោសចំពោះទណ្ឌិតឈ្មោះនេះ តាមបញ្ញត្តិនៃមាត្រា៤៤៩ នៃក្រមនីតិវិធីព្រហ្មទណ្ឌ។
ដីកាសម្រេចសភាព្រហ្មទណ្ឌតុលាការកំពូល បានបញ្ជាក់យ៉ាងដូច្នេះថា៖
*ទី១៖ ទទួលបណ្ដឹងសើរើលេខ ៣៩ ស.រ ចុះថ្ងៃទី២៥ ខែកញ្ញា ឆ្នាំ២០២៤ និងបញ្ជូនសំណុំរឿងព្រហ្មទណ្ឌ នៃបណ្តឹងសើរើលេខ ៣៩ ស.រ ចុះថ្ងៃទី២៥ ខែកញ្ញា ឆ្នាំ២០២៤ របស់តុលាការកំពូលទៅ សភាពេញអង្គនៃតុលាការកំពូលជាសមត្ថកិច្ច។
*ទី២៖ ព្យួរការអនុវត្តទោសលើទណ្ឌិតឈ្មោះ ជុំ យ៉េន ភេទស្រី កើតឆ្នាំ១៩៤២ ដែលមានក្នុងសាលក្រមព្រហ្មទណ្ឌលេខ ៣០ “ខ” ចុះថ្ងៃទី៥ ខែកក្កដា ឆ្នាំ២០២៣ របស់សាលាដំបូងខេត្តតាកែវ៕