(ភ្នំពេញ)៖ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានផ្ញើសាររំលែកទុក្ខជូន លោកអេភូថង និងក្រុមគ្រួសារ ចំពោះមរណភាពលោក លាង ប៉ ហេង
ដែលត្រូវជាកូនប្រសាររបស់លោក និងត្រូវជាស្វាមីរបស់កីឡាការិនី អេ យ៉ានុត ដែលបានទទួលមរណភាព នៅថ្ងៃទី២ ខែមករា ឆ្នាំ២០២៥ វេលាម៉ោង ១០៖៤៣នាទីយប់ ក្នុងជន្មាយុ ២៩ឆ្នាំ ដោយរោគាពាធវ័យក្មេង។
សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន បានថ្លែងថា «ខ្ញុំ និងសហការីនៃកាកបាទក្រហមកម្ពុជា មានសេចក្តីសោកស្តាយយ៉ាងខ្លាំង ដោយបានទទួលដំណឹងមរណភាព លោក លាង ប៉ ហេង ដែលត្រូវជាកូនប្រសាររបស់លោកអេភូថង និងត្រូវជាស្វាមីកីឡាការិនី អេ យ៉ានុត ដែលបានទទួលមរណភាព នៅថ្ងៃទី២ ខែមករា ឆ្នាំ២០២៥ វេលាម៉ោង ១០៖៤៣នាទីយប់ ដោយរោគាពាធទាំងវ័យក្មេង។
ក្នុងឱកាសប្រកបដោយសមានទុក្ខដ៏ក្រៀមក្រំនេះ យើងខ្ញុំសូមចូលរួមរំលែកទុក្ខជាមួយនឹងលោកអេភូថង ព្រមទាំងក្រុមគ្រួសារ ចំពោះការបាត់បង់កូនប្រសារ ជាស្វាមី និងឪពុកជាទីគោរពស្រឡាញ់ បំផុតមិនអាចកាត់ថ្លៃបាន។
យើងខ្ញុំសូមឧទ្ទិសបួងសួង សូមដួងវិញ្ញាណក្ខន្ធរបស់លោក លាង ប៉ ហេង សូមបានទៅចាប់បដិសន្ធិ និងសោយសុខក្នុងសុគតិភពគ្រប់ៗជាតិកុំបីឃ្លៀងឃ្លាតឡើយ។
សូម លោកអេភូថង និងក្រុមគ្រួសារ ទទួលនូវមនោសញ្ចេតនារំលែកទុក្ខដ៏ក្រៀមក្រំ ពីយើងខ្ញុំ»៕
