(កណ្ដាល)៖ សាលាដំបូងខេត្តកណ្ដាល បានចេញសេចក្ដីប្រកាសព័ត៌មាន បង្ហាញអំពីចំណាត់ការតាមផ្លូវច្បាប់ដោយសម្រេចឃុំខ្លួនក្មេងទំនើងចំនួន១២នាក់ ប៉ុន្តែក្នុងនោះ មានខ្លួនតែ៦នាក់ប៉ុណ្ណោះ ខណៈ៦នាក់ផ្សេងទៀតដែលជាបក្ខពួកកំពុងស្រាវជ្រាវចាប់ខ្លួន ពាក់ព័ន្ធបទល្មើសហិង្សាដោយចេតនាមានស្ថានទម្ងន់ទោស និងប្រើប្រាស់ដោយខុសច្បាប់នូវសារធាតុញៀន ប្រព្រឹត្តនៅរមណីយដ្ឋានដំណាក់មនោរម្យ ភូមិត្រពាំងពុទ្រា ឃុំទំនប់ធំ ស្រុកពញាឮ ខេត្តកណ្ដាល។
ក្នុងសេចក្ដីប្រកាសព័ត៌មាន ដែលបណ្ដាញព័ត៌មាន Fresh News ទទួលបាននៅថ្ងៃទី៧ ខែមករា ឆ្នាំ២០២៥នេះ អ្នកនាំពាក្យសាលាដំបូងខេត្តកណ្ដាល បានបញ្ជាក់ថា ក្មេងទំនើងទាំង១២នាក់នេះ បានធ្វើសកម្មភាពកាលពីថ្ងៃទី១ ខែមករា ឆ្នាំ២០២៥កន្លងទៅនៅទីតាំងខាងលើ។
សូមជម្រាបថា គិតមកដល់ថ្ងៃនេះ សាលាដំបូងខេត្តកណ្ដាល បានឃុំខ្លួនក្មេងទំនើងពាក់ព័ន្ធករណីហិង្សាមានស្ថានទម្ងន់ទោស កាន់កាប់អាវុធខុសច្បាប់ គ្រឿងញៀន ដាក់ពន្ធនាគារបានចំនួន២២០នាក់ហើយ។ រីឯបក្ខពួកមួយចំនួនដែលតុលាការសម្រេចចោទប្រកាន់ បានរត់គេចខ្លួនបាត់៕
