(ភ្នំពេញ)៖ ពីប្រទេសជប៉ុននៅថ្ងៃសៅរ៍ ទី១១ ខែមករា ឆ្នាំ២០២៥នេះ លោក ហៃ វណ្ណា អតីតមេចលនាយុវជនអតីតបក្សសង្គ្រោះជាតិ ប្រចាំប្រទេសជប៉ុន បានចេញវីដេអូឃ្លីបមួយនិយាយពីជំហរនយោបាយ និងព័ត៌មានមួយចំនួននៅពេលលោកចូលជួបសម្តេចតេជោ ហ៊ុន សែន នាពេលកន្លងទៅ។ លោក ហៃ វណ្ណា ក៏បានបង្ហាញទស្សនៈរបស់លោកជុំវិញការធ្វើឃាតកម្មលោក លិម គឹមយ៉ា ផងដែរ។
ពាក់ព័ន្ធរឿងនយោបាយលោក ហៃ វណ្ណា បានប្រកាសឈប់ជ្រកកោណជាមួយបក្សប្រឆាំងដឹកនាំដោយទណ្ឌិត សម រង្ស៊ី ដែលសាបព្រោះតែមនោគមន៍វិជ្ជានយោបាយជ្រុលនិយម ដែលនាំឱ្យខ្មែរបែកបាក់គ្នាទៀតហើយ។ សម្រាប់ជំនួបជាមួយសម្តេចតេជោ ហ៊ុន សែន កាលពីអំឡុងខែវិច្ឆិកា ឆ្នាំ២០២៤កន្លងទៅ លោក ហៃ វណ្ណា បានឱ្យដឹងថា ក្នុងជំនួបរយៈពេលជាងពីរម៉ោងនោះ លោកបានស្តាប់សម្តេចតេជោមានប្រសាសន៍ពីការប្រឹងប្រែងផ្សះផ្សារវាងសម្តេច ជាមួយលោក សម រង្ស៊ី តាមរយៈវប្បធម៌សន្ទនា រហូតដល់ការចូលរួមពិធីបុណ្យចូលឆ្នាំថ្មីជាមួយគ្នានៅខេត្តសៀមរាប និងគំនិតជួយជ្រោមជ្រែងបង្កើតទូរទស្សន៍របស់បក្សប្រឆាំង ពីសំណាក់លោកស្រី ហ៊ុន ម៉ាណា ជាដើម។ ប៉ុន្តែជាការសោកស្តាយវប្បធម៌ចាប់ដៃជាន់ជើង របស់លោក សម រង្ស៊ី ធ្វើឱ្យនយោបាយផ្សះផ្សាត្រូវប្រេះឆាទៅវិញ។
ក្រៅពីលើកឡើងបញ្ហាខាងលើនេះ លោក ហៃ វណ្ណា ក៏បានឆ្លៀតលើកបង្ហាញទស្សនៈរបស់លោក លើហេតុការណ៍ឃាតកម្មលោក លិម គឹមយ៉ា អតីតអ្នកតំណាងរាស្ត្ររបស់អតីតគណបក្សសង្គ្រោះជាតិផងដែរ។ លោក ហៃ វណ្ណា បានគូសរំលេចថា ហេតុការណ៍ឃាតកម្មនេះ មិនមានអ្វីជាប់ទាក់ទងជាមួយរាជរដ្ឋាភិបាលកម្ពុជានោះឡើយ។ លោកមើលឃើញថា រាជរដ្ឋាភិបាលកម្ពុជា កំពុងប្រឹងប្រែងយកចិត្តទុកដាក់លើកិច្ចអភិវឌ្ឍន៍ ហើយក៏កំពុងទទួលបានការគាំទ្រពីប្រជាពលរដ្ឋផងដែរ។ សម្រាប់សមរភូមិរបស់ក្រុមប្រឆាំងនៅលើទឹកដីកម្ពុជា ក៏មិនមានអានុភាពអ្វី ដែលធ្វើឱ្យស្រអាប់ និងប៉ះពាល់ដល់ប្រជាប្រិយភាព និងការដឹកនាំរបស់រាជរដ្ឋាភិបាលនោះដែរ។
លោក ហៃ វណ្ណា បានបង្ហាញការជឿជាក់ថា រាជរដ្ឋាភិបាលគ្មានផលចំណេញ ហើយក៏គ្មានហេតុផលអ្វីទៅកម្ចាត់លោក លិម គឹមយ៉ា ដែលមិនបានធ្វើសកម្មភាពអ្វីប៉ះពាល់ដល់រាជរដ្ឋាភិបាលនោះឡើយ។
អតីតមេចលនាយុវជនក្រុមប្រឆាំងនៅប្រទេសជប៉ុនរូបនេះ ទទូចឱ្យពលរដ្ឋខ្មែរពិចារណាឱ្យបានល្អិតល្អន់លើឃាតកម្មលោក លិម គឹមយ៉ា ដើម្បីកុំឱ្យចាញ់ឱបាយកលរបស់ជនទុច្ចរិតណាមួយ ដែលនាំទៅដល់ការធ្វើឱ្យខូចខាតប្រយោជន៍របស់ខ្មែរ៕
