(សៀមរាប)៖ លោក សឹង សំណាង សមាជិកគណៈអចិន្ត្រៃយ៍គណៈកម្មាធិការកណ្តាល ប្រធានក្រុមការងារចុះមូលដ្ឋានស្រុកសូទ្រនិគម និងជា អនុប្រធានក្រុមការងារគណបក្សចុះមូលដ្ឋានខេត្តសៀមរាប នាព្រឹកថ្ងៃទី១១ ខែមករា ឆ្នាំ២០២៥នេះ បានដឹកនាំក្រុមការងារចុះមូលដ្ឋានស្រុកសូទ្រនិគម រៀបចំពិធីអបអរសាទរខួបអនុស្សាវរីយ៍លើកទី៤៦ នៃទិវាជ័យជម្នះ ៧ មករា (៧ មករា ១៩៧៩-៧ មករា ២០២៥)។
ពិធីអបអរសាទរថ្ងៃកំណើតទី២របស់ប្រជាជាតិខ្មែរ ត្រូវបានធ្វើឡើងនៅមន្ទីរគណបក្សស្រុកសូទ្រនិគម និងមានការចូលរួមពីលោក លោកស្រី ជាប្រធាន អនុប្រធាន និងសមាជិកក្រុមប្រឹក្សាស្រុក លោក លោកស្រីជាអភិបាល អភិបាលរងស្រុក លោកនាយក នាយករងសាលា លោកគ្រូ អ្នកគ្រូ សិស្សានុសិស្ស យុវជន យុវនារីប្រមាណ ៩០០នាក់។
ក្នុងឱកាសនោះ លោក សឹង សំណាង បានអានសុន្ទរកថាដ៏មានអត្ថន័យរបស់សម្តេចតេជោ ហ៊ុន សែន ប្រធានគណបក្សប្រជាជនកម្ពុជា ដែលបានថ្លែងក្នុងឱកាសអបអរសាទរខួប៤៦ឆ្នាំ នៃថ្ងៃជ័យជម្នះ «៧មករា» នៅរាជធានីភ្នំពេញ កាលពីព្រឹកថ្ងៃទី៧ ខែមករា ឆ្នាំ២០២៥។
ក្រៅពីការអានសុន្ទរកថារបស់សម្តេចតេជោហើយនោះ លោក សឹង សំណាង ក៏បានរំលឹកថា រយៈពេល៤៦ឆ្នាំកន្លងមកនេះ បន្ទាប់ពីថ្ងៃជ័យជម្នះ ៧ មករា ១៩៧៩ ជាប្រវត្តិសាស្រ្ត គណបក្សប្រជាជនកម្ពុជាបានផ្សារភ្ជាប់ រួមសុខ រួមទុក្ខជាមួយប្រជាជន ពុះពារឆ្លងកាត់រាល់ឧបសគ្គ ដឹកនាំប្រទេសឱ្យរួចផុតពីស្ថានភាពដែលវិនាសខ្ទេចខ្ទី ឈានមកដល់ដំណាក់កាលអភិវឌ្ឍន៍លើគ្រប់វិស័យ ប្រកបដោយមោទនភាពជាទីបំផុត។
«គណបក្សប្រជាជនកម្ពុជា ដែលមានសម្តេចអគ្គមហាសេនាបតីតេជោ ហ៊ុន សែន ជាប្រធានគណបក្ស សម្តេចអគ្គមហាពញាចក្រី ហេង សំរិន ជាប្រធានកិត្តិយស និង សម្តេចមហាបវរធិបតី ហ៊ុន ម៉ាណែត ជាអនុប្រធានគណបក្ស និងជានាយករដ្ឋមន្រ្តីអាណត្តិទី៧ បានការពារយ៉ាងរឹងមាំនូវសន្តិភាព ស្ថិរភាព សន្តិសុខ និងសណ្តាប់ធ្នាប់សង្គម ដែលបានធានាដល់ការរស់នៅដ៏សុខសាន្តរបស់ប្រជាជន ការអភិវឌ្ឍសេដ្ឋកិច្ច សង្គម និងការពង្រឹងពង្រីកលទ្ធិប្រជាធិបតេយ្យ។ សមិទ្ធផលថ្មីៗជាច្រើនអនេក រួមមាន ផ្លូវ ស្ពាន ប្រព័ន្ធធារាសាស្រ្ត បណ្តាញទឹកស្អាត អណ្តូងទឹក ភ្លើងអគ្គីសនី ប្រព័ន្ធព័ត៌មាន រោងចក្រ កសិដ្ឋាន សំណង់តូចធំ មណ្ឌលពាណិជ្ជកម្ម សាលារៀន មន្ទីរពេទ្យ វត្តអារាម ។ល។ ត្រូវបានកសាងពង្រីកទាំងនៅទីក្រុង ទាំងនៅជនបទ និងតំបន់ព្រំដែន»។ នេះជាការគូសរំលេចរបស់លោក សឹង សំណាង។
លោក សឹង សំណាង បានបន្ថែមថា មានតែគណបក្សប្រជាជនកម្ពុជាមួយប៉ុណ្ណោះ ដែលជាបង្អែកដ៏រឹងមាំ កក់ក្តៅ និងជាក្តីសង្ឃឹមពិតប្រាកដរបស់ប្រជាជនកម្ពុជា ក្នុងការដឹកនាំសង្គមជាតិ ឱ្យបន្តឈានទៅមុខលើមាគ៌ាសន្តិភាព ប្រជាធិបតេយ្យ និងអភិវឌ្ឍឆ្ពោះទៅរកអនាគតដ៏រុងរឿង។ ដូច្នេះពលរដ្ឋខ្មែរគ្រប់រូប ត្រូវតែប្តេជ្ញាចូលរួមថែរក្សាសន្តិភាព ថែរក្សារាល់សមិទ្ធផលទាំងឡាយរបស់រាជរដ្ឋាភិបាល និងគណបក្សប្រជាជនកម្ពុជាឲ្យបានជាដាច់ខាត។
ក្នុងឱកាសនោះ លោក សឹង សំណាង ក៏បានអំពាវនាវប្រជាពលរដ្ឋកុំជឿតាមក្រុមជ្រុលនិយមដែលតែងបង្ក និងឃោសនាពាក្យញុះញង់ចង់នាំប្រទេសឱ្យធ្លាក់ចូលក្នុងឧបាយកលសង្គ្រាមសារជាថ្មី៕
