(ព្រៃវែង)៖ យោងតាមមន្ទីរធនធានទឹក និងឧតុនិយមខេត្តព្រៃវែង បានឲ្យដឹងថា មន្ត្រីជំនាញកំពុងជួយសង្រ្គោះស្រូវប្រាំងរបស់ប្រជាពលរដ្ឋដែលកំពុងប្រឈមនឹងបញ្ហាខ្វះខាតទឹកចំនួន ៨៨៩១ហិកតា ក្នុងស្រុកចំនួន៣ គឺស្រុកស្វាយអន្ទរ មាន៤ឃុំ ស្រុកកំចាយមារ មាន៤ឃុំ និងស្រុកមេសាង មាន៨ឃុំ ក្នុងខេត្តព្រៃវែង។
មុនចាប់ផ្តើមដំណើរការបូម នាយកដ្ឋានធារាសាស្ត្រ កសិកម្ម នៃក្រសួងធនធានទឹក និងឧតុនិយម បាននាំគ្រឿងចក្រ មកទប់ភ្លឺព្រែកវ៉ៃគោ ដែលទឹកហូរដាច់នៅរដូវវស្សាប្រវែង ១០០ម៉ែត្រ ដើម្បីកុំអោយទឹកហូរចូលបឹងក្រពិត និងរុញទឹកអោយដល់ទិសដៅដែលប្រជាកសិករត្រូវការទឹកក្នុងភូមិសាស្ត្រខេត្តព្រៃវែង។
សូមបញ្ជាក់ថា រសៀលថ្ងៃទី២២ ខែមករា ឆ្នាំ២០២៥ លោក ស្បោង សារ៉ាត ប្រធានក្រុមប្រឹក្សាខេត្ត និងលោក សួន សុម៉ាលីន អភិបាលខេត្ត រួមជាមួយ លោក អ៊ុន ចាន់ដា អភិបាលខេត្តកំពង់ចាម ព្រមទាំងថ្នាក់ដឹកនាំខេត្ត មន្ទីរ-អង្គភាពពាក់ព័ន្ធ និងអាជ្ញាធរមូលដ្ឋាន ព្រមទាំងមន្ត្រីជំនាញនៃខេត្តទាំងពីរ បានចុះអន្តរាគមន៍បូមទឹក ជួយសង្គ្រោះស្រូវប្រាំងរបស់ប្រជាកសិករ ពីស្ថានីយ៍បូមទឹកទី១ គម្រោងអភិវឌ្ឍន៍ប្រព័ន្ធស្រោចស្រពវៃគោ ជំហាន២ ដែលស្ថិតនៅក្នុងឃុំមហាលាភ ស្រុកកោះសុទិន ខេត្តកំពង់ចាម ដើម្បីស្រោចស្រពដំណាំស្រូវរបស់ប្រជាកសិករ នៅស្រុកស៊ីធរកណ្ដាល ស្រុកស្វាយអន្ទរ ស្រុកកញ្ជ្រៀច និងស្រុកមេសាង ខេត្តព្រៃវែង។
ពលរដ្ឋសូមអរគុណដល់ថ្នាក់ដឹកនាំគ្រប់លំដាប់ថ្នាក់ជាពិសេសលោកអភិបាលខេត្ត តែងតែគិតគូរអំពីសុខទុក្ខរបស់ប្រជាពលរដ្ឋជានិច្ច ទោះក្នុងកាលៈទេសៈបែបណាក៏ដោយមិនបានទុកពលរដ្ឋណាម្នាក់ ចោលនោះទ្បើយហើយបានដោះស្រាយបញ្ហាប្រឈមក៏ដូចជាតម្រូវការនានារបស់ប្រជាពលរដ្ឋនៅមូលដ្ឋានបានទាន់ពេលវេលាផងដែរ៕
