(បាត់ដំបង)៖ លោក សុខ លូ អភិបាលខេត្តបាត់ដំបង នារសៀល ថ្ងៃទី៣០ ខែមករា ឆ្នាំ២០២៥ បានបន្តដឹកនាំក្រុមការងារជំនាញចុះពិនិត្យស្ថានភាពទឹកនៅទំនប់កង្ហត ស្ថិតក្នុងឃុំកន្ទឺ១ ស្រុកបាណន់ ដើម្បីពិនិត្យបរិមាណទឹក និងបើកបង្ហូរចុះទៅផ្នែកខាងក្រោមសង្គ្រោះដំណាំស្រូវជូនប្រជាកសិករ និងបន្តចុះពិនិត្យជាក់ស្តែងនូវការបង្កបង្កើនផលស្រូវរបស់ប្រជាកសិករនៅក្នុងភូមិទួលម្ទេស ឃុំវត្តតាមិម និងភូមិក្បាលថ្នល់ ឃុំកំពង់ព្រៀងស្រុកសង្កែដែលកំពុងខ្វះខាតទឹកស្រោចស្រពប្រមាណជិត២,០០០ហិកតា ដើម្បីជួយសង្គ្រោះទៅតាមលទ្ធភាព និងបរិមាណទឹកដែលមាននៅផ្នែកខាងលើជូនដល់សហគមន៍កសិករ អាចស្រោចស្រពសង្រ្គោះដំណាំស្រូវ និងសម្រាប់ប្រើប្រាស់តាមលទ្ធភាពតាមជាក់ស្តែង។
លោក សុខ លូ បានឱ្យដឹងថា ថ្នាក់ដឹកនាំ អាជ្ញាធរខេត្តកំពុងគិតគូយ៉ាងយកចិត្តទុកដាក់ក្នុងការបើកប្រភពទឹកឲ្យបងប្អូនប្រើប្រាស់ស្រោចស្រព ក្រោមការណែនាំដ៏ខ្ពង់ខ្ពស់របស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា គឺសង្គ្រោះឲ្យអស់ពីលទ្ធភាពប្រសិនបើមានប្រភពទឹក ទោះបីប្រភពទឹកនៅឆ្ងាយពីកន្លែងកសិករបង្កបង្កើនផលក៏ដោយ អាជ្ញាធរ រដ្ឋបាលដែនដី មន្ទីរអង្គភាពជំនាញ នឹងខិតខំបូមទឹកជូនកសិករឲ្យអស់ពីលទ្ធភាពក្នុងការជួយសង្គ្រោះស្រូវដែលកំពុងខ្វះខាតទឹករបស់ប្រជាកសិករទាំងអស់។
លោកបានបន្តថា ថ្មីៗនេះ ខេត្តបានដឹកនាំក្រុមការងារចុះជួយនៅតាមស្រុកនានាមួយចំនួន និងបន្តចុះជួយបន្ទាន់នៅស្រុកផ្សេងទៀត ដែលចាំបាច់បំផុតក្នុងការបូមទឹកចូលស្រែសង្រ្គោះស្រូវកសិករ រហូត លើកលែងតែស្រែស្រូវណាដែលនៅឆ្ងាយខ្លាំងពេកពីប្រភពទឹក ដែលមិនអាចជួយសង្រ្គោះបានប៉ុណ្ណោះ។
ប្រជាកសិករ បានថ្លែងអំណរគុណដល់ថ្នាក់ដឹកនាំកំពូល ថ្នាក់ខេត្ត ថ្នាក់មូលដ្ឋាន ព្រមទាំងមន្រ្តីជំនាញ បានយកចិត្តទុកដាក់ខិតខំ ជួយដល់ពួកគាត់អស់ពីលទ្ធភាពផងដែរ៕
