(ភ្នំពេញ)៖ សម្តេចព្រះមហាសុមេធាធិបតី កិត្តិបណ្ឌិត អំ លឹមហេង សម្តេចព្រះសង្ឃនាយក គណៈមហានិកាយ នៃព្រះរាជាណាចក្រកម្ពុជា ទ្រង់បាន រាជានុញ្ញាតឱ្យ ព្រះមន្ត្រីសង្ឃ ខេត្តត្រាវិញ នៃសាធារណរដ្ឋសង្គមនិយម វៀតណាមចំនួន៤ព្រះអង្គ ដឹកនាំដោយព្រះតេជព្រះគុណ គឹម ថាំង មន្ត្រីសង្ឃសាលាគណ ខេត្តត្រាវិញ (ព្រះត្រពាំង) បានចូលក្រាបបង្គំគាល់ នៅព្រឹកថ្ងៃទី១៩ ខែមីនា ឆ្នាំ២០២៥ នៅវត្តមុនីសុវណ្ណ (ចំពុះក្អែក) ស្ថិតក្នុងសង្កាត់ព្រែកថ្មី ខណ្ឌច្បារអំពៅ រាជធានីភ្នំពេញ។
ក្នុងឱកាសដ៏ថ្លៃថ្លានោះ ព្រះមន្រ្តីសង្ឃទាំង៤ព្រះអង្គ បានចូលក្រាបថ្វាយបង្គំគាល់នាំយកនូវវត្តប្រណិប័តរ៍តាមទំនៀមនៃបវេណីព្រះពុទ្ធសាសនា ថ្វាយចំពោះសម្តេចជាអម្ចាស់ និងទូលសាកសួរអំពីព្រះរាជសុខទុក្ខ។
ព្រះតេជព្រះគុណ គឹម ថាំង បានក្រាបបង្គំទូលថ្វាយ សម្តេចព្រះមហាសុមេធាធិបតី កិត្តិបណ្ឌិត ថា ការនិមន្តមកចូលក្រាបបង្គំគាល់របស់គណ:ប្រតិភូសង្ឃ ខេត្តត្រាវិញនាពេលនេះ មានគោលបំណងពីរធំៗគឺ៖
*ទី១៖ ដើម្បីទូលថ្វាយ ពីស្ថានភាពនៃការបដិបត្តិធម្មវិន័យ និងការសិក្សារៀនសូត្ររបស់ព្រះសង្ឃគ្រប់កម្រិតពុទ្ធិកសិក្សានៅខេត្តត្រាវិញ។
*ទី២៖ ស្នើសុំឱ្យសមណសិស្សដែលបានបញ្ចប់ថ្នាក់ពុទ្ធិកមធ្យមសិក្សាទុតិយភូមិនៅខេត្តត្រាវិញ បានមកបន្តការសិក្សានៅពុទ្ធិកសាកលវិទ្យាល័យព្រះសីហនុរាជ លើឯកទេស ៣សំខាន់ៗ គឺ ឯកទេសភាសាបាលី-សំស្រ្កឹត ទស្សនវិជ្ជាព្រះពុទ្ធសាសនា និងអក្សរសាស្ត្រ។
សម្តេចជាអម្ចាស់ បានថ្លែងអំណរគុណ ចំពោះព្រះមន្រ្តីសង្ឃគ្រប់ព្រះអង្គ ដែលបានមកថ្វាយបង្គំគាល់ នាពេលនេះ និងបានទទួលយកដើម្បីជួយជ្រោមជ្រែងឱ្យព្រះសង្ឃខេត្តត្រាវិញបានមកសិក្សា នៅពុទ្ធិកសាកលវិទ្យាល័យ ព្រះសីហនុរាជ តាមជំនាញដែលបានសំណូមពរខាងលើ។ ទន្ទឹមនឹងនោះ សម្តេចជាអម្ចាស់ ក៏នឹងសម្រួលឱ្យមានការស្នាក់អាស្រ័យ នៅតាមបណ្ដាវត្តមួយចំនួននៅរាជធានីភ្នំពេញ។
សម្តេចព្រះមហាសុមេធាធិបតី កិត្តិបណ្ឌិត អំ លឹមហេង បានសព្វព្រះទ័យ ប្រោសព្រះរាជទាននូវពរជ័យ សិរីមង្គល ជូនចំពោះគណៈប្រតិភូព្រះសង្ឃនិងប្រជាពុទ្ធបរិស័ទ ខេត្តត្រាវិញ ទាំងអស់ ព្រមទាំងប្រទានពរ ឱ្យបានជួបប្រទះនូវពុទ្ធពរទាំង៤ប្រការ គឺអាយុ វណ្ណៈ សុខៈ ពលៈ កុំបីឃ្លាងឃ្លាតឡើយ៕
