(សៀមរាប)៖ រដ្ឋបាលខេត្តសៀមរាប នៅថ្ងៃទី០២ ខែមេសា ឆ្នាំ២០២៥នេះ បានបើកកិច្ចប្រជុំអនុគណៈកម្មការព័ត៌មាន អនាម័យ សុខភាព ផ្គត់ផ្គង់ទឹក និងភ្លើង
ក្នុងព្រឹត្តិការណ៍អង្គរសង្រ្កាន្តឆ្នាំ២០២៥ ក្រោមវត្តមានរបស់លោក នាក់ ណេរ៉ុន និងលោក សុខ ថុល អភិបាលរងខេត្តសៀមរាប និងជាសហប្រធានដឹកនាំប្រជុំ និងសមាសភាពមកពីមន្ទីរ អង្គភាពជំនាញចូលរួមផងដែរ។
ក្នុងកិច្ចប្រជុំនេះ លោកសហប្រធានអង្គប្រជុំបានសំណូមពរឲ្យគ្រប់មន្ទីរ អង្គភាព ជាសមាជិកនៃអនុគណៈកម្មការ លើកនូវរាល់ផែនការដែលបានគ្រោង ជាមួយក្រុមគណៈកម្មការរៀបចំអង្គរសង្ក្រាន្ត (សហភាពសហព័ន្ធយុវជនកម្ពុជា ) ព្រមទាំងសំណូមពរមួយចំនួន ដើមី្បធ្វើកិច្ចពិភាក្សានៃកិច្ចប្រជុំនាពេលនេះ ដោយផ្តោតទៅលើការងាររៀបចំប្រព័ន្ធអគ្គិសនីសម្រាប់ផ្គត់ផ្គង់, ទីតាំងសម្រាប់ប្រចាំការរបស់សុខាភិបាល, ការរៀបចំទីតាំងដាក់បង្គន់អនាម័យ, ការរៀបចំប្រព័ន្ធទឹក និងការសម្អាតបរិស្ថាន ព្រមទាំងបង្កើនប្រព័ន្ធផ្សព្វផ្សាយព័ត៌មានឲ្យបានទូលំទូលាយ។
ក្នុងកិច្ចពិភាក្សាបានល្អិតល្អន់ស៊ីជម្រៅទៅលើការងាររៀបចំអង្គរសង្ក្រាន្ត ដែលបានកំណត់ទីតាំងកម្សាន្តទាំង៤កន្លែង មាននៅមុខប្រាសាទអង្គរវត្ត, សួនច្បារព្រះរាជដំណាក់, តាមដងស្ទឹងសៀមរាប និងតំបន់អង្គរឃ្យុងយូ កន្លែងប្រណាំងរទេះគោ ក្របី។
លោក នាក់ ណេរ៉ុន និងលោក សុខ ថុល ជំរុញដល់គ្រប់មន្ទីរ អង្គភាព ដែលទទួលភារកិច្ចទាំងនេះ ត្រូវខិតខំយកចិត្តទុកដាក់លើការងារមួយចំនួន ក្នុងនោះអង្គភាពអគ្គីសនី ត្រូវត្រួតពិនិត្យឲ្យបានត្រឹមត្រូវ នូវខ្សែបណ្តាញភ្លើង ដើម្បីធានាឲ្យបាននូវសុខសុវត្ថិភាពនៅក្នុងព្រឹត្តិការណ៍អង្គរសង្រ្កាន និងមន្ទីរបរិស្ថាន ត្រូវរៀបចំឲ្យមានបង្គន់អនាម័យចល័ត នៅតាមគោលដៅដែលបានកំណត់ ដែលបានលើកឡើងទាំងការសម្អាតអនាម័យ និងបរិស្ថាន ព្រមទាំងការដឹកជញ្ជូនសម្រាមជាដើម។
លោកជាសហប្រធាន បានបន្តថា មន្ទីរសុខាភិបាល ត្រូវធ្វើការត្រួតពិនិត្យនៅតាមគោលដៅ ដែលជាកន្លែងប្រចាំការ និងក្រុមការងារសម្រាប់សង្រ្គោះបន្ទាន់ក្នុងព្រឹត្តិការណ៍អង្គរសង្រ្កាន ព្រមទាំងសូមឲ្យអង្គភាពរដ្ឋាករទឹក ធ្វើការរៀបចំខ្សែបណ្តាញផ្គត់ផ្គត់ផ្គង់ទឹកស្អាត នៅគ្រប់គោលដៅដែលមានបន្ទប់ទឹក និងទឹកស្រោចស្រព ព្រមទាំងបង្កើនប្រព័ន្ធផ្សព្វផ្សាយព័ត៌មានឲ្យបានទូលំទូលាយដល់មហាជន។
ម៉្យាងទៀត សូមឲ្យអាជ្ញាធរក្រុងសៀមរាប ធ្វើការផ្សព្វផ្សាយដល់ប្រជាពលរដ្ឋ ម្ចាស់សណ្ឋាគារ ផ្ទះសំណាក់ និងភោជនីយដ្ឋាន ដែលស្ថិតនៅតាមបណ្តាដងវិថី ដែលត្រូវបានហាមឃាត់ធ្វើចរាចរណ៍ឆ្លងកាត់ នៅក្នុងព្រឹត្តិការណ៍អង្គរសង្ក្រាន្ត ដើមី្បដាក់ពាក្យស្មើសុំប័ណ្ណសម្គាល់ក្នុងការចេញចូល។
លោកបានសង្កត់ធ្ងន់ទៅលើសុវត្ថិភាពតាមដងផ្លូវ ដែលសម្បូរដើមឈើធំ នៅពេលមានខ្យល់ ភ្លៀង តែងជួបប្រទះបញ្ហាការបាក់មែកឈើងាប់ៗ បណ្តាឲ្យប៉ះពាល់ដល់យានយន្ត និងអ្នកដំណើរ ព្រមទាំងសុំឲ្យមន្ទីរដែលពាក់ព័ន្ធ ធ្វើការកាត់នូវរាល់មែកឈើទាំងនោះ ដើមី្បធានាសុវត្ថិភាពដល់ភ្ញៀវទេសចរជាតិ និងអន្តរជាតិ ដែលបានមកចូលរូម «ព្រឹត្តិការណ៍អង្គរសង្រ្គាន្ត»។
ម៉្យាងទៀត ដោយខេត្តសៀមរាបជាម្ចាស់ផ្ទះ ក្នុងកិច្ចសហការរៀបចំព្រឹត្តិការណ៍នេះឡើង ជាមួយសហភាពសហព័ន្ធយុវជនកម្ពុជា ដើម្បីឆ្ពោះទៅភាពជោគជ័យរបស់យើង។ ព្រឹត្តិការណ៍អង្គរសង្ក្រាន្តឆ្នាំ២០២៥នេះ ក៏ត្រូវបានចងក្រងជាប្រវត្តិសាស្ត្រ ដើមី្បឆ្ពោះទៅការចុះបញ្ជីជាសម្បត្តិបេតិកភណ្ឌពិភពលោក។
លោកក៏បានធ្វើការផ្តាំផ្ញើដល់មន្ទីរ អង្គភាព និងសមាជិកអនុគណៈកម្មការទាំងអស់ ត្រូវមានការទទួលខុសត្រូវខ្ពស់ ដើមី្បលើកកិត្តិសយព្រះរាជាណាចក្រកម្ពុជា ក៏ដូចខេត្តសៀមរាប ដោយត្រូវអនុវត្តទៅតាមតួនាទី និងជំនាញរបស់ខ្លួន ឲ្យសម្រេចបានជោគជ័យ៕
