(ស្វាយរៀង)៖ កម្លាំងអធិការដ្ឋាននគរបាលស្រុកស្វាយជ្រំ បានឃាត់ខ្លួនមុខសញ្ញាជាក្មេងទំនើងចំនួន២នាក់ ដើម្បីយកមកអប់រំ ណែនាំធ្វើកិច្ចសន្យា និងឲ្យអាណាព្យាបាលធ្វើលិខិតសុំធានាយកទៅអប់រំ កែប្រែនៅផ្ទះបន្ត។
លោក សោម សុភ័ណ្ឌ អធិការនគរបាលស្រុកស្វាយជ្រំ បានឲ្យដឹងនារសៀលថ្ងៃទី២ ខែមេសា ឆ្នាំ២០២៥នេះថា ក្រោមការដឹកនាំពីលោកឧត្តមសេនីយ៍ទោ ពេជ្រ វីរៈ ស្នងការនគរបាលខេត្ត ដាក់បទបញ្ជាយ៉ាងម៉ឺងម៉ាត់ និងធ្វើដូចភ្លៀងរលឹម ចំពោះក្រុមក្មេងទំនើងដែលបង្កអុកឡុកដល់ប្រជាពលរដ្ឋក្នុងមូលដ្ឋាន។
លោកបានបញ្ជាក់ថា ជាក់ស្ដែងនៅថ្ងៃទី៣១ ខែមីនា ឆ្នាំ២០២៥ កម្លាំងប៉ុស្តិ៍នគរបាលរដ្ឋបាលក្រោលគោ បានធ្វើការល្បាតចល័តតាមភូមិសាស្ត្រក្នុងមូលដ្ឋាន បានប្រទះឃើញ និងឃាត់ខ្លួនមុខសញ្ញាក្មេងទំនើង ចំនួន២នាក់ នៅត្រង់ចំណុចខាងជើងក្លោងទ្វារវត្តបឹងរ៉ៃ ស្ថិតភូមិព្រៃខ្លា ឃុំក្រោលគោ ស្រុកស្វាយជ្រំ។
ក្រោយមកកម្លាំងជំនាញនៃអធិការដ្ឋានគរបាលស្រុកស្វាយជ្រំ សហការជាមួយកម្លាំងប៉ុស្តិ៍នគរបាលរដ្ឋបាលក្រោលគោ បានធ្វើនាំខ្លួនមុខសញ្ញាក្មេងទំនើងទាំង២នាក់ មកកាន់អធិការដ្ឋាននគរបាលស្រុកស្វាយជ្រំ ដើម្បីអប់រំណែនាំ ធ្វើកិច្ចសន្យា និងធ្វើតេស្តស្វែងរកសារធាតុញៀន ជាលទ្ធផលអវិជ្ជមាន (-) ព្រមទាំងឲ្យអាណាព្យាបាលធ្វើ លិខិតសុំធានាយកទៅអប់រំកែប្រែនៅផ្ទះបន្ត៕
