(ភ្នំពេញ)៖ លោកស្រីកិត្តិបណ្ឌិត អ៊ឹង កន្ថាផាវី រដ្ឋមន្រ្តីក្រសួងកិច្ចការនារី នៅថ្ងៃ០២ ខែមេសា ឆ្នាំ២០២៥នេះ បានគូសបញ្ជាក់ថា យោងតាមរបាយការណ៍ស្រាវជ្រាវនានា បានបង្ហាញថា ស្ត្រីកម្ពុជាយើង១នាក់ ក្នុងចំណោម៥នាក់ ដែលមានអាយុពី១៥-៤៥ឆ្នាំ ធ្លាប់រងគ្រោះដោយអំពើហិង្សាលើរាងកាយ។

លោកស្រីកិត្តិបណ្ឌិត អ៊ឹង កន្ថាផាវី បានឲ្យដឹងទៀតថា ស្ត្រីដែលមានអាយុពី១៥-៤៩ឆ្នាំ ចំនួន៦% បានរាយការណ៌ថា ធ្លាប់ទទួលរងអំពើហិង្សាផ្លូវភេទ យ៉ាងហោចណាស់ម្តង ក្នុង១មួយជីវិត ក្នុងនោះ៥% បានរាយការណ៍ថា ពួកគេធ្លាប់ទទួលរងនូវការបៀតបៀនផ្លូវភេទ។

ក្នុងពិធីបើក «កិច្ចប្រជុំបូកសរុបការងារប្រចាំឆ្នាំ២០២៤ និងលើកទិសដៅការងារ ឆ្នាំ២០២៥» របស់ក្រសួងកិច្ចការនារី នៅថ្ងៃទី០២ ខែមេសា ឆ្នាំ២០២៥ ពាក់ព័ន្ធនឹងបញ្ហានេះ លោកស្រីកិត្តិបណ្ឌិត អ៊ឹង កន្ថាផាវី ក៏សូមឱ្យបណ្តាភាគីពាក់ព័ន្ធទាំងអស់ ត្រូវបន្តយកចិត្តទុកដាក់ និងព្យាយាមធ្វើឱ្យមានការថយចុះបន្ថែមទៀតផងដែរ។

លោកស្រីរដ្ឋមន្ដ្រី បានលើកឡើងថា នៅពេលដែលយើង បាននិងកំពុងខិតខំពង្រឹងសីលធម៌សង្គម តម្លៃស្ត្រី និង គ្រួសារខ្មែរ យើងក៏មិនអាចមើលរំលងអំពើហិង្សាក្នុងគ្រួសារ ដែលនៅតែបន្តកើតមានជាញឹកញាប់ ជាពិសេសលើស្ត្រី ដែលរាជរដ្ឋាភិបាល បាននិងកំពុងបន្តយកចិត្តទុកដាក់ ក្នុងការដោះស្រាយ។

លោកស្រីកិត្តិបណ្ឌិត អ៊ឹង កន្ថាផាវី បានឲ្យដឹងថា បើយើងក្រឡេកទៅមើលចំណុចវិជ្ជមាន ស្ត្រីកម្ពុជា បានចូលរួមចំណែកយ៉ាងធំធេង ក្នុងកិច្ចគាំពារសង្គម ដែលក្នុងនោះយើងសង្កេតឃើញថា ស្ត្រីខ្មែរប្រមាណជាង៦១% ជាម្ចាស់និងជាអ្នកដឹកនាំសហគ្រាសធុនមីក្រូ តូច និងមធ្យម។

ដែលតួលេខនេះ បានឆ្លុះបញ្ចាំងឱ្យឃើញពីការដើរតួនាទីយ៉ាងសំខាន់បស់ស្ត្រីខ្មែរ ក្នុងការបង្កើនប្រាក់ចំណូល កាត់បន្ថយភាពក្រីក្រ និងកែលម្អសុខុមាលភាពគ្រួសារនាពេលបច្ចុប្នន្ននេះ។ នេះជាការគូសបញ្ជាក់បន្ថែម​ របស់លោកស្រីកិត្តិបណ្ឌិត អ៊ឹង កន្ថាផាវី។

ទន្ទឹមគ្នានេះ ក្រសួងកិច្ចការនារី បានដាក់ចេញនូវផែនការ យុទ្ធសាស្រ្តនារីរតនៈទី៦ ឆ្នាំ២០២៤-២០២៨ ដើម្បីអនុវត្តស្របតាមការចង្អុលបង្ហាញ នៅក្នុងក្របខ័ណ្ឌយុទ្ធសាស្រ្ត បញ្ចកោណដំណាក់កាលទី១ មានភាពស៊ីចង្វាក់ ជាមួយនឹងក្របខ័ណ្ឌគោលនយោបាយ និងកម្មវិធីជាតិថ្មីៗតាមវិស័យ ឆ្លើយតបនឹងស្ថានភាពនិងការវិវត្តរបស់សង្គម។

ផែនការយុទ្ធសាស្រ្តនេះ គឺជាផែនការមេសម្រាប់ក្រសួងនិងដៃគូពាក់ព័ន្ធ ក្នុងការលើកកម្ពស់សមភាពយេនឌ័រ និងបង្កើនភាពអង់អាចដល់ស្រ្តីនៅកម្ពុជារយៈពេល៥ឆ្នាំ២០២៤-២០២៨ ក្នុងនោះចំណុចសំខាន់ៗនៅក្នុងនារីរតនៈទី៦ គឺការលើកកម្ពស់សីលធម៌សង្គម តម្លៃស្រ្តី និងគ្រួសារ៖

* ពង្រឹងនិងបង្កើនកិច្ចសហការក្នុងការអប់រំអំពីសីលធម៌និងសុជីវធម៌ដល់សិស្ស និស្សិត និងយុវជនទាំងក្នុង និងក្រៅប្រព័ន្ធអប់រំ រួមទាំងការបន្តលើកកម្ពស់ការគោរពសីលធម៌ តម្លៃស្រ្តី សេចក្តីថ្លៃថ្នូរ ក្នុងគ្រួសារនិងសង្គមខ្មែរ។

* គណៈកម្មាធិការជាតិនឹងដឹកនាំនិងសម្របសម្រួលក្នុងការរៀបចំផែនទីបង្ហាញផ្លូវ ដើម្បីបណ្តុះទម្លាប់មានសីលធម៌ គុណធម៌ និងសុជីវធម៌ និងទម្លាប់គោរពច្បាប់និងវិន័យ និងបញ្ចូល ការអប់រំអំពីព្រះពុទ្ធសាសនា និងផ្នែកសិល្បៈ វប្បធម៌ខ្មែរ ទាំងរូបីនិងអរូបី ទៅក្នុងកម្មវិធីសិក្សាគ្រប់កម្រិត ព្រមទាំងផ្សព្វផ្សាយនិងបញ្ជ្រាបទៅគ្រប់ក្រសួង-ស្ថាប័ន ទាំងថ្នាក់ជាតិ និងថ្នាក់ក្រោមជាតិ។

* សិក្សាស្រាវជ្រាវនិងពិគ្រោះយោបល់ដោយទូលំទូលាយ ក្នុងការរៀបចំកញ្ចប់កម្មវិធីនិងមាតិកាអប់រំផ្សព្វផ្សាយ (Package of Media Content & Programs) ស្តីពីការលើកកម្ពស់សីលធម៌សង្គម តម្លៃស្រ្តី និងគ្រួសារខ្មែរ នៅក្នុងបរិបទសង្គមដែលមានអារ្យធម៌ខ្ពស់។

* បន្តអនុវត្តកម្មវិធីចិញ្ចឹមកូនតាមបែបវិជ្ជមាន និងកម្មវិធីទារកដ្ឋាននៅកន្លែងធ្វើការ ទាំងនៅតាមគ្រឹះស្ថានសាធារណៈនិងឯកជន ទាំងនៅថ្នាក់ជាតិនិងក្រោមជាតិ រួមទាំងការលើកកម្ពស់ទំនាក់ទំនងអន្តរជំនាន់ ដើម្បីបង្កើនសុខុមាលភាពគ្រួសារ និងសង្គម៕