(បាត់ដំបង)៖ សាខាកាកបាទក្រហមកម្ពុជា ខេត្តបាត់ដំបង នៅថ្ងៃទី០២ ខែមេសា ឆ្នាំ២០២៥ បានដំណើរការកិច្ចប្រជុំត្រួត-ពិនិត្យសវនកម្មផ្ទៃក្នុង លើការងារគ្រប់គ្រងហិរញ្ញវត្ថុរបស់សាខា កាកបាទក្រហមកម្ពុជា ខេត្តបាត់ដំបង សម្រាប់ដំណាច់ឆ្នាំ ២០២៤ ក្រោមអធិបតីភាព លោក សួស សុភ័ក្ភ្រ ហេរញ្ញឹកគណៈកម្មាធិការសាខា និងជាប្រធានក្រុមការងារសវនកម្មផ្ទៃក្នុង តំណាងលោក សុខ លូ ប្រធានគណៈកម្មាធិការសាខា ដែលមានការអញ្ជើញការចូលរួមពីសមាជិកក្រុមការងារសរនកម្មផ្ទៃក្នុង លោក នាយក នាយករងនិងមន្ត្រីក្រុមប្រតិបត្តសាខា សរុបអ្នកចូលរួមចំនួន ៩រូប ស្រី ២រូប នៅសាលប្រជុំសាខាកាកបាទក្រហមកម្ពុជា ខេត្តបាត់ដំបង។

ថ្លែងក្នុងកិច្ចស្វាគមន៍ លោក កុសុម សុភីនារ៉ា នាយកប្រតិបត្តិសាខាបានជម្រាបជូនប្រធានអង្គប្រជុំយោង លិខិតលេខ ០០៤/២៥កក្រក រហ ចុះថ្ងៃទី១២ ខែមីនា ឆ្នាំ២០២៥ ស្តីពីការអនុវត្តការងារសវនកម្ម ថ្ងៃក្នុង រៀងរាល់ដំណាច់ឆ្នាំហិរញ្ញកិច្ច។ កិច្ចប្រជុំសវនកម្មនេះ ជាការលើកកម្ពស់កិត្តិនាមកាកបាទក្រហម កម្ពុជា និងជាការបំពេញកាតព្វកិច្ចរបស់ កាកបាទក្រហមកម្ពុជាតាមធម្មនុញ្ញរបស់សហព័ន្ធអន្តរជាតិ ក្នុងនាមជា សមាជិកទី៨៥ការអនុវត្តការងារសវនកម្មផ្ទៃក្នុងសាខា និងធ្វើបច្ចុប្បន្នភាពបញ្ជីសារពើភ័ណ្ឌប្រចាំឆ្នាំ រៀងរាល់ ដំណាច់ឆ្នាំហិរញ្ញកិច្ចធ្វើឱ្យមានប្រសិទ្ធភាព ។

របៀបវារៈនៃកិច្ចប្រជុំមានចំនួន៤ចំណុចគឺ៖
១៖ មតិសំណេះសំណាលនិងបើកដំណើរការសវនកម្ម
២៖ ពិនិត្យ និងផ្ទៀងផ្ទាត់ទៅលើដំណើរការ នៃប្រតិបត្តិការហិរញ្ញវត្ថុដំណើរការពិនិត្យប្រតិបត្តិការ -របាយការណ៍ចំណូល-ចំណាយ (បញ្ជីបេឡា) -របាយការណ៍ធនាគារ និងគ្រឹះស្ថានមីក្រូហិរញ្ញវត្ថុ -របាយការណ៍សមតុល្យតាមគណនីប្រចាំត្រីមាសទី១ ដល់ត្រីមាសទី៤ ឆ្នាំ ២០២៤ -របាយការណ៍ធៀបចំណូល-ចំណាយឆ្នាំ២០២៤ -បញ្ជីសារពើភ័ណ្ឌទ្រព្យសម្បត្តិអចលនវត្ថុ និងចលនវត្ថុប្រចាំឆ្នាំ២០២៤
៣៖ មតិចូលរួមសមាជិក សមាជិកា
៤៖ មតិបូកសរុបលទ្ធផលសវនកម្ម

ថ្លែងក្នុងពិធីបើកកិច្ចប្រជុំនោះដែរ លោក សួស សុភ័ក្ភ្រ ហេរញ្ញឹកគណៈកម្មាធិការសាខា និងជាប្រធានក្រុមការងារសវនកម្មផ្ទៃក្នុងបានពាំនាំនូវប្រសាសន៍ផ្ដាំផ្ញើសួរសុខទុក្ខជូន សមាជិក សមាជិកា នៃកិច្ចប្រជុំ ពីសំណាក់ លោក សុខ លូ ប្រធានគណៈកម្មាធិការសាខា ជាពិសេស លោកសន្តិបណ្ឌិត សុខ ផល រដ្ឋលេខាធិការក្រសួងមហាផ្ទៃ និងជាប្រធានកិត្តិយសសាខា និងបានសំដែងនូវការកោតសរសើរ ដែលបានខិតខំប្រឹងប្រែងយកអស់ពីកម្លាំងកាយចិត្តប្រាជ្ញា ស្មារតីទទួលខុសត្រូវចូលរួមយ៉ាងសកម្មក្នុងការបំពេញបេសកកម្មមនុស្សធម៌របស់ លោក លោកស្រី ទាំងគណៈកិត្តិយសសាខា គណៈកម្មាធិការសាខា ក្រុមប្រតិបត្តិសាខា អនុសាខាក្រុង-ស្រុក ក្រុមកាកបាទក្រហមឃុំសង្កាត់ អាជ្ញាធរគ្រប់លំដាប់ថ្នាក់បានរួមគ្នាដោះស្រាយឆ្លើយតបដល់ប្រជាជនរងគ្រោះ និងងាយរងគ្រោះមហន្តរាយបំផុត និងការងារសង្គមជាច្រើនទៀត ទទួលបានកាន់តែប្រសើរថែមទៀត ដោយមិនគិតពេលវេលាឡើយ ។

កិច្ចប្រជុំក្រុមការងារសវនកម្មផ្ទៃក្នុងក្នុងគោលចំណងដើម្បីពិនិត្យសកម្មភាពនៃការងារគ្រប់គ្រងបញ្ជីសាពើភ័ណ្ឌដែលជាទ្រព្យសម្បត្តិសាខាក៏ដូចសកម្មភាពរកចំណូលហើយសកម្មភាពនៃការចំណាយរបស់ក្រុមប្រតិបត្តិសាខាយោងតាមផែនការចំណាយប្រចាំឆ្នាំរបស់សាខាសំដៅយ៉ាងណាអោយមានតម្លាភាពនិងសុក្រិត្យភាពដើម្បីកង្កើនដល់ទំនុបចិត្តនិងគណនេយ្យភាពចំពោះសាខានិងសប្បុរសជនក្នុងការបរិច្ចាគថវិកាជូនសាខាកាកបាទក្រហមកម្ពុជា ខេត្តសម្រាប់អនុវត្តន៍សកម្មភាពមនុស្សធម៌ជួយសង្គ្រោះជនងាយរងគ្រោះ និងរងគ្រោះដោយគ្រោះមហន្តរាយផ្សេងៗ។

ចុងបញ្ចប់ លោក សួស សុភ័ក្ភ្រ មានប្រសាសន៍បូកសរុបក្នុងអង្គប្រជុំ និងក្រោយពីបានស្តាប់ការពិភាក្សាពិនិត្យកែសម្រួលទៅលើខ្លឹបសារសម្រាប់អនុវត្តបន្តឲ្យស្រប ទៅនឹងយុទ្ធសាស្ត្របញ្ចកោណ របស់រាជរដ្ឋាភិបាលនីតិកាលទី៧ និងយុទ្ធសាស្ត្រ ២០២១-២០៣០ របស់កាកបាទក្រហមកម្ពុជា៕