(ឧត្តរមានជ័យ)៖​ លោក ផាង វី ប្រធាននាយកដ្ឋានធារាសាស្ត្រកសិកម្ម នៃក្រសួងធនធានទឹក និងឧតុនិយម តំណាងលោក ថោ ជេដ្ឋា រដ្ឋមន្ត្រីក្រសួងធនធានទឹក និងលោក ញឺន កួន ប្រធានមន្ទីរធនធានទឹក និងឧតុនិយម ខេត្តឧត្តរមានជ័យ នៅរសៀលថ្ងៃទី០១ ខែមេសា ឆ្នាំ២០២៥ បានដឹកនាំក្រុមការងារអញ្ជើញចុះពិនិត្យ មើលស្ថានភាពអាងស្តុកទឹកធំៗ ក្នុងខេត្តឧត្តរមានជ័យ បន្តាប់ពីមានបាតុភូតគ្រោះរញ្ជូយដីកើតឡើង នៅប្រទេសមីយ៉ាន់ម៉ា និងប្រទេសថៃ កន្លងទៅថ្មីៗនេះ។​

លោក ញឺន កួន បានថ្លែងប្រាប់ឱ្យដឹងនៅព្រលប់ថ្ងៃនេះថា ដោយអនុវត្តតាមបទបញ្ជារបស់លោក ថោ ជេដ្ឋា រដ្ឋមន្ត្រីក្រសួងធនធានទឹក និងឧត្តុនិយម គឺបានណែនាំដល់នាយកដ្ឋាន ធារាសាស្ត្រកសិកម្ម នៃក្រសួងធនធានទឹក និងឧត្តុនិយម និងមន្ទីរធនធានទឹក និងឧត្តុនិយម ​ខេត្តឧត្តរមានជ័យ ចុះពិនិត្យមើលលើប្រព័ន្ធធារាសាស្ត្រ ក្នុងខេត្តទាំងអស់ ខ្លាចរងផលប៉ះពាល់ដោយគ្រោះរញ្ជួយដីនេះ។​

លោកប្រធានមន្ទីរ បានថ្លែងបញ្ជាក់ឱ្យដឹងទៀតថា ការចុះពិនិត្យនាពេលនេះ គឺចុះពិនិត្យអាងស្តុកទឹកចំនួន២កន្លែង រួមមាន៖ អាងទឹកថ្មី និងអាងទឹកស្ទឹងស្រែង២។

តាមការចុះពិនិត្យជាក់ស្តែង អាងទឹកទាំងអស់ក្នុងខេត្តឧត្តរមានជ័យ ពុំទទួលរងនូវផលប៉ះពាល់ ដោយសារឥទ្ធិពលនៃបាតុភូតរញ្ជួយដីនៅប្រទេសមីយ៉ាន់ម៉ា និងប្រទេសថៃ នៅថ្ងៃទី២៨ ខែមីនា ឆ្នាំ២០២៥ វេលាម៉ោង ១៣៖២០ នាទីរសៀល ដែលមានកម្រិត៧.៧រ៉ិចទ័រ នោះទេ៕