(សៀមរាប)៖ លោក សុខ សប្បាយណា ប្រធានក្រុមប្រតិបត្តិអង្គរសង្ក្រាន្តឆ្នាំ២០២៥ បានលើកឡើងថា ព្រឹត្តិការណ៍អង្គរសង្ក្រាន្ត នឹងចូលរួមផ្សព្វផ្សាយពីគោលដៅទេសចរណ៍ និងសិល្បៈ ប្រពៃណី វប្បធម៌ នៅក្នុងខេត្តសៀមរាប ទៅដល់ភ្ញៀវទេសចរជាតិ និងអន្តរជាតិ កាន់តែទូលំទូលាយថែមទៀត។
ការលើកឡើងយ៉ាងដូច្នេះ របស់លោក សុខ សប្បាយណា នៅក្នុងសិក្ខាសាលាផ្សព្វផ្សាយ និងជំរុញការផ្សព្វផ្សាយពីព្រឹត្តិការណ៍អង្គរសង្ក្រាន្តឆ្នាំ២០២៥ ក្រោមប្រធានបទ «ញញឹមសាទរសង្ក្រាន្តឆ្នាំថ្មី» នាថ្ងៃទី០២ ខែមេសា ឆ្នាំ២០២៥នេះ។
សិក្ខាសាលានេះ ដោយមានការចូលរួមពីលោក ង៉ូវ សេងកាក់ អភិបាលរងខេត្តសៀមរាប និងលោក សោម រតនា ប្រធានក្រុមការងារផ្សព្វផ្សាយ និងទំនាក់ទំនងសាធារណៈរបស់អង្គរសង្ក្រាន្ត ព្រមទាំងថ្នាក់ដឹកនាំ មន្ទីរ អង្គភាព វិស័យឯកជន អ្នកផលិមាតិកា និងនិងអ្នកសារព័ត៌មានជាច្រើនចូលរួមផងដែរ។
លោកបានបន្តថា កាលពីឆ្នាំ២០១៣ ដែលឆ្នាំចាប់កំណើតព្រឹត្តិការណ៍អង្គរសង្ក្រាន្តនេះ ខេត្តសៀមរាបទទួលបានអ្នកទេសចរណ៍ចំនួន១៧ម៉ឺននាក់ ហើយចំនួននេះ មានការកើនឡើងជាលំដាប់ដោយ នៅក្នុងនោះ ក្នុងឆ្នាំ២០២៣ ដែលជាខួប១០ឆ្នាំរបស់អង្គរសង្ក្រាន្ត ខេត្តសៀមរាប ទទួលបានអ្នកទេសចរចូលមកកម្សាន្តក្នុងព្រឹត្តិការណ៍នេះ ប្រមាណជាង២លាននាក់ និងមានរំហូរសាច់ប្រាក់ចូលមកក្នុងខេត្តនេះប្រមានជាង១២៦លានដុល្លារអាម៉េរិក។
លោកបន្តថា អង្គរសង្ក្រាន្តបង្កើតឡើង គឺដើម្បីជាតិ ដើម្បីបំផុសស្មារតីថា «ខ្មែរធ្វើបាន»។ ចាប់តាំងពីឆ្នាំ២០១៣មក ព្រឹតិ្តការណ៍អង្គរសង្ក្រាន្ត បានរួមចំណែកយ៉ាងធំធេង នៅក្នុងការជួយដល់វិស័យទេសចរណ៍របស់ខេត្តសៀមរាប តាមរយៈការបង្ហាញនូវគោលដៅទេសចរណ៍សំខាន់ៗ និងបានគាស់កកាយនូវទម្រង់សិល្បៈ វប្បធម៌ និងរបាំប្រជាប្រិយរបស់ខ្មែរយើងជាច្រើនទម្រង់ទៅកាន់ភ្ញៀវទេសចរណ៍ជាតិ និងអន្តរជាតិ។
លោក សុខ សប្បាយណា បញ្ជាក់ថា សម្រាប់អង្គរសង្ក្រាន្តឆ្នាំ២០២៥នេះ ក៏មិនខុសគ្នាពីព្រឹត្តិការណ៍មុនៗដែរ ពោលអង្គរសង្ក្រាន្តនៅតែរក្សាបានគោលបំណងរបស់ខ្លួន គឺការផ្សព្វផ្សព្វអំពីទេសចរណ៍ និងសិល្បៈវប្បធម៌ ក្នុងនោះអង្គរសង្ក្រាន្តបានលើកយកនូវកម្មវិធីកម្សាន្តធំៗចំនួន៣៨កម្មវិធី ដោយក្នុងកម្មវិធីនីមួយៗ មានការសម្តែងសិល្បៈ ល្បែងប្រជាប្រិយ របស់ខ្មែរជាច្រើនទម្រង់ផ្សេងៗគ្នា។
លោកបន្ថែមថា ដូច្នេះការចូលរួមផ្សព្វផ្សាយអំពីអង្គរសង្ក្រាន្ត ជាការចូលរួមយ៉ាងសំខាន់ក្នុងការជួយដល់សេដ្ឋកិច្ចរបស់អ្នកខេត្តសៀមរាប តាមរយៈការបង្ហាញនូវគោលដៅទេសចរណ៍សំខាន់ៗរបស់ខេត្តសៀមរាបទៅកាន់ពិភពលោក។
លោក សោម រតនា បានលើកឡើងដែរថា ជាការពិតអង្គរសង្ក្រាន្តបានជួយរួមចំណែកធំនៅក្នុងការជួយដល់វិស័យទេសចរណ៍ សិល្បៈប្រពៃណីវប្បធម៌របស់ខ្មែរ។ លោកបន្តថា ប៉ុន្តែអង្គរសង្ក្រាន្ត ក៏នៅតែទទួលការវាយប្រហារ លាបពណ៌ពីសំណាក់មជ្ឈដ្ឋានមួយចំនួន ដែលការនេះ ក៏ជាផ្នែកមួយធ្វើឲ្យប៉ះពាល់ដល់កិច្ចខិតខំប្រឹងប្រែងរបស់ក្រុមយុវជនស្ម័គ្រចិត្ត ជាពិសេសសហភាពសហព័ន្ធយុវជនកម្ពុជា ដែលជាអ្នករៀបចំព្រឹត្តិការណ៍នេះ។
លោកបានបន្តថា ដូច្នេះការផ្សព្វផ្សាយដែលចំគោលដៅ ក៏ជាចំណែកមួយក្នុងការលុបបំបាត់ព័ត៌មានបែបលាបពណ៌នេះផង និងបានជួយដល់វិស័យទេសចរណ៍ សិល្បៈវប្បធម៌ខ្មែរផងដែរ។
ជាមួយនេះដែរ លោក ង៉ូវ សេងកាក់ បញ្ជាក់ថា អង្គរសង្ក្រាន្តពិតជាមានសារៈសំខាន់ក្នុងការជួយដល់សេដ្ឋកិច្ចខេត្តសៀមរាប។ ក្នុងនាមអាជ្ញាធរខេត្ត និងប្រជាពលរដ្ឋ ក៏សូមថ្លែងនូវការអរគុណចំពោះរាជរដ្ឋាភិបាលកម្ពុជា និងសហភាពសហព័ន្ធយុវជនកម្ពុជា និងអ្នកពាក់ព័ន្ធទាំងអស់ ដែលបានជួយឲ្យមានព្រឹត្តិការណ៍ដ៏សំខាន់នេះ នៅក្នុងខេត្តសៀមរាបនេះឡើងផងដែរ៕
