(ភ្នំពេញ)៖ លោក ឃួន ឡាបូរ៉ាវី អតីតកីឡាករបាល់ទាត់ជម្រើសជាតិមួយរូប និងបច្ចុប្បន្នជាមន្ត្រីផ្នែកអភិវឌ្ឍន៍នៃសហព័ន្ធកីឡាបាល់ទាត់កម្ពុជា សូមគោរពថ្លែងអំណរគុណចំពោះសម្ដេចបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា និងឧបនាយករដ្ឋមន្ត្រី សាយ សំអាល់ រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ក្រោយទទួលបានបណ្ណកម្មសិទ្ធិពីបុរី ឡេង ណាវ៉ាត្រា 6A នាថ្ងៃទី០២ ខែមេសា ឆ្នាំ២០២៥។

ក្នុងឱកាសអញ្ជើញទៅទទួលយកវិញ្ញាបនបត្រសម្គាល់ម្ចាស់អចលនវត្ថុ នៅទីស្តីការក្រសួងរៀបចំដែនដី នគរូបនីយកម្ម និងសំណង់ កាលពីម្សិលមិញនេះ លោក ឃួន ឡាបូរ៉ាវី បានលើកឡើងបែបនេះថា៖ «ក្នុងនាមជាអតីតកីឡាករបាល់ទាត់ជម្រើសជាតិមួយរូប និងបច្ចុប្បន្នជាមន្ត្រីផ្នែកអភិវឌ្ឍន៍នៃសហព័ន្ធកីឡាបាល់ទាត់កម្ពុជា ខ្ញុំបាទសូមគោរពថ្លែងអំណរគុណចំពោះសម្ដេចធិបតីនាយករដ្ឋមន្ត្រី និងឯកឧត្ដម សាយ សំអាល់ ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ដែលបានខិតខំដោះស្រាយជូនរូបខ្ញុំបាទ ក៏ដូចជាប្រជាពលរដ្ឋជាច្រើនទៀតឱ្យទទួលបានបណ្ណកម្មសិទ្ធិ»។

អតីតខ្សែប្រយុទ្ធក្រុមបាល់ទាត់ជម្រើសជាតិកម្ពុជារូបនេះ បានបន្ថែមថា បណ្ណកម្មសិទ្ធិនេះពិតជាមានតម្លៃជាទីបំផុតសម្រាប់រូបលោក ដែលបានខិតខំសន្សំលុយកាក់ ដើម្បីទិញដីសម្រាប់សាងសង់ជាជម្រកសម្រាប់កសាងទ្រនំគ្រួសាររស់នៅប្រកបដោយសុភមង្គលនិងសេចក្ដីសុខសាន្ត។ លោកមានការជឿទុកចិត្តចំពោះរាជរដ្ឋាភិបាលនិងក្រសួងដែនដី ដែលតែងតែលះបង់អស់កម្លាំងកាយចិត្តក្នុងការបំពេញការងារដោយតម្កល់ផលប្រយោជន៍ប្រជាជនជាធំ។

គួររំឭកថា កាលពីថ្ងៃទី២៧ ខែមីនា ឆ្នាំ២០២៥ ក្រសួងរៀបចំដែនដី នគរូបនីយកម្ម និងសំណង់ បានចេញលិខិតសេចក្តីប្រកាសព័ត៌មាន អញ្ជើញលោក-លោកស្រី ដែលជាអតិថិជនរបស់គម្រោងផ្ទះនិងដីឡូតិ៍ ឡេង ណាវ៉ាត្រា ជ្រែមួយរយ និងគម្រោងផ្លូវជាតិលេខ៦អា ដែលមានទីតាំងស្ថិតនៅភូមិជ្រែមួយរយ និងភូមិអន្លង់ស្លែង ឃុំសំបួរមាស ស្រុកមុខកំពូល ខេត្តកណ្តាល ចូលរួមអនុវត្តនីតិវិធីចុះបញ្ជីផ្ទេរកម្មសិទ្ធិ និងប្រគល់វិញ្ញាបនបត្រសម្គាល់ម្ចាស់អចលនវត្ថុ ចាប់ពីថ្ងៃទី២ ដល់ថ្ងៃទី៤ ខែមេសា ឆ្នាំ២០២៥ វេលាម៉ោង ០៨:៣០នាទីព្រឹក ដល់ម៉ោង ១៧:០០នាទីរសៀល នៅសាលប្រជុំ២០២១ ជាន់ទី២ នាទីស្តីការក្រសួងរៀបចំដែនដី។

បើតាមរបាយការណ៍ដែលបង្ហាញដោយអ្នកឧកញ៉ា ឡេង ណាវ៉ាត្រា លើបណ្តាញសង្គម Facebook ត្រឹមថ្ងៃទី២៧ ខែមីនាកន្លងទៅ បុរីបានបញ្ចប់ការសាងសង់ ១០០% មានចំនួន ៣២៤១ ផ្ទះហើយ ខណៈក្រុមការងារសាងសង់នៅតែបន្តយ៉ាងសកម្មដើម្បីបញ្ចប់ការងារសាងសង់ជូនអតិថិជន៕